Monday, November 19, 2007

ന സ്ത്രീ ചുരിദാര്‍ അര്‍ഹതി!!!

വാലസ്ത്രീകള്‍ടെ തുകിലും വാരിക്കൊ-
ണ്ടരയാലിന്‍ കൊമ്പത്തിരുന്നോരോ
ശിലക്കേടുകള്‍ പറഞ്ഞും ഭാവിച്ചും
നീലക്കാര്‍വര്‍ണാ കണികാണ്മാന്‍

എന്നാണ് അജ്ഞാതനായ കവി കണ്ണന്റെ ലീലകളെ പാടിപ്പുകഴ്ത്തിയത്. സ്ത്രീ വിഷയത്തില്‍ മാത്രമല്ല, അവരുടെ വസ്ത്രങ്ങളുടെ കാര്യത്തിലും ഇത്രയും താല്‍പര്യമുളള മറ്റൊരു ഭഗവാനുണ്ടോ എന്ന് സംശയം. ഗോപസ്ത്രീകളുടെ ചേല കവര്‍ന്ന കണ്ണന്‍ ആപത്തു കാലത്ത് ദ്രൗപദിയ്ക്ക് ചേല നല്‍കിയും അനുഗ്രഹം ചൊരിഞ്ഞിട്ടുണ്ട്.

ഗോപസ്ത്രീകളുടെ ചേലയും വാരി അരയാലില്‍ കൊമ്പത്തിരുന്ന് ശീലക്കേടു കാണിച്ച കണ്ണനെ ചെറുശേരി കുറേക്കൂടി പച്ചയായി വരച്ചിട്ടത് ഇങ്ങനെ.

പൂഞ്ചായലെല്ലാം മുറുക്കി മണന്മേല്‍താന്‍
പൂഞ്ചേലയെല്ലാമഴിച്ചുവച്ച്
പൂന്തേനെ വെന്നുള്ള നന്മൊഴിമാരെല്ലാം
നീന്തിത്തുടങ്ങിനാര്‍ മെല്ലെ മെല്ലെ.
കാനനം പൂകിന കാര്‍വര്‍ണ്ണനന്നേരം
കാളിന്ദീതീരത്തു ചെന്നു മെല്ലെ.
ചോരനായ് നിന്നു നല്‍ക്കൂറകളെല്ലാമേ
വാരിക്കൊണ്ടോടിനാന്‍ തീരമേതാന്‍

കൃഷ്ണഗാഥയിലെ ഹേമന്തലീല എന്ന അധ്യായത്തിലാണ് ചെറുശേരി വിസ്തരിച്ച് കളളക്കണ്ണന്റെ ചേലക്കൊതി വര്‍ണിക്കുന്നത്. ഉറിയിലെ വെണ്ണയും ഗോപികാദേഹങ്ങളിലെ ചേലയുമായിരുന്നു കണ്ണന്റെ മോഷണവിഭവങ്ങള്‍.

മുല്ലപ്പൂമ്പൊടിയേറ്റു കിടക്കുന്ന ചെങ്കല്ലിനും മണ്‍തരിക്കും വരെ കിട്ടും മുല്ലമണം. അപ്പോള്‍ അപ്പനപ്പൂന്മാരുടെ കാലം മുതല്‍ക്കേ ഈ ദേവനെ കുളിപ്പിക്കാനും തേച്ചുകഴുകാനും ചേലയണിയിക്കാനും കളഭം പൂശാനും അംശാധികാരം കല്‍പ്പിച്ചു കിട്ടിയ ശ്രേഷ്ഠപൂജാരിമാരുടെ കാര്യം പറയണോ? പെണ്മേനി കാണാന്‍ കൊതിച്ച കണ്ണന്‍, കുളിക്കും നേരത്ത് അവരഴിച്ചു വെച്ച ചേലകള്‍ വാരി അരയാലിന്റെ കൊമ്പില്‍ കേറിയിരുന്നാണ് സീന്‍ മുഴുവന്‍ കണ്ടത്. അത്രയെങ്കിലും അധ്വാനിക്കാനുളള മനോഭാവം ഭഗവാനുണ്ടായിരുന്നു.

ജാത്യാധിപത്യം നിലനിന്ന കാലത്തെ തമ്പുരാക്കന്മാര്‍ക്ക് മെനക്കെടാനുളള ക്ഷമയൊന്നുമുണ്ടായിരുന്നില്ല. അതുകൊണ്ട് "സ്ത്രീകളാരും മാറുമറയ്ക്കേണ്ട" എന്ന ഒറ്റകല്‍പനയില്‍ കാര്യമൊതുക്കി. പിന്നെ ആലിന്‍ചുവട്ടില്‍ വെറുതേ നിന്നാല്‍ മതി, ഉറച്ചതും ഞാന്നതുമായ കൊങ്കകളിളക്കി നാരീജനം നമ്പൂരാരുടെ മുന്നിലൂടെ മാര്‍ച്ച് പാസ്റ്റ് നടത്തുമെന്നായി.

ഒരു കണ്ണിറുക്കി, മുറുക്കാന്‍കൂട്ട് വലത്തേ കവിളില്‍ ഒതുക്കിക്കൂട്ടി ആനന്ദഭൈരവി താളത്തില്‍ ചെറുവിരലിളക്കി തമ്പുരാക്കന്മാര്‍ മഹിളാമണിമാര്‍ക്ക് മാര്‍ക്കിട്ടു. കൂട്ടത്തില്‍ കൊളളാവുന്നതും തേടി രാച്ചൂട്ടും മിന്നിച്ച് അകത്തളങ്ങള്‍ കയറിയിറങ്ങി സംബന്ധം കൂടി.

