Wednesday, April 15, 2009

അഴുകിയൊലിക്കട്ടെ, ഈ നാവുകള്‍...

അഭിസാരികയ്ക്ക് നാണം അനാവശ്യഗുണമാണെന്ന് പറഞ്ഞത് സാക്ഷാല്‍ ചാണക്യനാണ്. വര്‍ഗീയ വിദ്വേഷം വമിക്കുന്ന കുപ്രചരണങ്ങള്‍ ഒരുളുപ്പുമില്ലാതെ തിരഞ്ഞെടുപ്പുകാലത്ത് പ്രചരിപ്പിക്കുന്നവരെ അഭിസാരികമാരോട് ഉപമിച്ചാല്‍ അവര്‍ നാണിച്ചു ചൂളും. മുന്‍കാല പ്രാബല്യത്തോടെ ചാണക്യന്‍ തന്റെ സൂക്തം പിന്‍വലിക്കും. മദ്രസാ അധ്യാപകരുടെ പെന്‍ഷനുമായി ബന്ധപ്പെട്ട് കേരളത്തില്‍ നടക്കുന്ന അതിരൂക്ഷമായ വിദ്വേഷ പ്രചരണം നാണം, മാനം, അന്തസ്, സദാചാരം എന്നീ വാക്കുകളുടെ അര്‍ത്ഥങ്ങളെയാകെ വെല്ലുവിളിക്കും മട്ടില്‍ ആളിക്കത്തുകയാണ്.

സച്ചാര്‍ കമ്മിറ്റി റിപ്പോര്‍ട്ട് പഠിച്ച് നിര്‍ദ്ദേശങ്ങള്‍ സമര്‍പ്പിക്കാന്‍ പാലൊളി മുഹമ്മദ് കുട്ടിയുടെ നേതൃത്വത്തില്‍ രൂപം നല്‍കിയ കമ്മിറ്റിയുടെ നിര്‍ദ്ദേശമനുസരിച്ചാണ് മദ്രസാ അധ്യാപകര്‍ക്ക് നാലായിരം രൂപാ പെന്‍ഷന്‍ കിട്ടുന്ന ഒരു പദ്ധതിയ്ക്ക് എല്‍ഡിഎഫ് സര്‍ക്കാര്‍ രൂപം നല്‍കിയത്. ഈ പദ്ധതിയെ, "സര്‍ക്കാര്‍ ഖജനാവ് മുസ്ലിങ്ങള്‍ക്കു മുന്നില്‍ തുറന്നിട്ടുകൊടുത്തിരിക്കുന്നുവെന്ന്" വിശേഷിപ്പിച്ചാണ് സംഘപരിവാര്‍ കേരളീയ സമൂഹത്തില്‍ വര്‍ഗീയ ചേരിതിരിവിന് ശ്രമിക്കുന്നത്. കര്‍ഷകത്തൊഴിലാളി പെന്‍ഷനെ മദ്രസ അധ്യാപക പെന്‍ഷനുമായി താരതമ്യപ്പെടുത്തുക എന്ന അതിസാഹസവും അവര്‍ നടത്തുന്നുണ്ട്. കമ്മ്യൂണിസ്റ്റ് പാര്‍ട്ടിയുടെ അടിത്തറയായ കര്‍ഷകത്തൊഴിലാളികള്‍ക്ക് വെറും 250 രൂപ പെന്‍ഷന്‍ നല്‍കുമ്പോള്‍ "മുക്രികള്‍ക്ക്" നാലായിരം രൂപ പെന്‍ഷന്‍ എന്ന മട്ടിലാണ് അട്ടഹാസത്തിന്റെ ഈണവും താളവും.

ശുദ്ധഗതിക്കാര്‍ വളരെ പെട്ടെന്ന് ഈ പ്രചരണത്തില്‍ വീഴുമെന്ന് അട്ടഹസിക്കുന്നവര്‍ക്കറിയാം. പ്രചരണത്തിന്റെ ശരിതെറ്റുകള്‍ വിലയിരുത്തി തീരുമാനത്തിലെത്തിച്ചേരാന്‍ കഴിയുന്നത് നന്നേ ചുരുങ്ങിയ ന്യൂനപക്ഷത്തിനാണ്. വാര്‍ത്തയെ അടിസ്ഥാനമാക്കി അഭിപ്രായം സ്വരൂപിക്കുന്ന തിരക്കില്‍ വാര്‍ത്തയ്ക്കാധാരമായ വിവരം ശരിയോ തെറ്റോ എന്ന സുപ്രധാനമായ അന്വേഷണം നടത്താന്‍ മഹാഭൂരിപക്ഷത്തിനും കഴിയാറില്ല. ഇവരെ ലക്ഷ്യമിട്ടാണ് ഗുജറാത്തിലെയും ഒറീസയിലെയും തെരുവുകളില്‍ ഒഴുകിപ്പരന്ന കൊഴുത്ത ചോര രുചിച്ച് മദം മാറാത്ത നാവുകളില്‍ കൊടുംനുണയുടെ പെരുങ്കളിയാട്ടം നടക്കുന്നത് . പാവപ്പെട്ട കര്‍ഷകത്തൊഴിലാളിക്ക് വെറും 250 രൂപ പ്രതിമാസം നല്‍കുന്ന സര്‍ക്കാര്‍, "മുക്രി"കള്‍ക്ക് ഖജനാവില്‍ നിന്നും വാരിക്കോരി നല്‍കുന്നുവെന്ന് ആക്രോശിക്കുമ്പോള്‍ ഉന്നം കൃത്യം. മാര്‍ഗം വ്യക്തം.

സനാതന ഹിന്ദുവിന്റെ ബോധമണ്ഡലത്തിലേയ്ക്ക് എന്നാണ് കര്‍ഷകത്തൊഴിലാളിക്ക് പ്രവേശനമനുവദിച്ചതെന്ന ചോദ്യം അവിടെ നില്‍ക്കട്ടെ. കര്‍ഷകത്തൊഴിലാളികളുടെ ജീവിതാവശ്യങ്ങള്‍ക്കും അന്തസിനും വേണ്ടി ഊര്‍ജം ചെലവിടാന്‍ ഹിന്ദുത്വത്തിന്റെ ഗോഡൗണ്‍ സൂക്ഷിപ്പുകാര്‍ക്ക് നേരവും കാലവുമൊത്തത് എന്നുമുതലാണെന്ന ചരിത്ര വസ്തുതയിലേയ്ക്ക് പിന്നെ കടക്കാം.

മദ്രസാ അധ്യാപകരുടെ പെന്‍ഷന്‍ പദ്ധതി വിഭാവനം ചെയ്തിരിക്കുന്നത് എങ്ങനെയാണ് എന്ന് നാം അറിഞ്ഞേ തീരൂ. മദ്രസ അധ്യാപകനും അയാള്‍ പണിയെടുക്കുന്ന സ്ഥാപനവും പ്രതിമാസം 50 രൂപ വീതം ക്ഷേമനിധി ബോര്‍ഡില്‍ അടയ്ക്കുന്നു. ഈ തുകയാണ് പിന്നീട് പെന്‍ഷനായി നല്‍കുന്നത്. പെന്‍ഷന് അര്‍ഹത നേടാന്‍ പത്തു വര്‍ഷം ജോലി പൂര്‍ത്തിയാക്കണം. 65 വയസുവരെ ഒരാള്‍ക്ക് തൊഴിലില്‍ തുടരാം.

20വയസു പ്രായത്തില്‍ മദ്രസയില്‍ പഠിപ്പിക്കാന്‍ കയറുന്ന ഒരാള്‍ 65 വയസില്‍ വിരമിക്കുമ്പോള്‍, അയാളും അയാളുടെ മദ്രസയും 45 വര്‍ഷം അടയ്ക്കുന്ന തുകയില്‍ നിന്ന് ലഭിക്കാവുന്ന പരമാവധി പെന്‍ഷന്‍ തുകയാണ് 4000 രൂപ. അതായത് ഈ ക്ഷേമനിധി നിലവില്‍ വരുന്നത് 2009ലാണ് എന്നിരിക്കട്ടെ. ഈ വര്‍ഷം 20 വയസില്‍ മദ്രസാ അധ്യാപകനായി തൊഴിലില്‍ പ്രവേശിക്കുന്ന വ്യക്തി 45 വര്‍ഷം ആ തൊഴില്‍ ചെയ്ത് തന്റെ 65 -ാം വയസില്‍ വിരമിക്കുമ്പോള്‍ 4000 രൂപയോളം പ്രതിമാസം പെന്‍ഷന്‍ ലഭിക്കാന്‍ അര്‍ഹനാകും. അയാള്‍ക്ക് ഈ പെന്‍ഷന്‍ കിട്ടുന്ന കാലം 2009 അധികം 45 സമം 2054.

പത്തു വര്‍ഷം സര്‍വീസുളളയാള്‍ക്ക് നാലായിരം രൂപ പെന്‍ഷന്‍ കിട്ടാന്‍ യാതൊരു സാധ്യതയുമില്ലെന്ന് മനസിലാക്കാന്‍ സാമാന്യബുദ്ധി മതി. സര്‍ക്കാര്‍ സഹായമൊന്നും ചെയ്യുന്നില്ലെന്നല്ല. ക്ഷേമനിധി ബോര്‍ഡിന്റെ എസ്റ്റാബ്ലിഷ്‍മെന്റ് ചെലവുകള്‍ സര്‍ക്കാരാണ് വഹിക്കുന്നത്. ഓഫീസ് പ്രവര്‍ത്തനത്തിന് മൂന്നോ നാലോ ജീവനക്കാരെ നിയമിക്കുന്നത് സര്‍ക്കാര്‍, അവരുടെ ശംബളവും മറ്റാനുകൂല്യങ്ങളും വഹിക്കുന്നതും സര്‍ക്കാര്‍.

തന്റെ വരുമാനത്തില്‍ നിന്ന് 45 വര്‍ഷമായി മാറ്റി വെയ്ക്കുന്ന ഒരു പങ്കില്‍ നിന്നാണ് ജീവിതത്തിന്റെ സായംകാലത്ത് ആരെയും ആശ്രയിക്കാതെ ജീവിക്കാന്‍ മദ്രസാ അധ്യാപകന് പെന്‍ഷന്‍ കിട്ടുന്നത്. ആരിലും സഹതാപമുണര്‍ത്തും വിധം പരിതാപകരമാണ് വരുമാനമില്ലാത്ത വൃദ്ധജനങ്ങളുടെ ജീവിതാവസ്ഥയെന്ന് നമുക്കറിയാം. സമ്പത്തുളളവന്റെയും ഇല്ലാത്തവന്റെയും ബാധ്യതയായി അവര്‍ ഇപ്പോഴേ മാറിക്കഴിഞ്ഞു. അമ്പതു വര്‍ഷം കഴിയുമ്പോള്‍ അവരുടെ അവസ്ഥയെന്തെന്നും അന്നവര്‍ക്ക് കിട്ടുമെന്ന് പ്രതീക്ഷിക്കുന്ന നാലായിരം രൂപയുടെ മൂല്യമെന്തെന്നും ഇന്നു നമുക്ക് ഊഹിക്കാന്‍ സാധ്യമല്ല. തുച്ഛമാണെങ്കിലും, ഒരു വരുമാനം ഉണ്ടാവുകയും, ആരോടും ഇരക്കാതെ ഓരോ ദിവസവും തളളിനീക്കാന്‍ കഴിയുകയും ചെയ്യാമെന്ന പ്രതീക്ഷ മനുഷ്യനിലുണ്ടാക്കുന്ന ആത്മവിശ്വാസം എത്രയെന്നറിയാന്‍ "ലോഹപുരുഷന്മാര്‍ക്ക്" മനസാക്ഷിയെന്നൊരു സാധനം വേണം.

വല്ലാതെ കഷ്ടപ്പാടു നിറഞ്ഞ ജീവിതം നയിക്കുന്നവരാണ്, ലഷ്കര്‍ ഇ തോയിബയെന്ന് മുദ്രകുത്തി അകറ്റി നിര്‍ത്താന്‍ ശ്രമിക്കുന്ന മദ്രസാ അധ്യാപകര്‍. ലഭിക്കുന്നത് തുച്ഛമായ വരുമാനം. അതു കൃത്യമായി സംഘടിപ്പിച്ചു നല്‍കാന്‍ തന്നെ പല ജമായത്തുകളും മറ്റും കഷ്ടപ്പെടുന്നുണ്ട്. ഓരോ ദിവസവും ഓരോ വീടുകളില്‍ നിന്ന് ഭക്ഷണം നല്‍കുന്നു. ഖസാക്കിന്റെ ഇതിഹാസത്തില്‍ ഒ വി വിജയന്‍ പരിചയപ്പെടുത്തിയ അളളാപ്പിച്ചാ മൊല്ലാക്കയുടെ സ്ഥിതിയില്‍ നിന്ന് ഏറെയൊന്നും ഭിന്നമല്ല, ഭൂരിപക്ഷം മദ്രസാ അധ്യാപകരുടെയും ജീവിതം. കുഞ്ഞാമിനമാര്‍ വെള്ളേപ്പം പൊതിഞ്ഞു കൊണ്ടുവന്നു കൊടുത്തില്ലെങ്കില്‍ പലരും ഉച്ചപ്പട്ടിണി കിടക്കും.

