യുവര്‍ ഓണര്‍... ജനത്തിനെ വെറുതേ വിടുക.....

കണ്ണടച്ചിരുട്ടാക്കുന്ന വേഗതയില്‍ അര്‍ത്ഥവ്യത്യാസം വന്നുപോയ ചില വാക്കുകളുണ്ട്, മലയാളഭാഷയില്‍. മലയാളി, കേരളം, ജനം, എന്നിവയാണ് ആ പട്ടികയില്‍ പ്രമുഖ സ്ഥാനം അലങ്കരിക്കുന്നത്. മലയാളി എന്നു പറഞ്ഞാല്‍ നേരത്തെ മനസിലാക്കപ്പെട്ടിരുന്നത് മലയാളഭാഷ സംസാരിക്കുന്നവര്‍, കേരളത്തില്‍ ജനിച്ചവര്‍ എന്നൊക്കെയാണ്. എന്നാലിപ്പോള്‍ കഥ മാറി. മലയാളിയെന്ന വിശേഷണത്തിന് അര്‍ഹത വേണമെങ്കില്‍ മലയാളം സംസാരിച്ചാല്‍ മാത്രം പോര, മറിച്ച് വിഎസ് അച്യുതാനന്ദനെ പിന്തുണയ്ക്കുകയും കൂടി വേണം. കേരളത്തില്‍ ജനിച്ചവനും ഭരദൈവം അച്യുതാനന്ദനുമായവനാരോ അവനാണ് മലയാളി, സമാസം ആദര്‍ശവ്രീഹി!

സമാനമായ അര്‍ത്ഥവ്യതിയാനം കേരളം, ജനം എന്നീ വാക്കുകള്‍ക്കുമുണ്ടായി. വിഎസിന്റെ നിലപാടുകളെ കേരളം നെഞ്ചേറ്റി എന്ന് ചിലര്‍ എഴുതിക്കഴിഞ്ഞാല്‍‍, പിന്നെ വിഎസിന്റെ നിലപാടുകളെ നെഞ്ചാറ്റാതെ നിങ്ങള്‍ക്ക് കേരളത്തില്‍ ജീവിക്കാനോ, അമരവിള, വാളയാര്‍ ചെക്ക് പോസ്റ്റുകള്‍ കടക്കാനോ ആവില്ല. വിഎസ് നയിച്ച പ്രത്യയശാസ്ത്ര സമരത്തെ ജനം ഒറ്റമനസോടെ ഏറ്റുവാങ്ങിയെന്നൊരു വാചകം ചില മാധ്യമങ്ങളില്‍ അച്ചടിമഷി പുരണ്ടുകഴിഞ്ഞാല്‍‍, പിന്നെ വിഎസിനെ ഏറ്റുവാങ്ങാതെ നിങ്ങള്‍ക്ക് രക്ഷയില്ല. നാടുവിടുകയോ വേറെ ഭാഷ സംസാരിക്കുകയോ ആവാം.

ഒരു രാഷ്ട്രീയപ്പാര്‍ട്ടിയുടെ ഒരു ഗ്രൂപ്പിന്റെ തുലോം തുച്ഛമായ ആരാധകവൃന്ദത്തിന്റെ ഭജനപ്പാട്ടിലെ നായകനായ രാഷ്ട്രീയ നേതാവിനെ എത്ര ലാഘവത്തോടെയാണ് മൂന്നരക്കോടി ജനങ്ങളുടെ കുലദൈവമായി വാഴ്ത്തുന്നതെന്ന് നോക്കുക. വ്യക്തമായ രാഷ്ട്രീയചേരികള്‍ അടിയുറച്ച രാഷ്ട്രീയബോധ്യത്തോടെ പരസ്പരം ഏറ്റുമുട്ടുന്ന സംസ്ഥാനമാണ് കേരളം. ഇടതു - ഐക്യ ജനാധിപത്യ മുന്നണികള്‍ക്ക് ഏതാണ്ട് തുല്യമാണ് ജനപിന്തുണ. ഒരു നെല്ലിടയെങ്കിലും മുന്‍തൂക്കം കോണ്‍ഗ്രസിന്റെ നേതൃത്വത്തിലുളള ഐക്യമുന്നണിക്കാണെന്ന് പറയേണ്ടി വരും. വില്‍ക്കാന്‍ വിലയുളള കുറേ വോട്ടുകള്‍ ബിജെപിയ്ക്കുമുണ്ട്‍.