പുതിയ തലമുറ വളര്‍ന്നപ്പോള്‍ പാതിരാച്ചൂട്ടുമായി വീടുകള്‍ കയറിയിറങ്ങാനാവാതെ വന്നു. തിരുമേനിയെ തെങ്ങില്‍ കെട്ടിയിട്ട് അടിയാന്മാര്‍ പൂശുമെന്ന നിലയായി. മനുസ്മൃതിയും ആര്‍ഷഗ്രന്ഥങ്ങളും പ്രമാണശാസ്ത്രങ്ങളും പാര്‍ലമെന്റ് നിര്‍മ്മിച്ച നിയമങ്ങള്‍ക്ക് വഴിമാറി. വേദനയോടെ തമ്പുരാന്മാര്‍ പുതിയ കാലത്തോട് പൊരുത്തപ്പെട്ടു. പെണ്ണുങ്ങളെ തുറിച്ചു നോക്കിയാല്‍ പോലും സ്ത്രീപീഡനത്തിന് കേസെടുക്കുന്ന ജനാധിപത്യകാലത്തെ ഉളളറിഞ്ഞു ശപിച്ചു. "ശിവ! ശിവ! കാലം പോയ പോക്കെ"ന്ന് പ്രാകി.

നാലുകെട്ടിന്റെ പ്രൗഡി തുളുമ്പുന്ന കോലായിലെ ചാരുകസേരയില്‍ ഉണ്ണിക്കുടവയറും തടവി പോയകാലത്തിന്റെ ഗൃഹാതുരത്വം തുടിക്കുന്ന ഓര്‍മ്മകളയവിറക്കി നെടുവീര്‍പ്പിടുന്നവര്‍ ഇന്നും ചിലരെങ്കിലുമുണ്ട്.

അവരില്‍ ചിലര്‍ 2007 നവംബര്‍ നവംബര്‍ ഒന്നു മുതല്‍ ഏഴുവരെ ഗുരുവായൂരില്‍ കൂടിയിരുന്നാലോചിച്ച് സ്ത്രീകള്‍ ചുരിദാറിട്ട് അമ്പലത്തില്‍ കയറുന്നത് ഭഗവാനിഷ്ടമല്ലെന്ന് ഏഴാം ദിനം വിധിച്ചു. ഈ വാര്‍ത്ത കേട്ട മാരീചന് തെല്ലും അമ്പരപ്പില്ല. കഴിയുമെങ്കില്‍ സ്ത്രീകള്‍ ഒന്നും ധരിക്കാതെ അമ്പലത്തില്‍ വരണമെന്നാണ് അഷ്ടമംഗല്യത്തില്‍ തെളിഞ്ഞത്. പച്ചയ്ക്ക് അതു പറഞ്ഞാല്‍ പിറ്റേന്ന് ചിലപ്പോള്‍ ജയിലില്‍ കിടക്കേണ്ടി വരും. അതു കൊണ്ട് അത്രയ്ക്ക് കടുപ്പിച്ചില്ല.

പ്രധാന ദൈവജ്ഞനായ പത്മനാഭശര്‍മ്മയ്ക്ക് നിമിത്തങ്ങളിലൂടെയും ഗ്രഹഗോചരങ്ങളിലൂടെയുമാണ് ഗുരുവായൂരപ്പന്‍ തന്റെ ഇഷ്ടങ്ങള്‍ അറിയിച്ചു കൊടുത്തത്. ചോറോട് നാരായണപ്പണിക്കര്‍, പറവൂര്‍ ശശിധരന്‍ തന്ത്രി, കൂറ്റനാട് രാവുണ്ണിപ്പണിക്കര്‍, അരിക്കുളങ്ങര സോമന്‍ പണിക്കര്‍, മണപ്പുഴ രാമന്‍ നമ്പൂതിരി, നാഗലശേരി രാഘവന്‍ നായര്‍, ജയരാജ് പണിക്കര്‍, പ്രശാന്ത് മേനോന്‍ എന്നിവര്‍ വഴിയാണ് ഗുരുവായൂരപ്പന്‍ പൊതുജനങ്ങളെ തന്റെ ഇഷ്ടങ്ങളറിയിക്കുന്നത്. തെളിച്ചു പറഞ്ഞാല്‍ ഭഗവാന്റെ മൈക്കുസെറ്റാണ് ഈ സംഘമെന്നര്‍ത്ഥം.

ഒബിസി വിഭാഗത്തില്‍ പെട്ട യാദവ സമുദായാംഗമാണ് ഭഗവാനെങ്കിലും മൈക്ക് സെറ്റു മുഴുവന്‍ സവര്‍ണമയമാണല്ലോയെന്നൊന്നും ചോദിച്ചേക്കരുത്. കഥയില്‍ മാത്രമല്ല അമ്പലക്കാര്യത്തിലും ചോദ്യം പാടില്ല. ഗ്രഹഗോചരങ്ങളും നിമിത്തവും പഠിച്ച് ഭഗവാന്റെ മനസറിയണമെങ്കില്‍ കുടുംബത്തില്‍ പിറക്കണം. കുലമഹിമയും വേണം.

അഷ്ടമംഗല്യത്തിന്റെ ഏഴാം നാളാണ് ചുരിദാര്‍ പ്രശ്നത്തിന് തീര്‍പ്പുണ്ടാക്കിയത്. ആദ്യദിവസമെങ്ങാനും ഇതൊരു വിവാദമാക്കിയാല്‍ വല്ല ജനാധിപത്യ മഹിളാ അസോസിയേഷനും ഗുരുവായൂരിലേയ്ക്ക് പദയാത്ര നടത്തുമോയെന്ന് പേടിച്ചാണോ എന്നറിയില്ല്ല, തിരക്കഥയില്‍ ചുരിദാര്‍ രംഗം അവസാന ഐറ്റമായാണ് ഉള്‍പ്പെടുത്തിയത്.

ഇത്തരം കാര്യങ്ങളില്‍ മാതൃഭൂമി പറയുന്നത് വളളിപുളളി തെറ്റാതെ മാരീചന്‍ വിശ്വസിക്കുന്നു. സത്യവും സമത്വവും സ്വാതന്ത്ര്യവും സംരക്ഷിക്കാന്‍ ഏതറ്റം വരെയും പോകുന്ന പത്രമാണ് മാതൃഭൂമി. (2007) നവംബര്‍ എട്ടിന്റെ പത്രത്തില്‍ ക്ഷേത്രത്തിന്റെ പവിത്രത നിലനിര്‍ത്തണം - ദൈവജ്ഞര്‍ എന്ന തലക്കെട്ടിലെ അവസാന ഖണ്ഡിക ഓരോ ഭക്തനും ഭക്തയും ഭക്തിയോടെ വായിച്ച് മനപ്പാഠമാക്കേണ്ടതാണ്.