ക്ഷേമപദ്ധതികളില്‍ നിന്ന് ലോകവ്യാപകമായി സര്‍ക്കാരുകള്‍ പിന്‍വാങ്ങുന്ന കാലമാണിത്. അപ്പോഴാണ്, വൃദ്ധജീവിതങ്ങള്‍ക്ക് ജീവിതത്തിന്റെ അന്ത്യനാളുകളില്‍ പ്രതീക്ഷയുടെ ഇത്തിരി വെട്ടം പരത്തുന്ന ഇത്തരം പദ്ധതികളില്‍ മതവെറിയുടെ വെടിമരുന്നു നിറയ്ക്കാന്‍ വര്‍ഗീയഭ്രാന്തന്മാരുടെയും ഭ്രാന്തികളുടെയും പടയോട്ടം.

പാവം കര്‍ഷകത്തൊഴിലാളികളുടെ പേരിലാണ് കളളക്കണ്ണീരൊലിപ്പിക്കലെന്നത് വേറൊരു വിരോധാഭാസം. ഹൈന്ദവാധികാരം അതിന്റെ സമസ്തകരുത്തോടും കൂടി മദിച്ചു തിമിര്‍ത്ത കാലത്ത് പാടത്തും പറമ്പിലും പണിയെടുക്കുന്ന പുലയന്മാരോടും പറയന്മാരോടും സവര്‍ണ ജന്മിമാരുടെ സമീപനമെന്തായിരുന്നുവെന്നുംകൂടി ഇവര്‍ പ്രചരിപ്പിക്കുമോ ആവോ?

എത്ര പണിയെടുത്താലും വയര്‍ നിറയാത്ത തൊഴിലാളിയും ഒരു പണിയെടുത്തില്ലെങ്കിലും വയറും സമ്പത്തും വീര്‍ത്തു വരുന്ന മുതലാളിയും കേരളത്തില്‍ അതിവിദൂരമായ ഭൂതകാലത്തല്ല നിലനില്‍ക്കുന്നത്. പഞ്ചമരെന്ന് ചാപ്പകുത്തി സമൂഹത്തിന്റെ പിന്നാമ്പുറങ്ങളിലേയ്ക്ക് നടതളളിയിരുന്ന മനുഷ്യക്കോലങ്ങള്‍ അനുഭവിക്കേണ്ടി വന്ന സവര്‍ണാധികാരത്തിന്റെ നിഷ്ഠുരത അറിയാന്‍ ചരിത്രപുസ്തകങ്ങള്‍ ഒന്നോടിച്ചു നോക്കിയാല്‍ മതി. ഹീനമായ പീഡനങ്ങളുടെ നരകയാതനകള്‍ക്ക് വിധേയരായ പറയനെയും പുലയനെയുമൊക്കെ നിവര്‍ന്നു നില്‍ക്കാനും പൊതുനിരത്തിലിറങ്ങി നടക്കാനും,
ആരെടാ എന്നു ചോദിച്ചാല്‍ എന്തെടാ എന്ന് തിരിച്ചടിക്കാനും ശേഷിയുണ്ടാക്കിക്കൊടുത്തത് ഇടതുപക്ഷ പ്രസ്ഥാനങ്ങളാണെന്നും ചരിത്രം പറഞ്ഞു തരും.

അടിയും തൊഴിയുമേറ്റ് കണ്ണീരും വേദനയുമായി വിധിയെ പഴിച്ചും ദൈവത്തെ ശപിച്ചും ജീവിച്ചു തീര്‍ത്തവരെ പിടിച്ചെഴുന്നേല്‍പ്പിക്കാന്‍ ഒരു ഹിന്ദുമഹാസഭയെയും ആരും കണ്ടില്ല. അവര്‍ക്കു രക്ഷയായി ആര്‍ഷഭാരതത്തിന്റെ സനാതന പാരമ്പര്യത്തില്‍ നിന്നും പിറവിയെടുത്ത ഒരു മന്ത്രങ്ങളുമുണ്ടായിരുന്നില്ല. മഹാഭൂരിപക്ഷത്തെ ജീവിത നരകത്തില്‍ നിന്ന് മോചിപ്പിക്കാന്‍ ഒരു യാഗശാലയിലും ഹോമകുണ്ഡങ്ങള്‍ പുകഞ്ഞില്ല. ലോഹപുരുഷന്മാരുടെ ജീവിതഗാഥകളിലൊന്നും അധസ്ഥിതനു വഴി നടക്കാനും ആത്മാഭിമാനത്തോടെ ജീവിക്കാനും വേണ്ടി നടത്തിയ സമരകഥകളുടെ ഈരടികളില്ല.

ഉത്തര്‍പ്രദേശിലും മഹാരാഷ്ട്രയിലും മധ്യപ്രദേശിലുമൊക്കെ അമ്പലത്തില്‍ കയറിയതിനും പൊതുകിണറില്‍ നിന്ന് വെളളമെടുത്തതിനും ദളിതരെ അടിച്ചും വെടിവെച്ചും കൊന്നുതളളുമ്പോള്‍ അരുതെന്നു പറയാനും പ്രതിരോധത്തിന്റെ ഉരുക്കുവലകളൊരുക്കാനും സമയവും താല്‍പര്യവുമില്ലാത്ത ലോഹപുരുഷന്മാരാണ് ഹിന്ദുവിന്റെ ആത്മാഭിമാനം സംരക്ഷിക്കാന്‍ അത്യദ്ധ്വാനം ചെയ്യുന്നത്. സഹതപിക്കാം, നമുക്കവരോട്.

ഹിന്ദുക്ഷേത്രങ്ങളിലെ സമ്പത്തു മുഴുവന്‍ സര്‍ക്കാര്‍ തോന്നിയ പടി ചെലവിടുവെന്നൊരു പച്ചക്കള്ളവും കാലങ്ങളായി മുഴങ്ങിക്കേള്‍ക്കുന്നുണ്ട്. ട്രഷറിയില്‍ ഒരു പ്രത്യേക അക്കൗണ്ടില്‍ അടയ്ക്കുമെന്നല്ലാതെ ആ വരുമാനത്തിന്മേല്‍ സര്‍ക്കാരിന് അവകാശമൊന്നുമില്ല.

ഗുരുവായൂര്‍ ദേവസ്വത്തിന്റെ വകയായി ഏതാണ്ട് മുന്നൂറു കോടിയില്‍ പരം രൂപയാണ് സര്‍ക്കാര്‍ ഖജനാവിലുളളത്. അമ്പലത്തിന്റെ ആവശ്യങ്ങള്‍ക്കല്ലാതെ ഇതില്‍ നിന്നൊരു രൂപയും ചെലവിടാറില്ല. ഗുരൂവായൂരില്‍ ഉത്സവം പൊടിപൊടിക്കുമ്പോള്‍ എത്രകോടി രൂപ സര്‍ക്കാര്‍ ഖജനാവില്‍ നിന്ന് ചെലവിടേണ്ടി വരുമെന്നും ആലോചിച്ചു നോക്കണം. ആനയും മനുഷ്യനും മത്സരിച്ച് വൃത്തികേടാക്കുന്ന ഗുരുവായൂരിന്റെ ചൈതന്യം വീണ്ടെടുത്തു നല്‍കാന്‍ കൂലിക്കാരെ നിയോഗിക്കുന്നത് പോലും ഗുരുവായൂര്‍ മുനിസിപ്പാലിറ്റിയാണ്, ദേവസ്വം ബോര്‍ഡല്ല. ഉത്സവക്കാര്‍ വൃത്തികേടാക്കുന്ന തെരുവ് ശുദ്ധിയാക്കേണ്ട ജോലി സര്‍ക്കാരിന്.

ക്രമസമാധാനത്തിന് നിയോഗിക്കുന്ന പൊലീസുകാരുടെ ഭക്ഷണം, ഭക്തര്‍ക്ക് ഏര്‍പ്പെടുത്തുന്ന ആരോഗ്യ സേവനങ്ങള്‍, എന്തിന് മദം പൊട്ടാനിടയുളള ആനകളെ തളയ്ക്കാനെത്തുന്ന ആന സ്ക്വാഡു വരെ സര്‍ക്കാരിന്റെ ചെലവിലാണ് ഏര്‍പ്പെടുത്തുന്നത്.

ശബരിമലയിലും സമാനമായ സ്ഥിതിയാണ്. വമ്പന്‍ വരുമാനമുളള ഹൈന്ദവ ദേവാലയങ്ങളില്‍ ഉത്സവമഹാമഹം പൊടിപൊടിക്കുമ്പോള്‍ തദ്ദേശ സ്വയംഭരണ സ്ഥാപനങ്ങളടക്കമുളള സര്‍ക്കാര്‍ സ്ഥാപനങ്ങളില്‍ നിന്നും ചെലവിടുന്ന തുകയെത്രയെന്ന് അന്വേഷിച്ചുനോക്കുന്നത് നല്ലതാണ്. ശബരിമലയില്‍ കഠിനാധ്വാനം ചെയ്യുന്ന പൊലീസുകാര്‍ക്ക് ദാഹജലമോ ഒരു പാത്രം കഞ്ഞിയോ നല്‍കാന്‍ പോലും ഒരു ചില്ലിക്കാശും തിരുവിതാംകൂര്‍ ദേവസ്വം ബോര്‍ഡിന് ചെലവില്ല. ചെലവത്രയും പഞ്ചായത്തു മുതല്‍ മേലോട്ടുളള സ്ഥാപനങ്ങള്‍ക്ക്.

അമ്പലങ്ങളുടെ സ്വത്ത് സര്‍ക്കാര്‍ കൊണ്ടുപോകുന്നേയെന്ന നിലവിളിയുടെ പിന്നിലെന്ത് എന്നറിയണമെങ്കില്‍, പണ്ട് അമ്പലങ്ങളുടെ സമ്പത്ത് ഉപയോഗിച്ചതെന്തിനെന്നും ആര്‍ക്കായിരുന്നു അതിന്റെ ക്രയവിക്രയാധികാരമെന്നുമറിയണം. ആ ചരിത്രം ഇനിയൊരിക്കലെഴുതാം.

മദ്രസാ പെന്‍ഷന്റെ മറവില്‍ ഹീനമായ നുണപ്രചരണം നടക്കുമ്പോള്‍, അതിന്റെ സത്യാവസ്ഥയെന്ത് എന്നു മനസിലാക്കേണ്ടതുണ്ട്. ജനാധിപത്യ സര്‍ക്കാരുടെ കടമയാണ് ക്ഷേമ പദ്ധതികള്‍. ക്രൂരമായ മതഭ്രാന്തിന്റെ ശൂലമുനകള്‍ കൊണ്ട് ഇത്തരം പദ്ധതികളെ കീറിപ്പിളര്‍ക്കാന്‍ ശ്രമിക്കുന്നവരുടെ തനിനിറം വോട്ടു ചെയ്യാന്‍ പോകുന്ന ഓരോ പൗരനും മനസിലാക്കേണ്ടതുണ്ട്. അവശതയനുഭവിക്കുന്നവന് കൈത്താങ്ങു നല്‍കാന്‍ മനുഷ്യത്വമുളളവനേ കഴിയൂ... ഗര്‍ഭപാത്രം കുത്തിപ്പിളര്‍ന്ന് ഭ്രൂണം കുന്തത്തില്‍ കൊരുത്ത് ആര്‍ത്തുവിളിക്കുന്ന കോമരങ്ങള്‍ക്ക് ഈ ജന്മം മനസിലാകാത്ത വാക്കാണ്, മനുഷ്യത്വം എന്നത്.

തല്‍ക്കാലം അത്രമാത്രം.

51 comments:

മാരീചന്‍‍ said...

മദ്രസാ പെന്‍ഷന്റെ മറവില്‍ ഹീനമായ നുണപ്രചരണം നടക്കുമ്പോള്‍, അതിന്റെ സത്യാവസ്ഥയെന്ത് എന്നു മനസിലാക്കേണ്ടതുണ്ട്. ജനാധിപത്യ സര്‍ക്കാരുടെ കടമയാണ് ക്ഷേമ പദ്ധതികള്‍. ക്രൂരമായ മതഭ്രാന്തിന്റെ ശൂലമുനകള്‍ കൊണ്ട് ഇത്തരം പദ്ധതികളെ കീറിപ്പിളര്‍ക്കാന്‍ ശ്രമിക്കുന്നവരുടെ തനിനിറം വോട്ടു ചെയ്യാന്‍ പോകുന്ന ഓരോ പൗരനും മനസിലാക്കേണ്ടതുണ്ട്. അവശതയനുഭവിക്കുന്നവന് കൈത്താങ്ങു നല്‍കാന്‍ മനുഷ്യത്വമുളളവനേ കഴിയൂ... ഗര്‍ഭപാത്രം കുത്തിപ്പിളര്‍ന്ന് ഭ്രൂണം കുന്തത്തില്‍ കൊരുത്ത് ആര്‍ത്തുവിളിക്കുന്ന കോമരങ്ങള്‍ക്ക് ഈ ജന്മം മനസിലാകാത്ത വാക്കാണ്, മനുഷ്യത്വം എന്നത്.

തല്‍ക്കാലം അത്രമാത്രം.

Rajeeve Chelanat said...

ഗംഭീരമായി മാരീചാ...എല്‍.ഡി.എഫ് / പോസ്റ്റര്‍ ക്യാമ്പയിനുകളേക്കാളൊക്കെ ആവശ്യം ഇത്തരം correctioning-കള്‍ തന്നെയാണ്.