കോണ്‍ഗ്രസ്, ബിജെപി, മുസ്ലിംലീഗ്, സിപിഐ, കേരള കോണ്‍ഗ്രസുകള്‍, സിഎംപി, ജെഎസ്എസ്, എന്നു തുടങ്ങി ഏതാണ്ട് 27 പാര്‍ട്ടികളാണ് കേരളത്തിലെ തെരഞ്ഞെടുപ്പ് പ്രക്രിയയില്‍ പങ്കെടുക്കുന്നത്. ഇവയിലേതെങ്കിലും പാര്‍ട്ടിയുടെയോ, പാര്‍ട്ടികളുടെയോ അണികളോ പ്രവര്‍ത്തകരോ നേതാക്കളോ വിഎസിന്റെ ജനപക്ഷ ഇടപെടലുകളുടെ ആരാധകരായി രാഷ്ട്രീയ മതംമാറ്റത്തിന് വിധേയരായ വാര്‍ത്ത പത്രങ്ങളോ ഇന്റലിജന്‍സോ റിപ്പോര്‍ട്ട് ചെയ്തിട്ടില്ല. സിപിഎം എന്ന പാര്‍ട്ടിയില്‍ വിരളമായ അണികളുടെ പിന്തുണയുളള ഒരു ഗ്രൂപ്പു നേതാവ് മാത്രമാണ് അവര്‍ക്ക് വിഎസ് അച്യുതാനന്ദന്‍. അതായത് സിപിഎമ്മിലെ ഒരു കൊച്ചു കരുണാകരന്‍. എം വി രാഘവനോ, കെ ആര്‍ ഗൗരിയമ്മയോ സിപിഎമ്മില്‍ നിന്ന് പുറത്തുപോയപ്പോള്‍ ഉണ്ടായതിനപ്പുറം കോലാഹലം വിഎസിന് ഉണ്ടാക്കാനാവുമെന്ന് ഇനിയും തെളിയിക്കപ്പെടേണ്ടതുണ്ട്.

ജനപിന്തുണയുടെ രസനിരപ്പ് സംശയരഹിതമായി ബോധ്യപ്പെടണമെങ്കില്‍ 2006ലെ തെരഞ്ഞെടുപ്പുകാലത്തെ ചില കണക്കുകള്‍ പരിശോധിക്കണം. പ്രതിപക്ഷ നേതാവിന്റെ പ്രതാപം വിളവെടുത്ത തിരഞ്ഞെടുപ്പാണ് 2006ല്‍ കഴിഞ്ഞത്. ആരാധകരും അഭ്യുദയകാംക്ഷികളും ഒരുമനസോടെ വിഎസിന്റെ പിന്നില്‍ അണി നിരന്ന കാലം.

2006ലെ തിരഞ്ഞെടുപ്പില്‍ കേരളത്തിലാകെ പോള്‍ ചെയ്യപ്പെട്ടത് 1,55,42,679 വോട്ട്. ഇടതുമുന്നണിക്ക് ആകെ കിട്ടിയ 75,58,834 വോട്ടുകള്‍ കിഴിച്ചാല്‍ ശേഷിക്കുന്ന 79,83,845 പേര്‍ വോട്ടു ചെയ്തത് വിഎസ് നയിച്ച ഇടതുമുന്നണിയുടെ എതിര്‍ പക്ഷത്തിനോ പക്ഷങ്ങള്‍ക്കോ ആണ്. ഐക്യമുന്നണിയുടെ വോട്ട് 66,79,557, ബിജെപിയുടേത് 7,50,963. രണ്ടും കൂട്ടിയാല്‍ 74,30,520.

ഐക്യമുന്നണിയുടെയും ബിജെപിയുടെയും രാഷ്ട്രീയാദര്‍ശങ്ങളില്‍ വിശ്വസിക്കുന്നവരേക്കാള്‍ കൃത്യം 1,28,314 പേരുടെ മുന്‍കൈയാണ് ആ തിരഞ്ഞെടുപ്പില്‍ ഇടതുമുന്നണിക്ക് കിട്ടിയത്. സ്വതന്ത്രരുടെയും മറ്റു പാര്‍ട്ടികളുടെയുമൊക്കെ വോട്ടു കൂടി കൂട്ടിയാല്‍ 4,25,011 വോട്ടിന് ഇടതുമുന്നണി പിന്നില്‍ പോകും. കൊട്ടിഗ്ഘോഷിക്കുന്നതു പോലെ കേരളം മുഴുവന്‍ 2006ല്‍ ഇടതിനൊപ്പമായിരുന്നില്ല. വോട്ടുകളത്രയും തൂത്തുവാരി ഒരു പെട്ടിയിലിട്ടാല്‍ ഇടതുമുന്നണിയെക്കാള്‍ ഇടതുവിരുദ്ധര്‍ക്കാണ് ഭൂരിപക്ഷം.