അതിങ്ങനെ. ചുരിദാര്‍ ധരിച്ച ഒരു സ്ത്രീ ചോദ്യവുമായി എഴുന്നേറ്റതോടെ ഒരു മധ്യവയസ്ക എഴുന്നേറ്റ് പ്രശ്നമണ്ഡപത്തിനു സമീപം ഓടിയെത്തി. ഭഗവാന്റെ ഹിതത്തിന് എതിരായി ആചാരം മാറ്റരുത്. നിര്‍ബന്ധത്തിന് വഴങ്ങി ചുരിദാര്‍ അനുവദിച്ചാല്‍ ക്ഷേത്രത്തില്‍ ആത്മാഹൂതി ചെയ്യുമെന്നും സ്ത്രീ വിളിച്ചു പറഞ്ഞു. ഇതോടെ സദസില്‍ തിങ്ങി നിറഞ്ഞ ഭക്തര്‍ ആചാരം മാറ്റരുതെന്ന് വിളിച്ചു പറഞ്ഞു കൊണ്ട് നാമഘോഷം മുഴക്കി. ആധുനിക ശാസ്ത്രം പുരോഗമിക്കുന്നതനുസരിച്ച് നിലവിലുളള ആചാരം മാറ്റിയാല്‍ അത് ആപത്തായി വരും.... ഇങ്ങനെ പോകുന്നു ആ ഖണ്ഡിക. നിരവധി ആര്‍ഷഗ്രന്ഥങ്ങളും പ്രമാണശാസ്ത്രങ്ങളും നിരത്തി ദൈവജ്ഞരില്‍ പ്രായം ചെന്ന ചോറോട് നാരായണപണിക്കരാണത്രേ ഇത് സമര്‍ത്ഥിച്ചത്.

ഏത് സ്ത്രീയാണ് ആത്മഹത്യാ ഭീഷണി മുഴക്കിയതെന്നോ ഏതെല്ലാം ആര്‍ഷഗ്രന്ഥങ്ങളും പ്രമാണ ശാസ്ത്രങ്ങളും നിരത്തിയാണ് പ്രായം ചെന്ന തമ്പുരാന്‍ ഇതൊക്കെ സമര്‍ത്ഥിച്ചതെന്നോ വാര്‍ത്തയില്‍ വ്യക്തമല്ല. ഭഗവാന്റെ കാര്യമാകുമ്പോള്‍ പത്രപ്രവര്‍ത്തനത്തിലെ അഞ്ച് ഡബ്ല്യൂവിനും ഒരെച്ചിനുമൊക്കെ( five Ws and one H) എന്തു പ്രസക്തി? ടിയാന്റെ കൈകളില്‍ മാത്രമുളളതും അദ്ദേഹത്തിന്റെ സന്തതി പരമ്പരകളിലേയ്ക്ക് മാത്രം കൈമാറാനുളളതുമായിരിക്കും ആ ഗ്രന്ഥം എന്നു നാം ധരിക്കുക.

ഭഗവാന്റെ ഇഷ്ടങ്ങള്‍ ഇവരിലൂടെയാണത്രേ പുറം ലോകമറിയുന്നത്. ഭഗവാന് വിശന്നാല്‍ ഉണ്ണേണ്ടത് ഇവരാണ്. ഭഗവാന് ദാഹിച്ചാല്‍ ഇവര്‍ കുടിച്ചുമറിയും. ഭഗവാന്റെ കാമം തീരാന്‍ ഇവര്‍ അറിഞ്ഞു ഭോഗിച്ചേ തീരൂ. മുണ്ടോ സാരിയോ ഉടുത്തു വരുന്ന ഭക്തകളുടെ അണി വയറിലേയ്ക്ക് ആര്‍ത്തിയോടെ നോക്കുന്ന കണ്ണുകള്‍ തീര്‍ച്ചയായും കളളകൃഷ്ണന്റേതു തന്നെയായിരിക്കും. ഭഗവാന്റെ സ്വഭാവമറിയാവുന്നവര്‍ തീര്‍ച്ചയായും വിശ്വസിക്കുകയും ചെയ്യും. മുക്കാല്‍ നൂറ്റാണ്ടു മുമ്പ് മാറുമറയ്ക്കാത്ത വനിതകളുടെ നെഞ്ചിലേയ്ക്ക് ഉമിനീരുമൊലിച്ച് കണ്ണെടുക്കാതെ നോക്കിയത് ഇതേ ദൈവങ്ങളുടെ നയനഭോഗത്തിന്റെ ഇടനിലയ്ക്കാവണം.

ധ്വജം പുന:പ്രതിഷ്ഠ വേണമെന്നും ഉദയാസ്തമയ സമ്പ്രദായത്തില്‍ മാറ്റം വരരുതെന്നും ചൊവ്വാഴ്ച തിരുമേനിമാര്‍ കല്‍പിച്ചിരുന്നു. ഇതില്‍ ഉദയാസ്തമയ പൂജ ഒരു ദിവസം ഒന്നിലേറെപ്പേരുടെ വഴിപാടായി നടത്തുന്നത് ശരിയല്ലെന്ന് ഭഗവാന്‍ ദൈവജ്ഞര്‍ മുഖേനെ അറിയിച്ചത് നാം ശ്രദ്ധിക്കുക തന്നെ വേണം. പലരുടെ ആവശ്യങ്ങള്‍ ഒരേ സമയം മുന്നിലെത്തിയാല്‍ ഏത് ഭഗവാനും കണ്‍ഫ്യൂഷനുണ്ടാവും.