അഭിവാദ്യങ്ങളോടെ

ജയരാജന്‍ said...

നല്ല വിഷയം തന്നെ മാരീചൻ. ചിലരുടെ എങ്കിലും തെറ്റിദ്ധാരണ മാറാൻ സഹായകമാകട്ടെ ഈ ലേഖനം!

വര്‍ക്കേഴ്സ് ഫോറം said...

മാരീചൻ
വളരെ നല്ല കുറിപ്പ്
സമയോചിതം
അഭിനന്ദനങ്ങൾ
ഇതു കൂടി നോക്കുമല്ലോ?
http://workersforum.blogspot.com/2009/04/blog-post_13.html

അങ്കിള്‍ said...

നന്നായി ഇതെഴുതിയത്. നിയമം നടപ്പാക്കിയാല്‍ ഉടന്‍ 4000 രൂപ മാസ പെന്‍ഷന്‍ കിട്ടി തുടങ്ങും എന്നാണ് പലരും മനസ്സിലാക്കിയതെന്നു തോന്നുന്നു. അങ്ങനെയുള്ളവരുടെ സംശയം ഈ പോസ്റ്റോടെ മാറിക്കിട്ടേണ്ടതാണ്, തീര്‍ച്ച.

മതേതര രാജ്യമായ ഇന്‍ഡ്യയില്‍, മദ്രസ്സാ പെന്‍ഷനര്‍ഹരാകാന്‍ ചെയ്യേണ്ട ജോലിയെന്താണെന്നു കൂടി പോസ്റ്റില്‍ ഉള്‍പ്പെടുത്തണമായിരുന്നു.

സവര്‍ണ്ണര്‍ കാണിച്ചു കൂട്ടിയ വിക്രിയകള്‍ മറ്റുള്ളവര്‍ക്കറിയില്ലെങ്കിലും ബ്ലോഗ് വായനക്കാര്‍ക്ക് കാണാപാഠമാണെന്നാണ് എന്റെ പക്ഷം.

നാളെ വോട്ടു ചെയ്യേണ്ട ദിവസമല്ലേ. ഇന്നു തന്നെ ഇതെല്ലാം ഓര്‍മ്മപ്പെടുത്തിയത് നന്നായി.

വാഴക്കോടന്‍ ‍// vazhakodan said...

ഞാനടക്കമുള്ളവര്‍ ഒരു പക്ഷെ ഈ വിഷയം തെറ്റായാണ് ധരിച്ചിരുന്നത്. സത്യാവസ്ഥ മനസ്സിലാക്കാന്‍ കഴിഞ്ഞതില്‍ സന്തോഷം! ഇപ്പോഴും ആള്‍ക്കൂട്ടങ്ങള്‍ വിളിച്ചു പറയുന്നത് മാത്രമാണ് സത്യം എന്ന് വിശ്വസിക്കുന്നവര്‍ക്ക് ഇതൊരു പാഠം ആവട്ടെ! അഭിവാദ്യങ്ങള്‍..

Rafeek Wadakanchery said...

മാരീചന്‍ ..
സത്യാവസ്ഥ ഇതാണല്ലേ...
നന്ദി..
ആ‍ ജീവിതങ്ങള്‍ എങ്ങനെ കഴിയുന്നു എന്നു പോലും നോക്കാതെ വാളെടുത്തവര്‍ക്ക് ചുട്ടമറുപടി ആവട്ടെ ഈ പോസ്റ്റ്.

Radheyan said...

കൃത്യം,ലക്ഷ്യഭേദി...

ഇത് ഒളിയമ്പല്ല, നല്ല പോരാളിയുടെ നേരമ്പ്.തടുക്കാവുന്നവര്‍ തടുക്കട്ടെ...

സിമി said...

മാരീചാ, നല്ല ലേഖനം.

“ഭ്രൂണമെടുത്ത് ശൂലത്തില്‍ കൊരുത്തു“ എന്നതൊക്കെ നിറം പിടിപ്പിച്ച കഥകളാണ്. ഇത് ഒന്നു നോക്കൂ.

ബി.ജെ.പി. / സംഘ പരിവാറിന്റെ അജണ്ട / ഹിഡന്‍ അജന്‍ഡയില്‍ സംശയമില്ല.

കേരളത്തില്‍ അവര്‍ണ്ണന് നിവര്‍ന്നുനില്‍ക്കാനുള്ള കരുത്തുണ്ടാക്കിക്കൊടുത്തത് ഇടതുപക്ഷമാണെന്ന് പറയുന്നത് ചരിത്രത്തെ വളച്ചൊടിക്കലാവും.

ശ്രീനാരായണഗുരുവോ അയ്യങ്കാളിയോ ചട്ടമ്പിസ്വാമിയോ ഇടതുപക്ഷത്തിന്റെ ലേബലിലല്ല തങ്ങളുടെ സമരങ്ങള്‍ നയിച്ചത്.

വൈക്കം, ഗുരുവായൂര്‍ സത്യാഗ്രഹങ്ങള്‍ ഇടതുപക്ഷത്തിന്റെ ലേബലിലല്ല. ഗുരുവായൂര്‍ സത്യാഗ്രഹം തുടങ്ങിയത് കേരള പ്രോവിന്‍ഷ്യല്‍ കോണ്‍ഗ്രസ് കമ്മിറ്റിയാണ്.

കമ്യൂണിസ്റ്റ് പ്രസ്ഥാനങ്ങളുടെ കര്‍ഷക സമരങ്ങളുടെ പ്രസക്തി കുറച്ചുകാണുന്നില്ല. അവയും പ്രധാനമാണ്, എന്നാല്‍ കേരളത്തിലെ സോഷ്യല്‍ റെവൊല്യൂഷന്റെ പിതൃത്വം കമ്യൂണിസ്റ്റ് പ്രസ്ഥാനത്തിന്റെ തലയില്‍ മാത്രം വെച്ചുകെട്ടുന്നത് ചരിത്രത്തെ വളച്ചൊടിക്കലാണ്.


ലേഖനത്തെയോ ചര്‍ച്ചകളെയോ വഴിതെറ്റിക്കണം എന്ന് ആഗ്രഹമില്ല. ലേഖനത്തില്‍ പറഞ്ഞ കാര്യങ്ങള്‍ പ്രസക്തമാണ്, ബി.ജെ.പി / സംഘ പരിവാര്‍ സംഘടനകള്‍ വിഷം ചീറ്റുമ്പോഴൊക്കെ ഇതുപോലെ പത്തിക്കടിക്കേണ്ടതാണ്.

Baiju Elikkattoor said...

thanks

കിരണ്‍ തോമസ് തോമ്പില്‍ said...

അങ്കിളിന്റെ കമന്റിലെ ഈ ഭാഗം പ്രത്യേകം ശ്രദ്ധിക്കുക .
മതേതര രാജ്യമായ ഇന്‍ഡ്യയില്‍, മദ്രസ്സാ പെന്‍ഷനര്‍ഹരാകാന്‍ ചെയ്യേണ്ട ജോലിയെന്താണെന്നു കൂടി പോസ്റ്റില്‍ ഉള്‍പ്പെടുത്തണമായിരുന്നു.

കിരണ്‍ തോമസ് തോമ്പില്‍ said...

tracking

nalan::നളന്‍ said...

tracking..

myvision said...

യോജിക്കുന്നു. പരിപൂര്‍ണമായും.

സി. കെ. ബാബു said...

ഇത്തരം ലേഖനങ്ങളാണു് ആവശ്യം. കാര്യങ്ങളെ വസ്തുനിഷ്ഠമായി മനസ്സിലാക്കാൻ മനുഷ്യർക്കു് കഴിഞ്ഞിരുന്നെങ്കിൽ കാപട്യത്തെയും ചൂഷണത്തേയും പൊതിയുന്ന പല വിശുദ്ധളോഹകളും അവർ കീറിയെറിഞ്ഞേനെ!

സുനിൽ കൃഷ്ണൻ(Sunil Krishnan) said...

മാ‍രീചാ,

സമയോജിതമായ നല്ല പോസ്റ്റ്.എന്തെല്ലാം പ്രചാരണങ്ങളാണു നടക്കുന്നത്..കഷ്ടമെന്ന് പറയട്ടെ, നമ്മുടെ മുഖ്യധാരാ മാദ്ധ്യമങ്ങളൊന്നും തന്നെ ഇത്തരം വിഷയങ്ങളുടെ യാഥാർത്ഥ്യം എന്തെന്ന് അറിയിയ്ക്ലാൻ തെല്ലും മെനക്കെടുന്നില്ല.

അനില്‍@ബ്ലോഗ് said...

കുറിപ്പിനു നന്ദി

ബിനോയ് said...

മാരീചന്‍ വളരെ നല്ല ലേഖനം. മദ്രസാ പെന്‍ഷന്‍ പദ്ധതിയുടെ നിജസ്ഥിതി എനിക്കും അറിവുണ്ടായിരുന്നില്ല. അതു ജനത്തെ ബോദ്ധ്യപ്പെടുത്തുന്നതില്‍ ഗവണ്മെന്റിന്റെ ഭാഗത്തുനിന്ന് മനപ്പൂര്‍‌വ്വമായ ഒരലംഭാവം ഉണ്ടായോ എന്നു സംശയം. എന്തായാലും കൃത്യമായ വസ്തകള്‍ വരച്ചുകാട്ടിയതിന് അഭിനന്ദനങ്ങള്‍. വര്‍ഗ്ഗീയവാദികള്‍ മനുഷ്യമനസ്സുകളില്‍ വാരിവിതറുന്ന വിഷവിത്തുകള്‍ മുളക്കും‌മുന്‍പേ കരിച്ചു കളയാന്‍ ഇത്തരം ഉദ്യമങ്ങളാണ് നാടിന്നാവശ്യം.

ബിനോയ് said...

Sorry.. tracking

suraj::സൂരജ് said...

ആശംസകള്‍ മാരീചരേ!
ഇലക്ഷന്‍ കാലത്ത് ഇത്തിരിക്കൂടെ നേരത്തേ വേണ്ടിയിരുന്നു ഈ പോസ്റ്റെന്ന് തോന്നി. ഏതായാലും ബെറ്റര്‍ ലേയ്റ്റ് ദാന്‍ നെവര്‍ . അമ്പലത്തിന്റെ വരുമാനമെടുത്ത് അഹിന്ദുക്കള്‍ക്ക് കൊടുത്തേ എന്ന ശശികലമാരുടെ നെലവിളിക്ക് ഇതുകൊണ്ടൊന്നും ശമനമാവില്ല. “കൂസിസ്റ്റ് പ്രീണന”ങ്ങളുടെ പുതിയ പുതിയ നമ്പരുകള്‍ അവരു തപ്പിയെടുത്തോണ്ടു വന്നോളും.

* *

കിരണ്‍ ജി ഹൈലൈറ്റ് ചെയ്ത അങ്കിളിന്റെ ചോദ്യം കൊള്ളാം. മാരീചരു വിശദീകരിക്കുമെന്ന് കരുതുന്നു.

കരമടയ്ക്കുന്ന അഹിന്ദുവിന്റെകൂടി പൈസയെടുത്താണല്ലോ ദേവസ്വം അമ്പലങ്ങളില്‍ ഓതിക്കന്‍, മേല്‍ശാന്തി,കീഴ്ശാന്തി മുതല്‍ കഴകക്കാരെയും പാപ്പാനെയും വരെ സര്‍ക്കാര്‍ ശമ്പളത്തില്‍ പോറ്റുന്നത്. തിരുവിതാങ്കൂറ് ദേവസ്വം ഭരണത്തില്‍ മാത്രം 1200നടുത്ത് ക്ഷേത്രങ്ങളുണ്ട്. 25 സ്കൂളുകള്, നാലു കോളെജുകള്, വൈക്കത്തെ ക്ഷേത്രകലകള്‍ക്കായി അക്കാഡമി, ഗുരുവായൂര്‍ ദേവസ്വത്തിന്റെ സ്ഥാപനങ്ങളു വേറെ - സര്‍ക്കാര്‍ ശമ്പളത്തിലും കരം കൊടുക്കുന്നവന്റെ ചെലവിലും അങ്ങനെ എന്തെല്ലാം. ആ വകുപ്പില്‍ നോക്കിയാല്‍ മദ്രസാധ്യാപകര്‍ക്കു മാത്രമല്ല, പള്ളീലച്ചന്മാര്‍ക്കും കപ്യാര്‍മാര്‍ക്കും മൌലവിമാര്‍ക്കും ബാങ്കുവിളിക്കുന്നവര്‍ക്കുമടക്കം സര്‍ക്കാര്‍ പണത്തിനര്‍ഹതയില്ലേ ?

suraj::സൂരജ് said...
This comment has been removed by the author.
അങ്കിള്‍ said...

എല്ലാരും പോസ്റ്റ് മാത്രം വായിച്ച് കമന്റുന്നു. പക്ഷേ കിരണ്‍ എന്തു കൊണ്ടോ കമന്റും കൂടെ വായിച്ച് പ്രതികരിക്കുന്നു. സ്വന്തം അഭിപ്രായമാണെങ്കിലും ഒരു വടിയെടുത്ത് മാരീചന്റെ കയ്യില്‍ കൊടുക്കാന്‍ ശ്രമിക്കുന്നു :), നടക്കട്ടെ.