വോട്ടു ചെയ്തവരില്‍ 48.63 ശതമാനം പേര്‍ ഇടതുമുന്നണിയെ അനുകൂലിച്ചപ്പോള്‍ എതിര്‍ക്കാനുണ്ടായിരുന്നത് 51.37 ശതമാനം പേര്‍. ഏത് പ്രതിപക്ഷ നേതാവും ചെയ്യുന്നതു പോലെയുളള രാഷ്ട്രീയനീക്കങ്ങളാണ് വിഎസിന്റേത് എന്നു തന്നെയാണ് 51.37 ശതമാനം ആളുകള്‍ കരുതിയത്. അതിനപ്പുറം സമൂഹത്തിന്റെ രാഷ്ട്രീയ ബോധ്യം പൊളിച്ചെഴുതാനോ, നിലപാടുകളുടെ അടിത്തറയിളക്കാനോ പോന്ന കരുത്ത് വിഎസിന്റെ നിര്‍മ്മിക്കപ്പെട്ട പ്രതിഛായയ്ക്കുണ്ടായിരുന്നില്ല. ഉണ്ടായിരുന്നെങ്കില്‍, ഇടതുമുന്നണിയുടെ എതിര്‍ചേരിയില്‍ നാലു ലക്ഷത്തോളം പേര്‍ അധികമുണ്ടാകുമായിരുന്നില്ല.

എല്ലാക്കാലത്തും സംഭവിക്കുന്നത് ഇങ്ങനെ തന്നെയാണ്. പക്ഷേ, പ്രതിപക്ഷ നേതാവെന്ന നിലയില്‍ വിഎസിന്റെ മാസ്മര പ്രകടനത്തില്‍ കേരള ജനതയാകെ മനംമയങ്ങി നില്‍ക്കുകയാണെങ്കില്‍ ആകെ പോള്‍ ചെയ്ത വോട്ടിന്റെ പകുതിയെങ്കിലും അദ്ദേഹം നയിക്കുന്ന മുന്നണിയുടെ പെട്ടിയില്‍ വീഴേണ്ടതാണ്. ഇവിടെ ചോദ്യം ലളിതമാണ്. ഇടതുപെട്ടിയില്‍ വോട്ടു നിക്ഷേപിച്ച 75,58,834 പേരെയും നമുക്ക് വേണമെങ്കില്‍ വിഎസ് പ്രഭാവത്തില്‍ വരവു വെയ്ക്കാം. എങ്കില്‍ എതിര്‍ത്തവരെ ഏത് നിര്‍വചനത്തിലാണ് പെടുത്തേണ്ടത്? ജനം, മലയാളി, കേരളീയന്‍ മുതലായ സംവര്‍ഗങ്ങളില്‍ പെടാന്‍ അര്‍ഹതയുളളവരാണോ ഇക്കഴിഞ്ഞ നിയമസഭാ തിരഞ്ഞെടുപ്പില്‍ കോണ്‍ഗ്രസ് മുന്നണിക്കും ബിജെപിയ്ക്കും മറ്റുളളവര്‍ക്കും കൂടി വോട്ടു ചെയ്ത 79,83,845 പേര്‍. ജനമെന്ന പദത്തിന്റെ പരിധിയില്‍ ഉള്‍പ്പെടുത്തിക്കിട്ടാന്‍ ഏത് വില്ലേജ് ഓഫീസിലാണ് ഇവര്‍ അപേക്ഷ നല്‍കേണ്ടത്?

വിഎസിനെ പിബിയില്‍ നിന്ന് ഒഴിവാക്കിയതിന്റെ പിറ്റേന്നിറങ്ങിയ (ജൂലൈ 13, 2009) മാതൃഭൂമി പത്രത്തില്‍ വിബി ചെറിയാന്‍ എഴുതിയ ലേഖനത്തിന് ഇനി പാര്‍ട്ടി ജനങ്ങളില്ലാതെ എന്നാണ് തലക്കെട്ട്. അതായത് വിഎസിനെ സിപിഎം പൊളിറ്റ് ബ്യൂറോയില്‍ നിന്ന് ഒഴിവാക്കിയതോടെ സിപിഎമ്മിന്റെ അണികളും പ്രവര്‍ത്തകരും മരപ്പട്ടികളായി പരിണമിച്ചു. അവര്‍ക്കിനി വോട്ടവകാശവുമുണ്ടോ, റേഷന്‍ കാര്‍ഡ് ഹാജരാക്കിയാല്‍ അരിയും മണ്ണെണ്ണയും കിട്ടുമോ എന്നറിയാന്‍ ചെറിയാന്റെ അടുത്ത ലേഖനം വരെ കാത്തിരിക്കുകയേ വഴിയുളളൂ.