ഉദാഹരണത്തിന് രണ്ട് പ്രധാന ഗുരുവായൂര്‍ ഭക്തരാണ് കെ മുരളീധരനും രമേശ് ചെന്നിത്തലയും. ഇവരുടെ പൂജ ഒരേ സമയം ഭഗവാനു മുന്നിലെത്തിയാല്‍ ചുറ്റിപ്പോവില്ലേ. ആരെ കൊളളും, ആരെ തളളും? കരുണാകരന്റെ എഐസിസി പ്രവേശനം പോലും ഇതിനെക്കാള്‍ എളുപ്പം തീരുമാനിക്കാം. ഇങ്ങനെയെങ്ങാനും വന്നാല്‍ ഒരുനിമിഷം വൈകാതെ താന്‍ ഭഗവാന്‍ പട്ടം രാജിവെയ്ക്കുമെന്നാണ് ഗ്രഹഗോചരങ്ങളിലൂടെ ഭഗവാന്‍ ദൈവജ്ഞനോട് വെളിപ്പെട്ടു പറഞ്ഞത്. ആപ്പ ഊപ്പ ഭക്തന്മാര്‍ക്കുളള പൂജയല്ല ഇത്. ഓര്‍മ്മ വെച്ചോളൂ, രൂപ അരലക്ഷമാണ് ഈ പൂജയ്ക്ക് ഫീസ്.

നമ്മുടെ വീടിന്റെയോ വിറകുപുരയുടെയോ തൂണു ദ്രവിച്ചാല്‍ അത് മാറ്റിസ്ഥാപിക്കണമെന്ന് തീരുമാനിക്കാന്‍ എത്ര സമയമെടുക്കും? കണ്ടാലുടനെ തൂണു മാറ്റും. ഇല്ലെങ്കില്‍ മേല്‍ക്കൂര പൊളിഞ്ഞുവീണ് തലമണ്ട തകരുമെന്ന് മനസിലാക്കാന്‍ നമുക്കൊരു ദേവപ്രശ്നവും വേണ്ട.

എന്നാല്‍ ഗുരുവായൂരില്‍ അതല്ല കഥ. ശേഷം മാതൃഭൂമി തന്നെ പറയട്ടേ. നവംബര്‍ ഏഴ് ബുധനാഴ്ച ഉദയാസ്തമന പൂജാസമ്പ്രദായത്തില്‍ മാറ്റം പാടില്ല എന്ന തലക്കെട്ടില്‍ വന്ന വാര്‍ത്തയിലെ മൂന്നാം ഖണ്ഡികയില്‍ ഇങ്ങനെ പറയുന്നു.

.......സൂക്ഷ്മ വിശകലനത്തില്‍ ധ്വജത്തിന് ദോഷമുളളതായി തെളിഞ്ഞു. കൊടിമരത്തിന്റെ അടിഭാഗം ദ്രവിച്ചതായി പ്രശ്നത്തില്‍ കണ്ടു. മണിക്കൂറുകളോളമാണ് ജ്യോതിശാസ്ത്രത്തിന്റെ തലനാരിഴ കീറി കൊടിമരത്തെക്കുറിച്ച് ചിന്തിച്ചത്. കൊടിമരം മാറ്റി പുതിയത് സ്ഥാപിക്കണം. ഗുരുവായൂരപ്പന്‍ പലതവണ സൂചന നല്‍കിയിട്ടുണ്ട്. ഇത് അവസാനത്തെ സൂചനയാണ്. ഇനിയും ധ്വജം മാറ്റിയില്ലെങ്കില്‍ മനുഷ്യന് പകരം ഗജം മാറ്റും. ആന ഇടഞ്ഞ് കൊടിമരത്തിന്റെ മണ്ഡപം കത്തി മലര്‍ത്തിയിടാന്‍ സാധ്യതയുളളതായി ലക്ഷണമുണ്ടെന്ന് പ്രധാന ദൈവജ്ഞന്‍ പറഞ്ഞു.

'സൂചന കണ്ടു പഠിച്ചില്ലെങ്കില്‍' എന്ന് മുദ്രാവാക്യം വിളിക്കുന്നതില്‍ അപാകതയില്ലെന്നാണ് മണിക്കൂറുകളോളം നീണ്ട തലനാരിഴ കീറലില്‍ തെളിഞ്ഞത്. പലതവണ ഭഗവാന്‍ സൂചന നല്‍കിയ കാര്യം പിന്നെയെന്തിന് മണിക്കൂറുകളോളം തലനാരിഴ കീറി പരിശോധിച്ചു എന്നു ചോദിക്കരുത്. സ്വര്‍ണക്കൊടിമരം പുതിയതൊന്നു പണിയുന്ന നിര്‍മ്മാണപ്രക്രിയയാണ് വിഷയം. ടെന്‍ഡറും മറ്റുമായി പ്രശ്നങ്ങള്‍ പലതുണ്ട്. ഭഗവാന് വേണ്ടപ്പെട്ടവരെ തന്നെ പണിയും ഏല്‍പ്പിക്കണം. ദേവഹിതമാണല്ലോ മുഖ്യം. ആലോചന മണിക്കൂറുകള്‍ നീളും.

വര്‍ഷങ്ങള്‍ക്കു മുമ്പ് കളവുപോയ തിരുവാഭരണവും രത്നമാലയുമൊന്നും ദേവപ്രശ്നത്തില്‍ തെളിയാത്തതെന്ത് എന്ന് ചോദിക്കുന്ന അല്‍പബുദ്ധികളുണ്ട്. "അതിങ്ങു തിരിച്ചു താ തിരിച്ചു താ" എന്ന് ഓരോ ദേവപ്രശ്നത്തിലും ഭഗവാന്‍ കരയുന്നുണ്ടാവാം. ഗ്രഹഗോചരങ്ങളും നിമിത്തവുമൊന്നും പിടിയില്ലാത്ത നാമത് കേള്‍ക്കാത്തതാവാം. അല്ലെങ്കില്‍ തിക്കിത്തിരക്കുന്ന പെണ്‍കൊടിമാരെയും വിഐപികളെയും അനുഗ്രഹിക്കുന്ന തിരക്കില്‍ ഭഗവാന്‍ മറന്നു പോയതുമാവാം.