ഇനി മാരീചന്റെ വിശദീകരണം വേണ്ട, സൂരജേ. സൂരജിന്റെ ഉള്ളില്‍ നിന്നു തന്നെ ആ വിശദീകരണം പുറത്തു ചാടി: “ആ വകുപ്പില്‍ നോക്കിയാല്‍ മദ്രസാധ്യാപകര്‍ക്കു മാത്രമല്ല, പള്ളീലച്ചന്മാര്‍ക്കും കപ്യാര്‍മാര്‍ക്കും മൌലവിമാര്‍ക്കും ബാങ്കുവിളിക്കുന്നവര്‍ക്കുമടക്കം സര്‍ക്കാര്‍ പണത്തിനര്‍ഹതയില്ലേ ?“

ഹു :: Hu said...
This comment has been removed by the author.
ഹു :: Hu said...

tracking

reghu said...

മദ്രസ അധ്യാപകര്‍ക്കുള്ള പെന്‍ഷന്‍ പദ്ധതിയെ പറ്റി എഴിതിയത് സ്വാഗതാര്‍ഹം തന്നെ. മിക്കവാറും എല്ലാ മുസ്ലിം പള്ളികളും സാമ്പത്തികമായി ദുരിതത്തിലാണ് . അതുകൊണ്ട് തന്നെ സാമ്പത്തിക പരാധീനത കൊണ്ട് നരക യാതന അനുഭവിക്കുന്ന മദ്രസ അധ്യാപകര്‍ക്ക് 65 വയസിനു ശേഷം ഒരു പെന്‍ഷന്‍ അനുവദിച്ചാല്‍ അത് ചോദ്യം ചെയ്യപ്പെടേണ്ട കാര്യം ഇല്ല. ഈ സൊദ്ദെശപരമയ പദ്ധതിയെ അപലപിക്കുന്ന ഹിന്ദു നിലപാട് തീര്‍ത്തും ലജ്ജാകരം തന്നെ.

കേരളത്തിലെ പിന്നോക്ക ഹൈന്ദവരുടെ ഉദഹരണം മൊത്തത്തില്‍ അങ്ങ് കമ്മുനിസ്ടുകാര്‍ക്ക് ചാര്‍ത്തി കൊടുത്തതിനോടെ യോജിപ്പില്ല .. മാത്രമല്ല അത് വസ്തുത പരമായി തെറ്റാണു . ക്രിസ്തു മത ഛെദനമെന്ന പുസ്തകം എഴിതി ക്രിസ്ത്യന്‍ പാതിരി മാരുടെ മത പരിവര്‍തനതിനെതിരെ പ്രവര്‍ത്തിച്ച ചട്ടമ്പി സ്വാമികളെയും, നാരായണ ഗുരു സ്വാമി അയ്യന്‍കാളി യെയും ഒക്കെ വിസ്മരിക്കുന്നതിന് തുല്യം ആണ് മാരീച്ചരുടെ അവകാശവാദം. ഇവരെ ഒക്കെ കഴിഞേ കമ്മ്യൂണിസ്റ്റു പാര്‍ടിക്ക് അതില്‍ സ്ഥാനം ഉള്ളു ഹിന്ദു സന്ഘടനകളുടെ ഭാഷയില്‍ പറഞ്ഞാല്‍.." ഹിന്ദു മതത്തിലെ അനാചാരങ്ങള്‍ മാറ്റിയത് ഹിന്ദുക്കളുടെ നേതൃത്വത്തില്‍ തന്നെ ആണ്". ഇതില്‍ കുറെ സത്യം ഇല്ലേ ?.

പിന്നെ എല്ലാ മതത്തിലും പലപ്പോളായി ഉച്ച നീചത്വങ്ങള്‍ ഉണ്ടായിട്ടുണ്ട്. ഹിട്ലെര്‍ genocide നടത്തിയപ്പോള്‍ വത്തിക്കാന്‍ പ്രതികരിച്ചില്ല എന്നും, ക്രിസ്തവ പുരോഹിതന്മാരുടെ പീടനങ്ങളും , അതിനു നൂറ്റാണ്ടുകള്‍ക്കു ശേഷം ജോണ്‍ പൌള്‍ രണ്ടാമന്‍ മാപ്പ് പറഞ്ഞതും ഒക്കെ നമ്മുടെ മുന്‍പില്‍ ഉണ്ട് . അതുകൊണ്ട് ഒരു ഭൂതകാലത്തെ നോക്കിക്കൊണ്ട്‌ ഒരു മതത്തെയും അപമാനിക്കരുത് . വേറൊരു രീതിയില്‍ പറഞ്ഞാല്‍ , ലോകത്തിലെ ഒട്ടു മിക്ക മതത്തിനും അച്ചരപരം എന്നും ആത്മീയം എന്നും രണ്ടു വഴികള്‍ അല്ലെങ്ങില്‍ ഭാഗങ്ങള്‍ ഉണ്ട് . ആദ്ധ്യാത്മിക വഴിയില്‍ യാതൊരു ഉച്ച നീചത്വങ്ങളും ഇല്ല. അതുകൊണ്ട് തന്നെ ആണ് മനു സ്മൃതി പോലുള്ള ആശയങ്ങള്‍ക്ക് ആയുസില്ലാതെ പോയത് .

പിന്നെ ശബരിമല / ഗുരുവായൂര്‍ ക്ഷേത്രത്തെ ഒക്കെ പറഞ്ഞത് പൂര്‍ണമായും തെറ്റാണു . മൂന്നു വര്ഷം മുന്‍പത്തെ കണക്കു അനുസരിച്ച് സബരി മലയില്‍ 1500 പോലീസ് കാരെ അനുവദിക്കുന്നതിന് സര്കാരിനു ദേവസ്വം 70 ലക്ഷം രൂപ അടക്കണം. ശുചീകരണത്തിനായി 20 ലക്ഷം വേറെയും സര്കാരിലേക്ക് അടക്കണം . അതുപോലെ തന്നെ ആരോഗ്യവകുപിലേക്കും ലക്ഷങ്ങള്‍ അടച്ചിട്ടു തന്നെ ആണ് അവിടെ ഡിസ്പെന്സരികള്‍ പ്രവര്‍ത്തിക്കുന്നത് . വൈദ്യുതി യുണിറ്റ് ഒന്നിന് 17 രൂപ ആണ് ദേവസ്വം ബോര്‍ഡില്‍ നിന്നും KSEB ഈടാക്കുന്നത് . ( സാധാരണ വ്യാവസായിക നിരക്ക് 4 രൂപ ഇരിക്കെ ആണ് ഈ കൊള്ള ( 3 കൊല്ലം മുന്‍പത്തെ കണക്കാണ് ).

രേഖകള്‍ പ്രകാരം അയ്യപ്പന് അവകാശപെട്ടതാണ് 18 പൂമ്കാവനം. പക്ഷെ അത് ബ്രിടിഷു കാരുടെ കാലം മുതല്കെ സര്‍കാരിന്റെ കൈവശം ആണ്. നിലക്കലില് കുറച്ചു പാര്‍ക്കിംഗ് സ്ഥലം അനുവദിച്ചു കിട്ടിയതിന്റെ യാധാര്ധ്യം മാരീച്ചനരിയുമോ ?. ദേവസ്വം ചോദിച്ചത് പമ്പയില്‍. സര്‍ക്കാര്‍ അനുവദിച്ചത് നിലക്കലില്. അതിനു ഇടുക്കിയിലെ കമ്പം മേട്ടില്‍ തത്തുല്യമായ സ്ഥലം ദേവസ്വം വില കൊടുത്തു വാങ്ങി സര്കാരിനു കൊടുക്കേണ്ടി വന്നു. മാത്രമോ , നിലക്കളിലെ സ്ഥലം വനഭുമി ആണ് , അത് വെട്ടി നശിപ്പിച്ചതിന് നഷ്ട പരിഹാരം ആയി 7 കോടി രൂപ സര്കാരിലേക്ക് അടക്കെണ്ടാതയും വന്നു. രേഖകളില്‍ മാത്രമേ അത് വന ഭുമി ആയിരുന്നുള്ളു ,. യഥാര്‍ഥത്തില്‍ അത് state farming corporation വക റബ്ബര്‍ / കരിമ്പ്‌ എസ്റ്റേറ്റ്‌ ആയിരുന്നു . എന്തിനേറെ പറയുന്നു, KSRTC പോലും 30 % അധികം മേടിച്ചാണ് സര്‍വീസ് നടത്തിയത് . അതുകൊണ്ട് സര്‍ക്കാര്‍ നികുതി കാശു കോടി കണക്കിന് രൂപ ശബരി മലയില്‍ ഹിന്ദുക്കള്‍ക്ക് ഒലത്തി തരുന്നു എന്നൊന്നും പറയേണ്ട . യാതൊരു സൌജന്യവും അവിടെ ഇല്ല. എല്ലാം ഹൈടവരുടെ പണം തന്നെ ആണ്

നേരെ മരിച്ചു , ബീമ പള്ളിയിലും , മലയാറ്റൂരും ഒക്കെ പോലീസ് സേവനം തികച്ചും സൌജന്യം ആണ് ...പള്ളികള്‍ ഒരു നയ പൈസയും സര്കാരിലേക്ക് അടക്കുന്നില്ല ..അറിയുന്നൂ മരീച്ചരെ ?.

ഇനി വേറൊരു സ്ഥലം അനുവദിക്കല്‍ കഥ പറയാം . അത് നിലക്കല്‍ പള്ളി പ്രശനത്തില്‍ ആണ്. നിലക്കല്‍ പ്രശനം പരിഹരിക്കാന്‍ വേണ്ടി ആങ്ങാം കുഴി എന്നാ സ്ഥലത്ത് 15 ആക്കര്‍ വനഭുമി ആണ് തികച്ചും സൌജന്യമായി പള്ളി പണിയാന്‍ സഭക്ക് അനുവദിച്ചു കൊടുത്തത് .
മലയാറ്റൊര്‍ പള്ളി ഇരിക്കുന്ന 25 ഹെക്ടെര് , ഹെക്റെര്‍ ഒന്നിന് 125 രൂപ പാട്ടത്തിനാണ് സര്‍ക്കാര്‍ കൊടുത്തിരിക്കുന്നത്‌ . ...അതെന്താ സബരി മലയില്‍ പാട്ടത്തിന് കൊടുത്താല്‍ ദേവസ്വം വേണ്ട എന്ന് പറയുമായിരുന്നോ ?. ക്രിസ്ത്തവര്‍ നിലക്കല്‍ പള്ളി പ്രശനം ഉണ്ടാക്കിയിട്ട് അതൊരു തീര്‍ഥാടന കേന്ദ്രം ആയോ ?. അത് വേറെ ചര്‍ച്ച ചെയ്യേണ്ട വിഷയം ആണ് . വിടുന്നു ..

ഇനിയും സര്‍ക്കാര്‍ സൌജന്യങ്ങളുടെ ഒരുപാട് യാധാര്ധ്യങ്ങള്‍ ഉണ്ട് ... വേണേല്‍ ഇനിയും ഉദാഹരണം തരാം.

ഗുരുവായൂര്‍ പോലുള്ള ഉല്‍സവ സ്ഥലങ്ങളിലെ മല മൂത്ര നിര്‍മാര്‍ജനം ഒക്കെ മാരീചന്‍ സര്‍ക്കാര്‍ ചിലവില്‍ ആക്കുന്നത് കണ്ടു. കേരളത്തില്‍ ഹിന്ദുക്കള്‍ മാത്രം ആണോ ഉല്‍സവം നടത്തുന്നത് . മലയാറ്റൂരും , പവരതി പള്ളിയിലും , ബീമാപല്ലിയിലും , ജുമാ മസ്ജിതിലും ഒക്കെ നടത്തുന്ന ഉള്സവങ്ങള്‍ക്ക് ശേഷം മല മൂത്ര നിര്‍മാര്‍ജനം ആരാണ് നടത്തുന്നത് ?. അതിനു പള്ളികള്‍ സര്കാരിലേക്ക് കാശ് കൊടുക്കുന്നുണ്ടോ ?. അതോ അവിടെ മാലിന്യങ്ങള്‍ ഒന്നും ഉണ്ടാകുന്നില്ലേ ?. ഒരു പള്ളിയും ഒരു നയ പൈസയും സര്കാരിലേക്ക് അടക്കുന്നില്ല കേട്ടോ .

കന്തപുറത്തു ചെന്ന് സഖാവ് പിണറായി കമ്മുനിസ്ടുകാര്‍ മുസ്ലിന്‍ സമുഹത്തിന് ചെയ്ത കാര്യങ്ങള്‍ അക്കമിട്ടു നിരതിയില്ലേ?. മലപ്പുറത്ത്‌ പൊന്നാനിയിലും ഇത് പറഞ്ഞു വോട്ട് പിടിക്കുന്നില്ലേ. .. ഒരു കാര്യം മനസിലാക്കുക , ദേവസ്വത്തില്‍ വരുന്ന മുഴിവന്‍ പൈസയും ഹിന്ദുക്കള്‍ മാത്രം കൊടുക്കുന്നതാണ് ... അതില്‍ എത്ര തുക ഹിന്ദുക്കളുടെ ഉന്നമനത്തിനായി ചിലവാകി എന്ന് പറയാന്‍ ഭരിക്കുന്നവര്‍ക്ക് ആര്‍ജവം ഉണ്ടോ ?. അതിനു ആദ്യം ദേവസ്വം ബോര്‍ഡ് നന്നാവണം. മഹാന്മാരായ ആളുകളുടെ മരു മക്കള്‍ വന്നതുകൊണ്ടായില..... ആകെ കേള്‍ക്കുന്ന കണക്കു നഷ്ടത്തില്‍ ഓടുന്ന ദേവസ്വം വക ക്ഷേത്രങ്ങളിലെ ആണ്.

കാവലാന്‍ said...

"മദ്രസ അധ്യാപകനും അയാള്‍ പണിയെടുക്കുന്ന സ്ഥാപനവും പ്രതിമാസം 50 രൂപ വീതം ക്ഷേമനിധി ബോര്‍ഡില്‍ അടയ്ക്കുന്നു. ഈ തുകയാണ് പിന്നീട് പെന്‍ഷനായി നല്‍കുന്നത്. പെന്‍ഷന്
അര്‍ഹത നേടാന്‍ പത്തു വര്‍ഷം ജോലി പൂര്‍ത്തിയാക്കണം (1200x10= 12000.പത്തു വര്‍ഷത്തിനു ശേഷം മദ്രസ്സാദ്ധ്യാപനം നിര്‍ത്തി മറ്റു ജോലികള്‍ക്ക് പോകുന്ന ഒരാള്‍ക്ക് മുഴുവന്‍ പെന്‍ഷന്‍ ആനുകൂല്യം ലഭിക്കുമോ?) 65 വയസുവരെ ഒരാള്‍ക്ക് തൊഴിലില്‍ തുടരാം.

20വയസു പ്രായത്തില്‍ മദ്രസയില്‍ പഠിപ്പിക്കാന്‍ കയറുന്ന ഒരാള്‍ (അദ്ധേഹത്തിന് മദ്രസ്സാദ്ധ്യാപനത്തോടൊപ്പം മറ്റെന്തെങ്കിലും തൊഴിലിലോ കച്ചവടത്തിലോ ഏര്‍പ്പെടാനാകുമോ?) 65 വയസില്‍ വിരമിക്കുമ്പോള്‍, അയാളും അയാളുടെ മദ്രസയും 45 വര്‍ഷം അടയ്ക്കുന്ന തുക(1200x45=54000)യില്‍ നിന്ന് ലഭിക്കാവുന്ന പരമാവധി പെന്‍ഷന്‍ തുകയാണ് 4000 രൂപ. അതായത് ഈ ക്ഷേമനിധി നിലവില്‍ വരുന്നത് 2009ലാണ് എന്നിരിക്കട്ടെ.(മുന്‍കാല പ്രാബല്യത്തോടെ നിലവില്‍ വരുത്താന്‍ കഴിയുമോ?) ഈ വര്‍ഷം 20 വയസില്‍ മദ്രസാ അധ്യാപകനായി തൊഴിലില്‍ പ്രവേശിക്കുന്ന വ്യക്തി 45 വര്‍ഷം ആ തൊഴില്‍ ചെയ്ത് തന്റെ 65 -ാം വയസില്‍ വിരമിക്കുമ്പോള്‍ 4000 രൂപയോളം പ്രതിമാസം പെന്‍ഷന്‍ ലഭിക്കാന്‍ അര്‍ഹനാകും. അയാള്‍ക്ക് ഈ പെന്‍ഷന്‍ കിട്ടുന്ന കാലം 2009 അധികം 45 സമം 2054.

മദ്രസ്സാ പെന്‍ഷന്‍ ഷേമ നിധിയിലേക്ക് പണം പറ്റുന്നതു വഴി സര്‍ക്കാരിന് മദ്രസ്സയുടെ പ്രവര്‍ത്തനങ്ങളില്‍ എന്തെങ്കിലും തരത്തിലുള്ള നിയന്ത്രണങ്ങളോ നിബന്ധനകളോ കൊണ്ടുവരാന്‍ കഴിയുമോ?

JareeN/NeeraJ said...

ബഹു മാന്യനെ, നെറികെട്ട ഹൈന്ദവ മതഭ്രാന്തന്‍മാരെ ചൂണ്ടിക്കാട്ടി, അവരുടെ വിവരംകെട്ട "ഞ്യായ"ങ്ങള്‍ക്കുള്ള മറുപടിയുണ്ടാക്കി വോട്ടുണ്ടാക്കാനാണോ ഈ "വെളിയമ്പ്‌" ?(കഴിഞ്ഞ അദ്ധ്യയന വര്‍ഷം ന്യൂനപക്ഷ വിദ്യാര്‍ത്ഥികള്‍ക്കുള്ള കേന്ദ്ര സര്‍ക്കാറിന്റെ സ്റ്റൈപ്പന്റിന്റെ ഗതി കെടുത്തി കളഞ്ഞ കഥ മറു ചോദ്യമായി വന്നേക്കാം, അപ്പോള്‍ ഓടിക്കോ മാരീചാ....) അതെ അടിമകളികളില്‍ ചിലരുടെ കമന്റും അങ്ങിനെ പറയുന്നു, നേരത്തേയാവാമായിരുന്നു, ഫ്‌ളക്‌സ്‌ ബോര്‍ഡില്‍ അടിച്ച്‌ തെരുവോരത്ത്‌ ആവാമായിരുന്നു....... സത്യത്തില്‍ കഷ്ടപ്പെടുന്നവനോടുള്ള കാരുണ്യമാണോ വോട്ടാണോ മുഖ്യം. എന്തിനാ സഖാവെ മുഖം മൂടി.

ക്ഷേമനിധികളെക്കുറിച്ച്‌ ഏറെക്കുറെ അറിവുള്ളവരാണ്‌ മലയാളി, എന്നാല്‍ ക്ഷേമനിധിയേ സര്‍ക്കാര്‍ പെന്‍ഷന്‍ എന്ന രീതിയില്‍ പ്രചരിച്ചിച്ചത്‌ സര്‍്‌ക്കാറു തന്നെല്ലെ ? (സര്‍ക്കാര്‍ പെന്‍ഷനുകളില്‍ (മിച്ചമൂല്യവിതരണം) നിന്നും പിന്നോക്കം പോവുകയും "സംഭാവനാനിധികള്‍" നിര്‍മ്മിച്ചെടുക്കുകയും ചെയ്‌ത സമീപനം ഏതു ഭാഗത്തു നിന്നാണ്‌ ഉടലെടുത്തു വന്നത്‌ ? മാര്‍ക്‌സിസത്തില്‍ നിന്നല്ലല്ലൊ. ഇരുപത്തി നാലും മണിക്കുറൂം എതിര്‍ക്കുന്ന മുതലാളിത്ത സമീപനമല്ലേ അതും ? സര്‍ക്കാര്‍ സര്‍വ്വീസിലിരിക്കുന്നവര്‍ക്കും ക്രമേണ അങ്ങിനെ വന്നാല്‍ പേനയുന്തി സഖാക്കള്‍ എന്തു ചെയ്യുമോ ആവോ ? പിന്നെ സ്വാഭാവികമായും കൂടുതല്‍ വിഹിതം കിട്ടാന്‍ സ്റ്റോക്‌ മാര്‍ക്കറ്റില്‍ നിക്ഷേപിക്കാം എന്ന അഭിപ്രായം പോലും കാലക്രമേണെ സഖാക്കള്‍ തന്നെ പറയും. നോക്കിക്കോ.

JareeN/NeeraJ said...

കാവലാന്റെ കമന്റിപ്പോഴാ കാണുന്നത്‌.
അമേരിക്കയെ ഏറെ ഭയപ്പെടുത്തിയത്‌ മദ്രസ്സകളായിരുന്നുവത്രെ. ഭീകരവാദികളെ നിര്‍മ്മിക്കുന്ന കേന്ദ്രങ്ങളാണ്‌ മദ്രസ്സകള്‍ എന്നായിരുന്നു അവരുടെ കണ്ടെത്തലുകള്‍. അങ്ങിനെയുള്ള ദുരൂഹതകളൊക്കെ ഇല്ലാതാക്കാന്‍ ലോകം മുഴുവന്‍ മദ്രസ്സകള്‍ക്ക്‌ രജിസ്‌്‌ട്രേഷനും മറ്റും നടപ്പാ്‌ക്കി കൊണ്ടിരുന്നു. അതിന്റെയൊക്കെ ഭാഗം തന്നെയാണ്‌ ഇതും. ഒരു തരം വെളിവാക്കലുകള്‍. റിപ്പോര്‍ട്ടുകള്‍ അപ്പപ്പോള്‍ വേണ്ടവരുടെ അടുത്തെത്തിക്കോളും.

പിന്നെ നമ്മുടെ അഭിനവ ഇടതുപക്ഷത്തിന്‌ രണ്ടു പക്ഷത്തും തീ കൊടുത്ത്‌ നടുക്കു പിടിക്കാന്‍ സാമര്‍ത്ഥ്യം ഏറെയുണ്ടല്ലൊ.

JareeN/NeeraJ said...

കാവലാന്റെ കമന്റിപ്പോഴാ കാണുന്നത്‌.
അമേരിക്കയെ ഏറെ ഭയപ്പെടുത്തിയത്‌ മദ്രസ്സകളായിരുന്നുവത്രെ. ഭീകരവാദികളെ നിര്‍മ്മിക്കുന്ന കേന്ദ്രങ്ങളാണ്‌ മദ്രസ്സകള്‍ എന്നായിരുന്നു അവരുടെ കണ്ടെത്തലുകള്‍. അങ്ങിനെയുള്ള ദുരൂഹതകളൊക്കെ ഇല്ലാതാക്കാന്‍ ലോകം മുഴുവന്‍ മദ്രസ്സകള്‍ക്ക്‌ രജിസ്‌്‌ട്രേഷനും മറ്റും നടപ്പാ്‌ക്കി കൊണ്ടിരുന്നു. അതിന്റെയൊക്കെ ഭാഗം തന്നെയാണ്‌ ഇതും. ഒരു തരം വെളിവാക്കലുകള്‍. റിപ്പോര്‍ട്ടുകള്‍ അപ്പപ്പോള്‍ വേണ്ടവരുടെ അടുത്തെത്തിക്കോളും.

പിന്നെ നമ്മുടെ അഭിനവ ഇടതുപക്ഷത്തിന്‌ രണ്ടു പക്ഷത്തും തീ കൊടുത്ത്‌ നടുക്കു പിടിക്കാന്‍ സാമര്‍ത്ഥ്യം ഏറെയുണ്ടല്ലൊ.

കാസിം തങ്ങള്‍ said...

തറ്റിദ്ധാരണങ്ങള്‍ നീങ്ങട്ടെ.

അങ്കിള്‍ said...

വീണ്ടും വരാതിരിക്കാന്‍ കഴിയുന്നില്ല.

യഥാര്‍ത്ഥത്തില്‍, മദ്രസ്സാ അധ്യാപകരില്‍ നിന്നും പിടിക്കുന്ന തുകയും, മദ്രസ്സാ ഉടമയില്‍ നിന്നും പിടിച്ചു പറിക്കുന്ന തുകയും ചേര്‍ത്ത് പതിറ്റാണ്ട് കഴിയുമ്പോള്‍ കിട്ടുന്ന പെന്‍ഷന്‍ നാലായിരം രൂപ നക്കാപിച്ചയാണെന്നു ശരിക്കും കണക്കു കൂട്ടിയാല്‍ മനസ്സിലാകും. സര്‍ക്കാര്‍ പ്രചരിപ്പിച്ചത് എന്തോ വലിയ കാര്യം പ്രഖ്യാപന ദിവസം മുതല്‍ മദ്രസ്സയില്‍ പഠിപ്പിച്ച അദ്ധ്യാപകര്‍ക്ക് കിട്ടാന്‍ പോകുന്നു എന്നാണ്. ആ പെന്‍ഷന്‍ പദ്ധതിയുടെ വിശദവിവരങ്ങള്‍ ഇവിടുത്തെ മാധ്യമങ്ങള്‍ ഒട്ടും പ്രാധാന്യമില്ലാത്ത വിധത്തിലാണ് പ്രസിദ്ധീകരിച്ചത്. പക്ഷേ ഇതിനെപറ്റി കൂടുതല്‍ പഠിച്ച മുസ്ലിം സംഘടനകളില്‍ എത്രപേര്‍ ഈ പദ്ധതിയ അനുകൂലിച്ചു. വളരെ ചുരുക്കം. എന്നിട്ടും മാരീചന്‍ ഇതിനെ സ്വപ്നപദ്ധതിയായിട്ടാണ് രേഖപ്പെടുത്തി കാണുന്നത്.

ഇതിനു സര്‍ക്കാര്‍ ഉദ്ദേശിച്ച പോലത്തെ പ്രോത്സാഹനം മുസ്ലിം സഹോദരില്‍ നിന്നും കിട്ടിയിരുന്നുവെങ്കില്‍ കഥ വേറെ രീതിയിലാകുമായിരുന്നു. ഏതാണ്ട് നമ്മുടെ കള്ളൂ വ്യവസായതൊഴിലാളി ബോര്‍ഡ് പോലെ.