സ്ത്രീവിഷയത്തില്‍ അസാരം താല്‍പര്യക്കൂടുതലുളളതു കൊണ്ട്, ചുരിദാറിന്റെ കാര്യം ഏതായാലും ഭഗവാന്‍ മറന്നില്ല. അക്കാര്യം ഉറപ്പിച്ചു തന്നെ പറയാന്‍ പത്മനാഭശര്‍മ്മയെയും കൂട്ടരെയും ഏല്‍പിച്ചു.

കണ്ണനെക്കാണാന്‍ ഓടിക്കൂടുന്നവരേറെയും സ്ത്രീകളാണെന്നും ദൈവജ്ഞര്‍ക്കറിയാം.

തൂമുത്തുലാവിന കൊങ്കയില്‍ ചേര്‍ത്തു തന്‍
പ്രേമത്തെ തൂകുന്ന കാന്തനേയും
വാര്‍മെത്തും കാമക്കൂത്താടുമ്പോള്‍ കണ്ണന്തന്‍
നാമത്തെച്ചൊല്ലി വിളിച്ചുടനെ
നാവും കടിച്ചും കൊണ്ടേതുമനങ്ങാതെ
നാണിച്ചുനിന്നാളേ മറ്റൊരുത്തി
എന്നാണ് കൃഷ്ണഗാഥയിലെ ഗോപികാദു:ഖത്തില്‍ ചെറുശേരി പറയുന്നത്.

സ്ത്രീമനസും കളളക്കണ്ണനുമായുളള ബന്ധം അത്ര വഷളാണ്. അതുകൊണ്ട് മേലില്‍ തുണിയില്ലാതെ വേണം ഗുരുവായൂരിലെത്താനെന്ന് ദൈവജ്ഞര്‍ കല്‍പിച്ചാലും ശിരസു വണങ്ങി അനുസരിക്കും, സ്ത്രീശാക്തീകരണ കാലത്തിലെ ഏത് ജനാധിപത്യമഹിളാ അസോസിയേഷനും.

അല്ലെങ്കില്‍ ചുരിദാറണിഞ്ഞ മഹിളാസംഘങ്ങള്‍ എന്തുകൊണ്ടിതുവരെ ഗുരുവായൂരിന്റെ കവാടങ്ങള്‍ കടന്നുമുന്നേറിയില്ല? തടയാന്‍ വരുന്ന ദൈവജ്ഞരുടെ കുടവയറില്‍ ചവിട്ടിക്കയറി, കരിവളയണിഞ്ഞ കൈകള്‍ കൊണ്ടാ കരണത്ത് രണ്ടു പൊട്ടിച്ച് "ആരുണ്ടെടാ തടയാന്‍" എന്നു ചോദിക്കാന്‍ എന്തേ നമ്മുടെ സ്ത്രീസംഘടനകള്‍ക്കാവുന്നില്ല?

ഇനിയും ദൈവജ്ഞര്‍ ഗ്രഹഗോചരങ്ങളെ വ്യാഖ്യാനിച്ച് പലതും പറയും. ആധുനിക ശാസ്ത്രം കണ്ടുപിടിച്ച ബ്രായും പാന്റീസും ഭഗവാന് ഹിതമല്ലെന്ന് അവര്‍ അരുളിച്ചെയ്യും. സാരിയോ മുണ്ടോ ഉടുക്കുന്നെങ്കില്‍ പൊക്കിളു താഴ്ത്തിയാവുന്നതാണ് ഭഗവാന്റെ ഇംഗിതമെന്ന് നിമിത്തങ്ങള്‍ വെളിപ്പെടുത്തും. പി കെ നാരയണപ്പണിക്കരെയും ആര്‍ ബാലകൃഷ്ണപിളളയെയും പോലുളള മാടമ്പിമാര്‍ ഭഗവാന് വക്കാലത്തുമായെത്തും. "ന സ്ത്രീ ചുരിദാറര്‍ഹതി"യെന്നത് വെറുമൊരു സാമ്പിള്‍ മാത്രം. വലുത് വരാനിരിക്കുന്നതേയുളളൂ.

Stop.. Stop മാതൃഭൂമി പത്രത്തില്‍ വിശേഷാല്‍പ്രതി കൈകാര്യം ചെയ്യുന്ന ഇന്ദ്രന്‍ എന്ന എന്‍ പി രാജേന്ദ്രന്‍ ഉശിരന്‍ പരിവര്‍ത്തനവാദി കോണ്‍ഗ്രസായിരുന്നു പണ്ട്. ഏത് പരിവര്‍ത്തനവാദിക്കും വിപ്ലവകാരിക്കും കാലം കുറെ മാറ്റം വരുത്തും.

ഡിവൈഎഫ്ഐ നടത്തിയ രണ്ടാം ഗുരുവായൂര്‍ സത്യഗ്രഹത്തെ പരിവര്‍ത്തനം വന്ന പരിവര്‍ത്തന വാദി ജൂലൈ 16ലെ വിശേഷാല്‍ പ്രതിയില്‍ കണക്കിന് പരിഹസിച്ചിട്ടുണ്ട്. ദാ ഇങ്ങനെ ......തൃശ്ശൂര്‍ അടുത്തുതന്നെയാണല്ലോ രണ്ടാം ഗുരുവായൂര്‍സത്യാഗ്രഹം ഹാസ്യപൊറാട്ട് നാടകം അരങ്ങേറിയത്. അസ്സല്‍ സത്യാഗ്രഹം നടത്തിയവര്‍ സ്വര്‍ഗത്തിലിരുന്ന് പൊട്ടിച്ചിരിക്കുകയായിരുന്നു എന്നും അതല്ല പൊട്ടിക്കരയുകയായിരുന്നു എന്നും രണ്ട് പക്ഷമുണ്ട്..........