ആദ്യം ഇതിന്റെ ഭരണം നടത്തുവാന്‍ തലസ്ഥാനത്ത് ഒരു ബോര്‍ഡാഫീസ്സ്. ഏഴെട്ടു രാഷ്ട്രിയക്കാര്‍ ചേര്‍ന്നുള്ള ഒരു ബോര്‍ഡും അതിനു ഒരു ചെയര്‍മാനും. കണക്കു സൂക്ഷിക്കുവാന്‍ ഒരു ചെറിയ ആഫീസ്സ്. അവിടെയും കൂറേ ബാബുമാര്‍. സര്‍ക്കാര്‍ ശമ്പള നിരക്കില്‍.

ഒരു കൊല്ലം കഴിഞ്ഞാല്‍ ജില്ലകള്‍ തോറും കണക്കു സൂക്ഷിക്കുവാന്‍ ജില്ലാ ആഫീസുകളും അവിടുത്ത ഭരണം നോക്കുവാന്‍ ജീല്ലാഭരണാധികാരികളും.( രാഷ്ട്രീയ നോമിനികള്‍) അഞ്ചാറുകൊല്ലം കഴിയുമ്പോള്‍, കേരളത്തിലെ എല്ലാ ജില്ലകളിലും ആഫീസ്സാകും. പക്ഷേ ഒരു കൊല്ലത്തെ കണക്കുപോലും ശരിയാകാതെ, അധ്യാപകരില്‍ നിന്നും ഉടമസ്ഥരില്‍ നിന്നും പിടിച്ചു പറിച്ച പണം ഒരുത്തരുടേയും കണക്കില്‍ ക്രേഡിറ്റ് വരാതെ ‘സസ്സ്പെന്‍സ് അക്കൌണ്ട്’ എന്ന രജിസ്റ്ററില്‍ കുന്നു കൂടും. പെന്‍ഷന്‍ പറ്റുന്ന ഒരുത്തര്‍ക്കും സമയത്തിനു പെന്‍ഷന്‍ കിട്ടില്ല. മുറക്ക് ബോര്‍ഡ് മീറ്റിംഗുകളും ജീല്ലാ മീറ്റിംഗുകളും നടക്കും.
ഇതാണു കള്ളുബോര്‍ഡിലും നടക്കുന്നത്. പക്ഷേ അവിടെ ഇത്രയും കൊല്ലം കൊണ്ട് കോടിക്കണക്കിനു പണം മറിയുന്നതു കൊണ്ട് പൊതുജനം ഒന്നും അറിയുന്നില്ല. എന്നാല്‍ ഓരോ തൊഴിലാളിയുടേയും ഏറ്റവും കുറഞ്ഞത് 5 കൊല്ലത്തെ പണമെങ്കിലും ആര്‍ക്കും പ്രയോജനമില്ലാതെ ‘സസ്പെന്‍സ് അക്കൌണ്ടില്‍’ കിടപ്പുണ്ട്. അതു മുഴുവന്‍ ബാങ്ക് ഡപ്പോസിറ്റാണ്. അതിനു കിട്ടുന്ന പലിശ മുഴുവന്‍ ബോര്‍ഡാഫീസിലെ ബാബുമാര്‍ക്ക് ശമ്പളവും, ടി.ഏ, ബോണസ്സ് എന്നിവായായി കൊടുക്കുന്നു. പാവപ്പെട്ട ചെത്തുകാരനു എന്നെങ്കിലും അവന്റെ അക്കൌണ്ട് ശരിയാക്കുന്ന അന്നു മുതല്‍ വരവ് വച്ചു കൊടുക്കും. പലിശ ഗോപി.

ഈ സ്ഥിതിയാണിവിടെയും വരാന്‍ പോകുന്നത്. കൂറേ രാഷ്ടീയക്കാര്‍ക്ക് പങ്കുവച്ചെടുക്കാനുള്ള പോസ്റ്റുകള്‍ ഉണ്ടാകും. അല്ലാതെ ഒരു മദ്രസ്സാ അദ്ധ്യാപകനും കിട്ടനുള്ളതു മുഴുവന്‍ കിട്ടില്ല എന്നുള്ളത് ഉറപ്പ്.

ഇതിനെക്കാള്‍ എത്രയോ നല്ലതാണ് ഏതെങ്കിലും ഇന്‍ഷ്യൂറന്‍സ് കമ്പനിയുമായി ബന്ധപ്പെടുത്തി പദ്ധതികള്‍ നടപ്പാക്കുന്നത്. അപ്പോള്‍ രാഷ്ട്രിയക്കാര്‍ക്ക് നേട്ടം ഉണ്ടാകില്ല.

പിന്നെ,ക്ഷേത്രത്തിലെ വരുമാനത്തില്‍ സര്‍ക്കാരിനു കൈയ്യൊന്നുമില്ലെന്നും പോസ്റ്റില്‍ എഴുതിക്കണ്ടു. ദേവസം ബോര്‍ഡ് എന്നു പറയുന്നത് വൈദ്യുതി ബോര്‍ഡ് പോലെ സര്‍ക്കാരിന്റെ കീഴില്‍ തന്നെ ഉള്ളതല്ലേ. എന്നുമുതലാണെന്തോ അങ്ങനെയല്ലാതായത്?

പോസ്റ്റിന്റെ ആദ്യ ഭാഗം, മദ്രസ്സാ‍ പെന്‍ഷനെ പറ്റിയുള്ളത്, വിജ്ഞാനം പകരുന്നത് തന്നെയായിരുന്നു. അവശ്യം വേണ്ടത്. പല സംശയങ്ങളും നീങ്ങാന്‍ ഉതകുന്നുണ്ട്. എന്നാല്‍ പോസ്റ്റിന്റെ രണ്ടാം ഭാഗത്തിന്റെ ആവശ്യം ഇവിടെ എന്തായിരുന്നു എന്ന് എത്ര ആലോച്ചിട്ടും പിടി കിട്ടുന്നില്ല. അതൊഴിവാക്കാമായിരുന്നു എന്നാണ് എന്റെ എളിയ അഭിപ്രായം. ഈ പോസ്റ്റിനു എതിരഭിപ്രായം എഴുതിയവരൊന്നും ആദ്യഭാഗം മാത്രമായിരുന്നെങ്കില്‍ ഇത്തരത്തില്‍ പ്രതികരിക്കില്ലായിരുന്നു.

robert said...

Hara hara mahadev! Jai Rajputana!

ജനശക്തി said...

പ്രിയ മാരീചന്‍, ഈ ഓഫ് ടൊപ്പിക് കമന്റിനു ക്ഷമ.

ഗുജറാത്ത് നരമേധത്തെ സൂചിപ്പിച്ച് സിമി ചൂണ്ടിക്കാട്ടിയ ടീസ്റ്റ സെറ്റല്വാദിനെതിരായി വന്ന വാര്‍ത്തയുടെ ബൈറ്റ് ടൈംസ് ഒഫ് ഇന്ത്യയുടേതാണ്. അതിനെ പൊളിച്ചുകൊണ്ട് കമ്യൂണലിസം വാച്ചില്‍ വന്ന ലേഖനത്തിന്റെ പ്രസക്തഭാഗം:

The allegations imputed by reporter Dhananjay Mahapatra who was present in the Supreme Court in the first para of his report to the Special Investigative Team (SIT) appointed by the Supreme Court are in fact extracted from a four page note circulated by Ms Hemantika Wahi for the Gujarat Government... It is not a note prepared by the Special Investigation Team led by RK Raghavan. Shri Raghavan was not present in the Supreme Court, yet there is a deliberate attempt by Mahapatra to impute that Raghavan was present in the court and that he as chairperson of SIT, himself, in person, or in writing made these allegations. This is a clever distortion of the proceedings in the Supreme Court aimed to create a public perception that Setalvad and the CJP misled the apex court.

സിമി said...

dear janasakthi, i read the same news in ibnlive, ndtv, and atleast 3 other news sources.

as I said, i dont want to debate the veracity of those allegations here - it would be deviating from the core issue of this post.

മൂര്‍ത്തി said...

പ്രസക്തമായ പോസ്റ്റ് മാരീചരേ..

മാരീചന്‍ സൂചിപ്പിച്ച പോലെ ക്ഷേമപദ്ധതികളില്‍ നിന്ന് ലോകവ്യാപകമായി സര്‍ക്കാരുകള്‍ പിന്‍വാങ്ങുന്ന കാലമാണിത്. ആ നിലയ്ക്ക് അതില്‍ നിന്നും വ്യത്യസ്തമായ ഏതൊരു നീക്കവും നയവും പ്രോത്സാഹിക്കപ്പെടേണ്ടതുണ്ട്. മദ്രസ പെന്‍ഷനും ക്ഷേമനിധിയും സച്ചാര്‍, പാലോളി കമ്മിറ്റി നിര്‍ദ്ദേശങ്ങളുടെ അടിസ്ഥാനത്തില്‍ ഉള്ളത്. പാലോളി കമ്മിറ്റി നിര്‍ദ്ദേശങ്ങള്‍ ഇവിടെ ഉണ്ട്.

Pension as well as welfare fund is being implemented for nearly half lakh Madrasa teachers from this January. Welfare fund and pension
scheme having insurance coverage is unprecedented in the State. The project will be implemented in collaboration with the insurance
companies in the public sector. Contribution to the welfare fund will be collected from the monthly donation of the Wakf Board and the
monthly contribution of the madrasa or the mosque committee who appoint the teachers enrolling the welfare fund. The reserve fund and
the amount needed for initial activities will be provided by the Government as grant and Rs.one crore has already been granted this
year.

വാര്‍ത്തകളിലും ഒക്കെ welfare pension എന്നു തന്നെയാണ് കാണുന്നത്. മന്ത്രി പറഞ്ഞതും അങ്ങിനെ തന്നെ. അതിനെ മറ്റു രീതിയില്‍ വ്യാഖ്യാനിച്ചതും വളച്ചൊടിച്ച് 4000-250 സമവാക്യം ഉണ്ടാക്കിയതും ഒക്കെ സംഘപരിവാര്‍ സംഘടനകള്‍ തന്നെ.

സച്ചാര്‍ കമിറ്റി തീരുമാനങ്ങള്‍ നടപ്പിലാക്കുന്നതില്‍ ഏറ്റവും മുന്നില്‍ നില്‍ക്കുന്നത് കേരളം തന്നെ.അതിനെക്കുറിച്ച് ദേശാഭിമാനിയില്‍ വന്ന ഒരു കുറിപ്പ് (സച്ചാര്‍: കേരളം മാതൃക ആര്‍ സാംബന്‍) അതുപോലെ ഇവിടെ ഇടുന്നു.

തിരു: രജീന്ദര്‍ സച്ചാര്‍ കമ്മിറ്റി നല്‍കിയ ശുപാര്‍ശകള്‍ നടപ്പാക്കാന്‍ കോണ്‍ഗ്രസ് നിയന്ത്രണത്തിലുള്ള കേന്ദ്ര സര്‍ക്കാര്‍ വൈമനസ്യം പ്രകടിപ്പിച്ചപ്പോള്‍, ആര്‍ജവത്തോടെ നടപടി സ്വീകരിച്ചത് കേരളത്തിലെ എല്‍ഡിഎഫ് സര്‍ക്കാര്‍.

ഇന്ത്യയിലെ മുസ്ളിം സമുദായത്തിന്റെ സാമൂഹ്യ-സാമ്പത്തിക- വിദ്യാഭ്യാസ നിലവാരം പഠിച്ച് റിപ്പോര്‍ട്ട് സമര്‍പ്പിക്കാന്‍ നിയോഗിക്കപ്പെട്ട സച്ചാര്‍ കമ്മിറ്റി കേന്ദ്ര സര്‍ക്കാരിന് റിപ്പോര്‍ട്ട് സമര്‍പ്പിച്ചത് 2006 ആഗസ്തിലാണ്. ആ വര്‍ഷം നവംബറില്‍ പാര്‍ലമെന്റിന്റെ മേശപ്പുറത്ത് വച്ച റിപ്പോര്‍ട്ട് പ്രസിദ്ധീകരിപ്പിക്കാന്‍ ഏറെ പ്രക്ഷോഭങ്ങള്‍ വേണ്ടിവന്നു. പാര്‍ലമെന്റിനകത്തും രാജ്യത്താകെയും സിപിഐ എം നടത്തിയ ശക്തമായ പ്രക്ഷോഭങ്ങള്‍ക്കൊടുവില്‍ 2007 ആഗസ്തിലാണ് റിപ്പോര്‍ട്ട് പരസ്യപ്പെടുത്താന്‍ കേന്ദ്ര സര്‍ക്കാര്‍ തയ്യാറായത്. എന്നാല്‍, നടപടികളൊന്നും സ്വീകരിച്ചില്ല. തെരഞ്ഞെടുപ്പ് അടുത്തുവന്നപ്പോള്‍ വോട്ടില്‍ കണ്ണുനട്ട് അവര്‍ പ്രഖ്യാപിച്ച ന്യൂനപക്ഷ സ്കോളര്‍ഷിപ്പ് പോലും സ്വകാര്യ സ്കൂളുകളിലേക്കാണ് എത്തുന്നത്. കോണ്‍ഗ്രസ് ഭരിക്കുന്ന സംസ്ഥാനങ്ങളും റിപ്പോര്‍ട്ടില്‍ തൊട്ടില്ല. കേരളമാകട്ടെ, സച്ചാര്‍ റിപ്പോര്‍ട്ട് പ്രസിദ്ധീകരിച്ചതിനുപിന്നാലെ നടപടികളും തുടങ്ങി.