ഇത്രയുമെഴുതിയ ഇന്ദ്രന്റെ തൂലിക ചുരിദാറും ദേവപ്രശ്നവുമൊക്കെ നവംബര്‍ 12ലെ വിശേഷാല്‍ പ്രതിയില്‍ വിഷയമാക്കുമെന്ന് മാരീചന്‍ പ്രതീക്ഷിച്ചത് വെറുതെയായി. ഗൗഡാപുത്രനെയും യെദിയൂരപ്പയെയും ദക്ഷിണാമൂര്‍ത്തിയെയുമൊക്കെ പരിഹസിച്ചു തൃപ്തിയടഞ്ഞു, പഴയ പരിവര്‍ത്തന കേസരിയുടെ പടവാള്‍.

ഇവരൊക്കെ ആഗ്രഹിച്ച പരിവര്‍ത്തനം നാട്ടില്‍ വരാത്തതിന് ഗുരുവായൂരപ്പനോട് തന്നെയാണോ നാം നന്ദി പറയേണ്ടത്?

Saturday, April 28, 2007

കാര്യപ്രാപ്തിയും രാഹുല്‍മാണിക്യവും

ഇന്ത്യയെ രക്ഷിക്കാന്‍ അവതരിച്ചവരാണ് സോണിയയും മകന്‍ രാഹുലുമെന്ന് മന്‍മോഹന്‍ സിംഗ് മുതല്‍ വയലാര്‍ രവി വരെ നമ്മോട് പറയുകയാണ്. ഊണിലും ഉറക്കത്തിലും ഇന്ത്യയിലെ ദരിദ്രകോടികളെ ഓര്‍ത്താണ് ഇവരുടെ മനം തുടിക്കുന്നതും ഹൃദയം മിടിക്കുന്നതും.

ഇരുവരും ലോക്സഭയിലെ എംപിമാരാണ്. അതാത് നിയോജക മണ്ഡലങ്ങളിലെ ജനങ്ങളുടെ പ്രശ്നങ്ങള്‍ പാര്‍ലമെന്റില്‍ അവതരിപ്പിക്കാനാണ് ഇവരെ ജനം തിരഞ്ഞെടുത്തത്.

ഇതാ ഇവരുടെ പാര്‍ലമെന്ററി പ്രകടനത്തിന്റെ സംക്ഷിപ്ത രൂപം. പതിനാലാം ലോകസഭ ഇതുവരെ സമ്മേളിച്ചത് 210 ദിവസം. ഇതുവരെ പാര്‍ലമെന്റ് നടപടികളിലെ പങ്കാളിത്തത്തിന്റെ പേരില്‍ എത്ര മാര്‍ക്ക് ഇവര്‍ക്ക് നല്‍കാം. നിങ്ങള്‍ തീരുമാനിക്കുക.

സോണിയയുടെ പാര്‍ലമെന്റ് പ്രകടനം

ആകെ പങ്കെടുത്തത് മൂന്ന് ചര്‍ച്ചകളില്‍ - സ്പീക്കര്‍ സോമനാഥ് ചാറ്റര്‍ജിയ്ക്കും ഡെപ്യൂട്ടി സ്പീക്കര്‍ ചരണ്‍ജിത് അത്വാളിനും അനുമോദനങ്ങള്‍ നേര്‍ന്നത് ഒഴിച്ചാല്‍ 18-08-2005ല്‍ ഗ്രാമീണ തൊഴില്‍ദാന ബില്ലിന്റെ ചര്‍ച്ചയില്‍ മാത്രമാണ് സോണിയ പങ്കെടുത്തത്.

പ്രത്യേക ഇടപെടലുകളൊന്നും ഇതുവരെ നടത്തിയിട്ടില്ല.

ചോദ്യങ്ങള്‍ ചോദിച്ചിട്ടില്ല.
സപ്ലിമെന്ററി ചോദ്യങ്ങള്‍ ചോദിച്ചിട്ടില്ല.
സ്വകാര്യ ബില്ലുകള്‍ അവതരിപ്പിച്ചിട്ടില്ല.
സ്വകാര്യ പ്രമേയങ്ങള്‍ അവതരിപ്പിച്ചിട്ടില്ല.
നിലവില്‍ ഒരു പാര്‍ലമെന്റ് കമ്മിറ്റിയിലും അംഗമല്ല

രാഹുലിന്റെ പാര്‍ലമെന്റ് പ്രകടനം

ചര്‍ച്ചയില്‍ പങ്കെടുത്തത് 2 തവണ
ഇതുവരെ പ്രത്യേക ഇടപെടല്‍ ഒരു തവണ.
മൂന്ന് ചോദ്യങ്ങള്‍ ചോദിച്ചിട്ടുണ്ട്. മൂന്നും നക്ഷത്ര ചിഹ്നമിടാത്തവ. (നക്ഷത്ര ചിഹ്നമിടാത്ത ചോദ്യങ്ങള്‍ക്ക് പാര്‍ലമെന്റില്‍ മറുപടി എഴുതി നല്‍കിയാല്‍ മതി. ചോദ്യവും മറുപടിയും അവതരിപ്പിക്കേണ്ടതില്ല).

ഉപചോദ്യങ്ങള്‍ ചോദിച്ചിട്ടില്ല.
ബില്ലുകള്‍ ഇല്ല. സ്വകാര്യ ബില്ലുകളോ സ്വകാര്യ പ്രമേയങ്ങളോ അവതരിപ്പിച്ചിട്ടില്ല.

ചുരുക്കത്തില്‍ സോണിയയെ തിരഞ്ഞെടുത്തതു കൊണ്ട് റായിബറേലിയിലെയോ രാഹുലിനെ ജയിപ്പിച്ചതു കൊണ്ട് അമേതിയിലെയോ ജനങ്ങള്‍ക്ക് പ്രത്യേകിച്ച് ഉപയോഗമൊന്നുമില്ല.

ആരെ തെരഞ്ഞെടുത്തതു കൊണ്ട് ആര്‍ക്കാണ് ഉപയോഗം എന്നത് ചോദ്യമാണ്. സമ്മതിച്ചു. എന്നാല്‍ സ്വന്തം കുടുംബമഹിമ അറപ്പിക്കും വിധം പാടി നടക്കുന്ന ഒരാളില്‍ നിന്നും പ്രതീക്ഷിക്കാവുന്നതാണോ ഈ നിഷ്ക്രിയത്വം?

യുപിയിലെ ഒരു തെരഞ്ഞെടുപ്പ് യോഗത്തില്‍ രാഹുല്‍ ഇങ്ങനെ പ്രസംഗിച്ചു.

നിങ്ങള്‍ക്കറിയാമല്ലോ, എന്റെ കുടുംബം ഒരു കാര്യം ചെയ്യാനുറച്ചാല്‍ അത് ചെയ്തിരിക്കും. സ്വാതന്ത്യ്ര സമരത്തിന്റെ കാര്യമായാലും പാകിസ്താനെ വിഭജിച്ച കാര്യമായാലും ഇന്ത്യയെ ഇരുപത്തി ഒന്നാം നൂറ്റാണ്ടിലേയ്ക്ക് നയിക്കുന്ന കാര്യമായാലും അതങ്ങനെ തന്നെ.

വലിയ വലിയ കാര്യങ്ങള്‍ ചെയ്യാന്‍ തീരുമാനിച്ച ഈ കുടുംബം പക്ഷേ പാര്‍ലമെന്റില്‍ ജനങ്ങളുടെ പ്രശ്നങ്ങള്‍ അവതരിപ്പിക്കാന്‍ ഇതുവരെ തീരുമാനിച്ചിട്ടില്ല.

ഇന്ത്യയുടെ കഷ്ടകാലം എന്നല്ലാതെ എന്തുപറയാന്‍.

Wednesday, April 25, 2007

റോളുണ്ടോ സഖാവെ, ഒരു പന്ന്യനെയെടുക്കാന്‍

ചോരച്ചാലുകള്‍ പലതും പന്ന്യന്‍ രവീന്ദ്രന്‍ നീന്തിക്കയറിയിട്ടുണ്ട്. തൂക്കുമരങ്ങളില്‍ പലവട്ടം ഊഞ്ഞാലാടിയിട്ടുണ്ട്. ചോരയില്‍ മുങ്ങി ചോരയില്‍ പൊങ്ങിയിട്ടുമുണ്ട്.

മൂലധനത്തോളം ആശയഗംഭീരമായ തൊഴില്‍ അല്ലെങ്കില്‍ ജയില്‍ എന്ന ലഘുലേഖ രചിച്ചിട്ടുണ്ട്. ചെയ്തിട്ടില്ലാത്ത ഒരേയൊരു പണി സിനിമാ അഭിനയമാണ്.

കമ്മ്യൂണിസ്റുകാരനായതിനാല്‍ പുനര്‍ജന്മത്തില്‍ വിശ്വാസമില്ല. അപ്പോള്‍ പിന്നെ ഈ ആശ അടുത്ത ജന്മത്തിലേയ്ക്ക് നീക്കി വയ്ക്കാന്‍ പറ്റുമോ? ഇല്ലേയില്ല.

അങ്ങനെയാണ് സഖാവ് പന്ന്യന്‍ രവീന്ദ്രന്‍ സിനിമയില്‍ അഭിനയിക്കാന്‍ തീരുമാനിക്കുന്നത്.

രാഷ്ട്രീയക്കാര്‍ക്ക് സിനിമയും സിനിമാക്കാര്‍ക്ക് രാഷ്ട്രീയവും പരസ്പര ബഹുമാനമുളള ഏര്‍പ്പാടുകളാണ്. പരസ്പരം പരിചയപ്പെടാനും അടുത്ത് ഇടപഴകാനും അവരില്‍ പലര്‍ക്കും വല്ലാത്ത താല്‍പര്യവുമാണ്. അതിലൊന്നും നമുക്ക് എതിര്‍പ്പുണ്ടാകേണ്ട കാര്യമില്ല. പ്രശസ്തിയുടെ വെളളിവെളിച്ചം ആവോളം വന്നു പതിയുന്ന മേഖലകളിലെ തുല്യര്‍ തമ്മിലുളള കൊടുക്കല്‍ വാങ്ങല്‍. അങ്ങനെ കരുതിയാല്‍ മതി.

അങ്ങനെ വരുന്പോള്‍ സിനിമാ നടന്‍ എംപിയാകുന്നതിലും എംപിയായ പന്ന്യന്‍ രവീന്ദ്രന്‍ അഭിനയിക്കാനിറങ്ങുന്നതിലും വലിയ കുഴപ്പമൊന്നുമില്ല. ഉടന്‍ പുറത്തിറങ്ങുന്ന ഒരു മലയാള ചിത്രത്തില്‍ ആദിവാസി നേതാവിന്റെ വേഷത്തില്‍ സഖാവ് പന്ന്യന്‍ രവീന്ദ്രനെ നമുക്കു കാണാം.

മേക്കപ്പിന്റെ ചെലവ് ലാഭിക്കാനാണോ സഖാവിനെ ഈ റോളിലേയ്ക്ക് തിരഞ്ഞെടുത്തത് എന്നൊന്നും ചോദിക്കരുത്.

തലസ്ഥാന നഗരിയിലെ എംപിക്ക് പാര്‍ലമെന്റില്‍ പിടിപ്പത് പണിയില്ലേ എന്നും ചോദിക്കരുത്.
ഹൈക്കോടതി ബഞ്ച് ഒന്നുമായില്ല. വിഴിഞ്ഞം തുറമുഖത്തിന്റെ കാര്യം ഏതാണ്ട് ഗോപിയായ മട്ടാണ്.

എയര്‍പോര്‍ട്ട് വികസനം, നഗരവികസനം എന്നിങ്ങനെ തൊട്ടാല്‍ പൊളളുന്ന വിഷയങ്ങള്‍ വേറെ കിടക്കുന്നു. ഏഴു നിയമസഭാ മണ്ഡലങ്ങളിലെ ജനജീവിതത്തെ ബാധിക്കുന്ന കാക്കത്തൊളളായിരം പ്രശ്നങ്ങള്‍ വേറെ.