സിപിഐ എം നേതൃത്വത്തില്‍ കഴിഞ്ഞ സെപ്തംബറില്‍ കോഴിക്കോട്ട് നടന്ന സെമിനാര്‍ അതിന്റെ മുന്നോടിയായി. ആ സെമിനാറില്‍ ഉയര്‍ന്ന അഭിപ്രായങ്ങളുടെ അടിസ്ഥാനത്തില്‍, കേരളത്തില്‍ സച്ചാര്‍ റിപ്പോര്‍ട്ട് നടപ്പാക്കുന്നതിനുള്ള നിര്‍ദേശങ്ങള്‍ സമര്‍പ്പിക്കാന്‍ ഒക്ടോബര്‍ 15ന് മന്ത്രി പാലോളി മുഹമ്മദ്കുട്ടി അധ്യക്ഷനായി 11 അംഗ കമ്മിറ്റിക്ക് സര്‍ക്കാര്‍ രൂപം നല്‍കി. റെക്കോഡ് വേഗത്തിലായിരുന്നു കമ്മിറ്റിയുടെ പ്രവര്‍ത്തനങ്ങള്‍. സംസ്ഥാനത്തുടനീളം സിറ്റിങ് നടത്തി 2008 ഫെബ്രുവരി 21ന് റിപ്പോര്‍ട്ട് സമര്‍പ്പിച്ചു. മെയ് ആറിന് സംസ്ഥാന സര്‍ക്കാര്‍ പലോളി കമ്മിറ്റി റിപ്പോര്‍ട്ട് പ്രസിദ്ധീകരിച്ച് നടപടികള്‍ക്ക് തുടക്കം കുറിച്ചു. ഏപ്രില്‍ 22ന് സെക്രട്ടറിയറ്റില്‍ ന്യൂനപക്ഷ സെല്‍ രൂപീകരിച്ച് പ്രവര്‍ത്തനം ആരംഭിച്ചു. പാലോളി കമ്മിറ്റി റിപ്പോര്‍ട്ട് നടപ്പാക്കാന്‍ ബജറ്റില്‍ 10 കോടി രൂപ വകയിരുത്തുകയും ചെയ്തു.

സംസ്ഥാനത്തെ മദ്രസ അധ്യാപകര്‍ക്ക് ജീവിതദുരിതങ്ങളില്‍നിന്ന് ഇതോടെ മോചനമാകും. വെറും ആയിരം രൂപയും മറ്റും പ്രതിഫലം വാങ്ങിയാണ് ഇന്ന് ഇവര്‍ ജീവിതം തള്ളിനീക്കുന്നത്. കമ്മിറ്റിയുടെ കീഴിലുള്ള കുടുംബങ്ങളില്‍നിന്ന് പിരിഞ്ഞുകിട്ടുന്ന വരിസംഖ്യയില്‍നിന്നാണ് ശമ്പളം. കമ്മിറ്റികള്‍ക്ക് ഇഷ്ടപ്പെടാതെവന്നാല്‍ ജോലിയും പോകും. തൊഴില്‍ സുരക്ഷിതത്വവും വാര്‍ധക്യത്തില്‍ പെന്‍ഷനും ഉറപ്പാകുന്നതോടെ ഇവരുടെ ജീവിതസാഹചര്യങ്ങളില്‍ കാതലായ മാറ്റങ്ങളുണ്ടാകും. രാജ്യത്തെ മറ്റു പ്രദേശങ്ങിലെ സ്ഥിതിയില്‍നിന്ന് മെച്ചപ്പെട്ടതാണ് കേരളത്തിലെ മുസ്ളിം വിഭാഗത്തിന്റെ അവസ്ഥ. കേരളത്തിലെ സാമൂഹ്യ നവോത്ഥാന പ്രസ്ഥാനങ്ങളുടെ പ്രവര്‍ത്തനങ്ങളും വര്‍ഷങ്ങളായി നിലനില്‍ക്കുന്ന സംവരണവും പൊതുവിദ്യാഭ്യാസമേഖലയുടെ വളര്‍ച്ചയുമാണ് ഇതിനുകാരണം. എന്നാല്‍, ഹിന്ദുസമുദായത്തിലെ പിന്നോക്കവിഭാഗത്തെ അപേക്ഷിച്ച് ഏറെ താഴെയാണ് ഇന്നും ഇവരുടെ സ്ഥിതി. പൊതുസ്ഥാപനങ്ങള്‍ ശക്തിപ്പെടുത്തിയും വിദ്യാഭ്യാസ അവസരങ്ങള്‍ നല്‍കിയും മറ്റു വിഭാഗങ്ങള്‍ക്ക് ഒപ്പമെത്തിക്കുന്നതിനുള്ള ശ്രമങ്ങളിലാണ് സര്‍ക്കാര്‍.
നാളെ ഈ പദ്ധതിയുടെ ഗതി എന്താകും എന്നൊക്കെ ഇപ്പോഴേ നാം പ്രവചിക്കേണ്ടതില്ലെന്ന് തോന്നുന്നു. ആദ്യം സര്‍ക്കാര്‍ മുസ്ലീങ്ങള്‍ക്ക് വാരിക്കോരിക്കൊടുത്തു എന്ന് പ്രചരിപ്പിക്കുക. അങ്ങിനെ അല്ല എന്ന് തെളിയിക്കപ്പെടുമ്പോള്‍ ഉടനെ ഈ നാലായിരം എന്ന “നക്കാപ്പിച്ച“യെക്കുറിച്ച് വാചാലരാകുക. ഈ സര്‍ക്കാരിന്റെ ഒരു ഗതികേട്. നടപ്പിലാക്കാനും വയ്യ. നടപ്പിലാക്കാതിരിക്കാനും വയ്യ. :)

ക്ഷേത്രങ്ങളിലെ വരുമാനം കൈകാര്യം ചെയ്യുന്നതിനെപ്പറ്റിയൊക്കെ ബാബുരാജ് ഭഗവതി പണ്ടൊരു പോസ്റ്റ് ഇട്ടിരുന്നു. അത് നോക്കാവുന്നതാണ്.
ദേവസ്വം ഭരണം കൈയാളുന്നതിന് സര്‍ക്കാരിനുള്ള ന്യായങ്ങള്‍ - ലിങ്ക്മലബാറിലെ അവഗണിക്കപ്പെട്ട, അവശതയനുഭവിക്കുന്ന ക്ഷേത്രജീവനക്കാര്‍ക്ക് ശമ്പളപരിഷ്കരണം പ്രഖ്യാപിച്ചത് ഈ സര്‍ക്കാര്‍ തന്നെയായിരുന്നു എന്ന വാര്‍ത്ത തിരക്കിനിടയില്‍ മറന്ന് പോകുന്നു. 1344 ക്ഷേത്രത്തിലെ 5404 ജീവനക്കാര്‍ക്ക് മാര്‍ച്ച് ഒന്നുമുതല്‍ ശമ്പളപരിഷ്കരണത്തിന്റെ ആനുകൂല്യം ലഭിക്കും. അതിനെക്കുറിച്ചുള്ള മാതൃഭൂമി വാര്‍ത്ത ഇവിടെ

മൂര്‍ത്തി said...

“ഭ്രൂണമെടുത്ത് ശൂലത്തില്‍ കൊരുത്തു“ എന്നതൊക്കെ നിറം പിടിപ്പിച്ച കഥകളാണ്. ഇത് ഒന്നു നോക്കൂ.

എന്നെഴുതി ഒരു ലിങ്ക് ഇട്ട സിമി, ആ വാര്‍ത്തയുടെ മറ്റൊരു വശം ചൂണ്ടിക്കാണിക്കുമ്പോള്‍ ചര്‍ച്ച ചെയ്യാന്‍ തയ്യാറല്ല എന്നു പറയുന്നതില്‍ പൊരുത്തക്കേടുണ്ട്. ഇവിടെ ചര്‍ച്ച ചെയ്യണം എന്നല്ല. ആദ്യം വന്ന വാര്‍ത്ത വിശ്വസനീയവും ജനശക്തി ഇട്ട കമന്റ് അങ്ങിനെ ആകാത്തതും സിമിയുടെ നിലപാട് വ്യക്തമാക്കുന്നുണ്ട് എന്ന് സൂചിപ്പിക്കട്ടെ.

പരാജിതന്‍ said...

സിമി,
“ഹീനമായ പീഡനങ്ങളുടെ നരകയാതനകള്‍ക്ക് വിധേയരായ പറയനെയും പുലയനെയുമൊക്കെ നിവര്‍ന്നു നില്‍ക്കാനും പൊതുനിരത്തിലിറങ്ങി നടക്കാനും, ആരെടാ എന്നു ചോദിച്ചാല്‍ എന്തെടാ എന്ന് തിരിച്ചടിക്കാനും ശേഷിയുണ്ടാക്കിക്കൊടുത്തത് ഇടതുപക്ഷ പ്രസ്ഥാനങ്ങളാണെന്നും ചരിത്രം പറഞ്ഞു തരും.“ എന്നു മാരീചന്‍ എഴുതിയിരിക്കുന്നു. ഇപ്പറയുന്നതില്‍ കഴമ്പില്ലെന്നാണോ സിമി പറഞ്ഞു വരുന്നത്? അതു പോട്ടെ, കേരളത്തില്‍ നടന്ന മുഴുവന്‍ സോഷ്യല്‍ റെവല്യൂഷന്റെയും പിതൃത്വം ഇടതുപക്ഷത്തിന്റെ തലയില്‍ വച്ചു കെട്ടുന്നതാണ് ആ സ്റ്റേറ്റ്മെന്റെന്ന ജഡ്ജ്‌മെന്റ് കടുപ്പം!

അതു പോലെ കൌസര്‍ ബാനോ കേസ് അതിശയോക്തിയാണെന്ന് സിമി ‘അസന്നിഗ്ദ്ധമായി’ പറയുന്നത് ആ ഒരൊറ്റ ലിങ്കിന്റെ ബലത്തില്‍ മാത്രമാണോ? അങ്ങനങ്ങു പറയാന്‍ സമയമായോ സിമിയേ? ഗുജറാത്തില്‍ ആളുകളെ കൊന്നത് പാലില്‍ വിഷം കലക്കി കൊടുത്തായിരുന്നൊന്നും പറഞ്ഞു കളയാഞ്ഞതു ഭാഗ്യം! ഒരാളുടെ കുട്ടിയെ അയാളുടെ മുന്നില്‍ വച്ചു തീയിലെറിഞ്ഞു വേണം പീഡിപ്പിക്കേണ്ടതെന്ന ലൈനില്‍ കൊല ചെയ്ത പിശാചുക്കള്‍ ‘ആക്രിക്കടക്കാരന്റെ മോള്‍ നസീമോയില്ലേ? അവളെ ഞാന്‍ കുഴച്ചുകൂട്ടി അച്ചാറാക്കി’ എന്നൊക്കെ വിളമ്പിയത് തെഹല്‍ക്കക്കാരന്‍ പിടിച്ചെടുത്തത് ഡിജിറ്റല്‍ മാനിപ്പുലേഷനാണെന്നു പറഞ്ഞാല്‍ വിശ്വസിക്കുന്നവനും ഗുജറാത്ത് വിഷയത്തില്‍ ഗവണ്മെന്റിനെതിരെ റിപ്പോര്‍ട്ട് നല്‍കിയ സീനിയര്‍ ഉദ്യോഗസ്ഥനെ ഭരണനേതൃത്വം ഭീഷണിപ്പെടുത്തുകയും എന്‍ ജി ഓ കളെ ഉപജാപകരെന്ന ലേബലടിക്കാന്‍ ശ്രമം നടക്കുകയുമൊക്കെ ചെയ്യുന്ന പശ്ചാത്തലത്തീല്‍ ഒരു വാര്‍‌ത്ത കാണിച്ചു കൊണ്ട് ‘ഒക്കെയും ടീസ്റ്റയുടെ കള്ളക്കളി’യാണെന്നു തീര്‍പ്പു കല്പിക്കുന്നവനും തമ്മില്‍ വലിയ വ്യത്യാസമൊന്നുമില്ല.

സിമി said...

മൂര്‍ത്തി, പരാജിതന്‍:

ജോര്‍ജ്ജ് ബുഷിന്റെ പ്രശസ്തമായ ഡയലോഗാണ് You are either with us or against us. എന്ന്

എന്നാല്‍ കാര്യങ്ങള്‍ എപ്പൊഴും കറുപ്പും വെളുപ്പുമല്ല. ഇടയ്ക്കുള്ള നിറങ്ങളും ഉണ്ട്.

ഇതേ വാര്‍ത്ത ഇന്റര്‍നെറ്റില്‍ തിരഞ്ഞുനോക്കൂ. ibnlive, keralanext, മറ്റ് ലിങ്കുകള്‍ഇതിനെ റ്റൈംസ് ഓഫ് ഇന്ത്യ റിപ്പോര്‍ട്ടറിന്റെ വാര്‍ത്തയെ വളച്ചൊടിക്കലായി ചിത്രീകരിക്കുന്നത് തെറ്റാണ്.

---
പരാജിതാ, 1) തലയുയര്‍ത്തിപ്പിടിക്കാന്‍ ശേഷിയുണ്ടാക്കിക്കൊടുത്തത് - ഇടതുപക്ഷ പ്രസ്ഥാനങ്ങളല്ല, ഇടതുപക്ഷ പ്രസ്ഥാനങ്ങളും ആണ്.

ഈ രണ്ട് സ്റ്റേറ്റ്മെന്റുകളും തമ്മിലുള്ള വ്യത്യാസം മനസിലാവുന്നുണ്ടോ?

2) ഒരാള്‍ മറ്റൊരുത്തനെ കുത്തുന്നത് ഒരു സാക്ഷി കണ്ടെന്നിരിക്കട്ടെ. യഥാര്‍ത്ഥത്തില്‍ അയാള്‍ മൂന്നുതവണയാണ് കുത്തിയത്. കോടതിയിലെത്തിയപ്പോള്‍ പതിനേഴ് കുത്താണ് കുത്തിയതെന്ന് സാക്ഷി മൊഴി മാറ്റി പറയുന്നു. എന്തായാലും കുത്ത് ഹീനകൃത്യമാണ്. സാക്ഷി കുറ്റം കൂട്ടിപ്പറഞ്ഞത് തെറ്റോ ശരിയോ?

ഇത്രയേ ഉള്ളൂ. അതിനര്‍ത്ഥം ഞാന്‍ കുത്തിയവന്റെ പക്ഷം പിടിച്ചെന്നല്ല. ഓരോ കാര്യങ്ങളും ചോദ്യം ചെയ്യപ്പെടണം, കണ്ണുമടച്ച് വിശ്വസിക്കരുത് എന്നു വിശ്വസിക്കുന്നു.

സിമി said...

ഇതും കൂടി നോക്കു.

Ramachandran said...

സിമി

ഇതും

http://vrajeshkumar.blogspot.com/2009/04/blog-post_14.html
ഇതും

http://workersforum.blogspot.com/2008/11/blog-post_16.html

കൂടി വായിക്കുക

സിമി said...

രാമചന്ദ്രാ,

താങ്കള്‍ ചൂണ്ടിക്കാട്ടുന്ന കാര്യങ്ങളില്‍ എനിക്ക് ഒട്ടും സംശയമില്ല. ഭരണകൂടം കൂട്ടുനിന്ന അക്രമമാണ് ഗുജറാത്തില്‍ നടന്നതെന്ന് നന്നായി അറിയാം.

ബി.ജെ.പി. ഭരണത്തില്‍ വരരുതെന്ന് ആത്മാര്‍ത്ഥമായി ആഗ്രഹിക്കുന്നുമുണ്ട്.

പക്ഷേ ഇതൊന്നും ടീസ്റ്റ നിറം‌പിടിപ്പിച്ച് കഥകള്‍ നിര്‍മ്മിച്ചുവെങ്കില്‍ അതിന് ന്യായീകരണമാവുന്നില്ല.
ടീസ്റ്റ അങ്ങനെ ചെയ്തെങ്കില്‍ അത് ഭീകരവാദത്തെ പ്രോത്സാഹിപ്പിക്കുകയേ ഉള്ളൂ. ഭ്രൂണത്തെ പുറത്തെടുത്തു തീയിലെറിഞ്ഞു എന്നത് ഇല്ലാക്കഥ നിറം‌പിടിപ്പിച്ച് മെനഞ്ഞതാണെങ്കില്‍ അതില്‍നിന്നും പ്രധാനമായും മുതലെടുക്കുക തീവ്രവാദികളായിരിക്കും - it will be fodder to their agenda.

മായാ ബെന്നിനെ ജയിലിലടച്ചത് എസ്.ഐ.ടി. ആണല്ലോ - അതുകൊണ്ടുതന്നെയാണ് എസ്.ഐ.ടി. റിപ്പോര്‍ട്ട് manipulated അല്ല എന്നു വിശ്വസിക്കുന്നത്.

യൂസുഫ്പ said...

വിവരമുള്ളവര്‍ തമ്മിലടിക്കട്ടെ അല്ലാത്തവര്‍ ചൊറിയട്ടെ....

anil said...

രാഷ്ട്രത്തിന്റെ ഭരണഘടന നിയമപരിപാലന സംവിധാനങ്ങളോട്‌ വിധേയത്വം തീരെ കാണിക്കുന്നില്ല എന്നു(uniform civilcode, etc) മദ്രസാ അധ്ദ്യാപകർക്കെതിരെ പാക്കിസ്താനിൽ വരെ പരാതി ഉണ്ട്‌.കോടിക്കണക്കിനു റിയാലുകൾ സക്കാത്തായി കിട്ടുന്ന മദ്രസകളിൽ ഈ പറയുന്ന ദാരിദ്രം ഇല്ല്ല എന്നതല്ലേ സത്യം.ഇതൊരു "പിണറായി" കുതന്ത്രം മാത്രമാണെന്നു മാരീചനടക്കം എല്ലാവർക്കും അറിയാവുന്ന വസ്തുത മാത്രമല്ലെ?

മനനം മനോമനന്‍ said...

കാണാൻ വൈകി.പോസ്റ്റു നന്നായി;സമയോചിതം.

പാര്‍ത്ഥന്‍ said...

ഒരു മദ്രസാ അദ്ധ്യാപകന്റെ ജോലി കിട്ടാൻ എന്താണ് ചെയ്യേണ്ടത്. കൊത്യാവാ.

മദ്രസ അദ്ധ്യാപകരും നന്നാവട്ടെ. അതിന് മാരീചൻ തിരഞ്ഞെടുത്ത രീതി ശരിയായില്ല എന്ന് ഇത്തിരി വൈകിപോയിട്ടും പറയാൻ തോന്നുന്നു.
മദ്രസാ അദ്ധ്യാപകർ പൊതുസമൂഹത്തിനും സർക്കാരിനും എന്തെല്ലാം നേട്ടങ്ങൾ ഉണ്ടാക്കിക്കൊടുക്കുന്നുണ്ടെന്നെങ്കിലും മാരീചൻ വ്യക്തമാക്കണമായിരുന്നു. അങ്ങിനെയായിരുന്നെങ്കിൽ ഈ സംശയം ഉണ്ടാകുമായിരുന്നില്ല.

എന്തുകൊണ്ട് എല്ലാ മതപഠനക്ലാസ്സുകളും അംഗീകൃത സ്കൂളുകളിൽ കൂടി നടത്തിക്കൂടാ. അവിടെ പഠിപ്പിക്കുന്ന എല്ലാ അദ്ധ്യാപകർക്കും പെൻഷ്യൻ ലഭിക്കുമല്ലോ. മുസ്ലീംങ്ങൾക്കും കൃസ്ത്യാനികൾക്കും ഹിന്ദുക്കൾക്കും അതാതു മതപഠനത്തിനായി സമയം അനുവദിച്ചൽ പോരെ. മദ്രസ തന്നെ വേണം എന്ന് എന്താ ഇത്ര നിർബന്ധം. സൌകര്യമുള്ളവർ ട്യൂഷ്യന് പോകുന്നപോലെ, കൂടുതൽ പഠിക്കേണ്ടവർ പ്രത്യേകം പഠിക്കട്ടെ.

മാരീചൻ ഒരു കാര്യം ഉടൻ തന്നെ ചെയ്യേണ്ടതുണ്ട്. അടുത്തെ എവിടെയെങ്കിലും ഒരു ഉത്സവം നടക്കുമ്പോൾ അവിടെയ്ക്ക് പോലീസുകാരെ നിയമിക്കാൻ താങ്കളും പോലീസ്സേഷൻ വരെ ഒന്നു പോകുന്നത് നല്ലതാണ്. നേരിട്ട് കാണാമല്ലോ.

വെള്ളെഴുത്ത് said...

..അങ്ങനെയാണെങ്കില്‍ സര്‍ക്കാര്‍ ശരിക്കും മുസ്ലീംങ്ങളെ കളിയാക്കുകയല്ലേ ചെയ്തത്? സച്ചാര്‍ കമ്മറ്റി റിപ്പോര്‍ട്ടിന്റെ സാദ്ധ്യത പഠിക്കാന്‍ ആദ്യം കമ്മറ്റിയെ നിയോഗിച്ച സംസ്ഥാനമെന്ന ബഹുമതി ലഭിക്കാനുള്ള പ്രചാരണം സര്‍ക്കാര്‍ തലത്തിലാണു നടന്നത്. അതില്‍പ്പെടുന്ന ഒന്ന് ഇങ്ങനെ നക്കാപിച്ചയായിരുന്നെന്ന് അറിയാവുന്നവരുണ്ട്.. പക്ഷേ മാരീചന്‍ ഇങ്ങനെ എഴുതുമ്പോള്‍ നടപ്പിലാക്കിയവര്‍ക്ക് ദോഷമാണ് വരുത്തി വയ്ക്കുക എന്ന് കുറച്ച് ആലോചിച്ചാല്‍ മനസ്സിലാവും. കാരണം അതുകൊണ്ട് മുസ്ലീംങ്ങള്‍ക്ക് പ്രയോജനമൊന്നുമില്ലെന്ന് മുസ്ലീങ്ങള്‍ക്ക് തന്നെ മനസ്സിലാവും. രണ്ട് ഭൂരിപക്ഷവര്‍ഗീയതയ്ക്ക് അണിയറയില്‍ ചെന്ന് വരി കൊടുക്കും. കരുണാകരന്‍ ഭരിക്കുമ്പോള്‍ മുല്ലയ്ക്കും മുക്രിയ്ക്കും പെന്‍ഷന്‍ കൊടുക്കുന്നതിനെതിരേ മുദ്രാവാക്യം ഉയര്‍ത്തിയത് അന്നത്തെ പ്രതിപക്ഷമായ ഇന്നത്തെ ഭരണപക്ഷമാണ്..ദേവസ്വം ബോഡിനു തുക വകയിരുത്തിക്കൊണ്ടാണ് കരുണാകരന്‍ അതിനു മറുപടി പറഞ്ഞത്.. താത്കാലികമായ ചില ലാഭങ്ങളെ കരുതിയുള്ള ചെയ്തികള്‍ ദൂരവ്യാപകമായ ഫലങ്ങളുണ്ടാക്കും രാഷ്ട്രീയത്തില്‍.. അതാണു ഭയം

ബഷീര്‍ വെള്ളറക്കാട്‌ / pb said...

മാരീചൻ

തെറ്റിദ്ധാരണകൾ പരത്തി വർഗീയത ആളിക്കത്തിക്കുന്നവർക്ക് കാര്യങ്ങളുടെ നിജസ്ഥിതി അറിയയ്ക കൊണ്ടായിരിക്കില്ല. എന്നാലും കാരയങ്ങൾ വിലയിരുത്തികൊണ്ടുള്ള വസ്ഥുതാപരമായ ഇത്തരം ലേഖനങ്ങൾ ഒരു പരിധിവരെ ഗുണം ചെയ്യുക തന്നെ ചെയ്യും .ആശംസകൾ

പ്രചാരകന്‍ said...

ഈ ലേഖനം നോക്കൂ

മദ്രസ്സ ബോർഡും ചില ആശങ്കകകളും

ശംഖൊലി said...

Appol Dewasom vaka kittunna kaashu sarkarilekkale poknathu priya Maarichaa ?

Pinne muslim kutikalkku scholarship erpeduthi ella sdhanarthikaludeyum vottu tendi lekhanagalil pathichatho ?

പള്ളിക്കരയില്‍ said...

ആര്‍ജ്ജവമുള്ള രചന, ശക്തമായ ആവിഷ്ക്കാരം.
ഉറക്കം നടിടിക്കുന്നവരെ ഉണര്‍ത്താന്‍ ആര്‍ക്കും കഴിയില്ല.
സത്യം അറിയാന്‍ മാര്‍ഗ്ഗമില്ലാതെ തെറ്റിദ്ധാരണയില്‍ കഴിയുന്നവര്‍ക്ക് ഇത്തരം വെളിപ്പെടുത്തലുകള്‍ വലിയ അനുഗ്രഹമാണ്‌.
നന്ദി.

Santosh Kumar Nair said...

രണ്ടേ രണ്ടു വാക്ക്...
1.ഗുരുവായൂര്‍ മുനിസിപ്പാലിറ്റിയ്ക്, ഗുരുവായൂര്‍ ക്ഷേത്രം കൊണ്ടുള്ള വരുമാനം എത്രയെന്നു അറിയാമോ...അതിനു ചുറ്റുമുള്ള ആളുകളുടെ, പ്രത്യേകിച്ചും മുസ്ലിംകളുടെ സാമ്പത്തിക സ്ഥിതിയെ ഗുരുവായൂര്‍ ക്ഷേത്രത്തെ അടിസ്ഥാനമാകിയാണ്
2. ശബരിമല ക്ഷേത്രമാണ് കേരള സ്റ്റേറ്റ് ഇലക്ട്രിസിറ്റി ബോർഡിനെ രക്ഷപ്പെടുത്തുന്നതെന്ന് അറിയാമോ...അത് എങ്ങനെ സാമ്പത്തിക സ്ഥിതിയെ സഹായിക്കുമെന്ന് അറിയാമോ.. നമ്മുടെ നാട്ടിന് പുറത്തുനിന്നുള്ള ഏതെങ്കിലും ഇന്ത്യൻ സംസ്ഥാനത്തിന്റെ പണം കിട്ടുന്നത് ശബരിമല തീരത്ഥാടകർ വഴിയാണ് എന്നതാണ് സത്യം.