ഇതൊക്കെ കളഞ്ഞിട്ട് എന്തിനായിരിക്കും സഖാവ് പന്ന്യന്‍ രവീന്ദ്രന്‍ അഭിനയിക്കാന്‍ പോകുന്നത്?

കാര്യം ഇതാണ്. സഖാവ് പന്ന്യന്‍ രവീന്ദ്രന് പാര്‍ലമെന്റില്‍ വേറെ പണിയൊന്നുമില്ല. ബൂര്‍ഷ്വാ കോടതി പോലെ ഒരേര്‍പ്പാടാണ് ഈ പാര്‍ലമെന്റും. അതുകൊണ്ട് സഖാവ് വളരെ അത്യാവശ്യമുണ്ടെങ്കിലേ അവിടെ പോകൂ.

ലോക് സഭയുടെ വെബ് സൈറ്റ് അനുസരിച്ച് ആകെ സമ്മേളിച്ച നൂറു ദിവസങ്ങളില്‍ പന്ന്യന്‍റെ ഹാജര്‍ നില 51 ആകുന്നു. അതായത് ഏതാണ്ട് പകുതി ദിവസങ്ങളും സഖാവ് ലോക്സഭയ്ക്ക് പുറത്താണ് വര്‍ഗ ശത്രുക്കള്‍ക്കെതിരെ പൊരുതിയത്.

പാര്‍ലമെന്റ് ജീവിതത്തിനിടയില്‍ ആകെയദ്ദേഹം ചോദിച്ചത് 54 ചോദ്യങ്ങള്‍. ഇതുവരെ 2 വട്ടമാണ് ചര്‍ച്ചയില്‍ പങ്കെടുത്തത്. ഉപചോദ്യങ്ങളോ പാര്‍ലമെന്റ് നടപടികളില്‍ ക്രിയാത്മകമായ ഇടപെടലുകളോ നഹി.

ചര്‍ച്ചയും ബില്ലവതരണവും കൊഴുക്കുന്പോള്‍ കുറിക്കുകൊളളുന്ന പോയിന്റുമായി ഇടയ്ക്കു ചാടി വീണ് പൊരുതാന്‍ കാര്യവിവരവും ഭാഷാസ്വാധീനവും വേണ്ടേ എന്ന് ദയവായി ചോദിക്കരുത്.

കൊളളാവുന്ന സെക്രട്ടറിമാരുണ്ടെങ്കില്‍ നല്ല വെടിപ്പുളള ഇംഗ്ലീഷില്‍ നക്ഷത്രചിഹ്നം ഇട്ടതും ഇടാത്തതുമായ ചോദ്യങ്ങള്‍ തയ്യാറാക്കി നല്‍കും. അതിലും പന്ന്യന് വിശ്വാസമൊന്നുമില്ല. അതുകൊണ്ട് ചോദ്യങ്ങള്‍ രണ്ടില്‍ ഒതുക്കി.

പാര്‍ട്ടി ഏല്‍പിച്ച പണി മാത്രമേ പണ്ടും പന്ന്യന്‍ ചെയ്തിട്ടുളളൂ. മുടി മുറിക്കാന്‍ പാര്‍ട്ടി പറഞ്ഞില്ല. അതുകൊണ്ട് ചെയ്തതുമില്ല. കുത്തകബൂര്‍ഷ്വാസിക്കെതിരെയുളള സമരമാണ് ഒരു കമ്മ്യൂണിസ്റ്റുകാരന് പ്രധാനം. അതിനാല്‍ ലോക് സഭയിലേയ്ക്ക് പോകാനുളള ആഗ്രഹം പാര്‍ലമെന്‍ററി വ്യാമോഹം എന്ന വകുപ്പിലാണ് പാര്‍ട്ടി പെടുത്തിയിരിക്കുന്നത്. എല്ലാ ദിവസവും അവിടെ പോയിരുന്നാല്‍ വ്യാമോഹം വല്ലാതെ കൂടി കച്ചവടം പൂട്ടിപ്പോകും. അതിനാലാണ് അദ്ദേഹം പകുതി ദിവസങ്ങളും സഭയ്ക്കു പുറത്ത് ചെലവഴിച്ചു തീര്‍ത്തത്.

നേതാക്കളെ ജനം എപ്പോഴും കണ്ടുകൊണ്ടിരിക്കുക എന്നതാണ് സോഷ്യലിസം വരാനുളള എളുപ്പവഴി. ജനം കൂടുതല്‍ നേരവും ടിവിയ്ക്കു മുന്നിലും സിനിമാ തീയേറ്ററിലുമാണ്. അപ്പോള്‍ അവരുടെ മുന്നില്‍ അതുവഴി പ്രത്യക്ഷപ്പെടുന്നതല്ലേ ഉചിതം.

പ്രത്യയശാസ്ത്ര ബോധമുണ്ടെങ്കിലേ ഇതൊക്കെ മനസിലാകൂ. അതുകൊണ്ട് സിനിമ, സീരിയല്‍ വഴി ജനത്തിന്‍റെ സ്വീകരണ മുറിയില്‍ പ്രവേശിച്ചു നോക്കാം. അല്ലെങ്കിലും കേരള രാഷ്ട്രീയത്തിലെ ഏറ്റവും നല്ല അഭിനയ പ്രതിഭകള്‍ സിപിഐക്കാരാണല്ലോ.

അതുകൊണ്ട് സഖാവ് പന്ന്യന്‍ രവീന്ദ്രന്‍ സിനിമകളില്‍ തകര്‍ത്ത് അഭിനയിക്കട്ടെ. ചേലുളള മുടിയുടെ പച്ചയില്‍ നല്ല നടിക്കുളള ഉര്‍വശി അവാര്‍ഡ് അദ്ദേഹത്തിന് കിട്ടില്ലെന്ന് ആരു കണ്ടു?

പ്രസിഡന്റില്‍ നിന്നും നല്ല നടിക്കുളള അവാര്‍ഡ് സ്വീകരിച്ച് ഇറങ്ങി വരുന്ന സഖാവിനു വേണ്ടി ഇപ്പോഴേ നമുക്കൊരു ലാല്‍സലാം കരുതി വയ്ക്കാം.