ലേഖകന്‍ വ്യാഖ്യാനിച്ചു വെച്ചതു പോലെ രൂപാന്തരപ്പെട്ടുപോവുന്ന ഒരു പാര്‍ട്ടിക്ക്‌ ജനങ്ങളുടെ നാഡിമിടിപ്പുകള്‍ അറിയാനും അവരുടെ ഇച്ഛകളെ ഉള്‍ക്കൊള്ളാനും കഴിയാതെപോവുമത്രേ. ജനങ്ങളുടെ നാഡിമിടുപ്പുകള്‍ അറിയാനും അവരുടെ ഇച്ഛകളെ ഉള്‍ക്കൊള്ളാനും കഴിഞ്ഞ ഒരു പാര്‍ട്ടിക്ക് ചെറിയാന്‍ രൂപം നല്‍കിയിരുന്നു. അമ്പാടി വിശ്വത്തെ എറണാകുളം ലോകസഭാ മണ്ഡലത്തില്‍ ബിജെപി പിന്തുണയുളള സ്വതന്ത്രസ്ഥാനാര്‍ത്ഥിയായി വേഷം കെട്ടിച്ച് തൊഴിലാളി വര്‍ഗ സംരക്ഷകരും പാര്‍ട്ടിയും തമ്മിലൊരേറ്റു മുട്ടല്‍ നടത്തി നോക്കിയതാണ്. പക്ഷേ, ജനം മൈന്‍ഡ് ചെയ്തില്ല. പാര്‍ട്ടിക്കകത്ത് അവശേഷിക്കുന്ന വിപ്ലവകാരികള്‍ക്ക് വീര്‍പ്പുമുട്ടല്‍ എന്നൊരു മഹാരോഗം പിടിപെടുമെന്ന മുന്നറിയിപ്പും ലേഖനം നല്‍കുന്നുണ്ട്.

പാര്‍ട്ടി അച്ചടക്കം സംരക്ഷിക്കാനിറങ്ങുന്നവര്‍ ജനങ്ങളില്ലാത്ത പാര്‍ട്ടിയുടെ നേതാക്കളായി അവശേഷിക്കുമെന്ന ശാപത്തോടെയാണ് ചെറിയാന്റെ ലേഖനം അവസാനിക്കുന്നത്. വിഎസ് പിബിയിലുണ്ടായിരുന്നപ്പോള്‍ കേരളത്തിലെ ജനം മുഴുവന്‍ സിപിഎമ്മിലായിരുന്നുവെന്നാണ് വിവക്ഷ. ഏതായാലും ഈയടുത്ത കാലത്തൊന്നും ചെറിയാന്‍ സിപിഎമ്മിലുണ്ടായിരുന്നില്ല. ഇക്കഴിഞ്ഞ തിങ്കളാഴ്ച വരെ ചെറിയാനും ജനത്തിന്റെ നിര്‍വചനത്തില്‍ പെടുന്ന പ്രജയായിരുന്നോ എന്ന സംശയമാണ് ലേഖനം ബാക്കി വെയ്ക്കുന്നത്. വിഎസിനെ സേവ് സിപിഎം ഫോറം, മാര്‍ക്സിസ്റ്റ് പത്രിക തുടങ്ങിയ ഉടന്‍കൊല്ലി തൊഴിലാളി വര്‍ഗ ആയുധങ്ങള്‍ ഉപയോഗിച്ച് അപവാദങ്ങളില്‍ കുളിപ്പിച്ച ഒരു ഭൂതകാലവും ചെറിയാനുണ്ട്. ഇനി സിപിഎം ജനങ്ങളില്ലാതെയാണെങ്കില്‍, ഇന്നലെയേ സിപിഎമ്മല്ലാതായി മാറിയ ചെറിയാനും ജനമല്ല, വേറെന്തോ ജീവിയാണ് എന്നര്‍ത്ഥം.

പാര്‍ട്ടിയാണ് ജനമെന്ന് പറഞ്ഞ് തന്നെ വിരട്ടരുതെന്ന് അപ്പുക്കുട്ടന്‍ വളളിക്കുന്നും മാതൃഭൂമി വഴി അഭ്യര്‍ത്ഥിച്ചിട്ടുണ്ട്. വാര്‍ദ്ധക്യസഹജമായ ചില അസ്കിതകളുളളതിനാല്‍ അപ്രതീക്ഷിത വിരട്ടില്‍ ചിലപ്പോള്‍ കാര്യങ്ങള്‍ കൈവിട്ടു പോയേക്കാം. അടിക്കേണ്ട, ഒന്നു വിരട്ടി വിട്ടാല്‍ മതിയെന്ന സലിം കുമാര്‍ തമാശയാണോ ആ ലേഖനമെഴുമ്പോള്‍ അപ്പുക്കുട്ടന്‍ വളളിക്കുന്നിന്റെ മനസിലെന്ന് നമുക്കറിയില്ല. അദ്ദേഹവും മറക്കാതെ കൂട്ടു പിടിക്കുന്നത് ജനത്തെയാണ്. ആരു ലേഖനമെഴുതിയാലും കിടക്കപ്പൊറുതി നഷ്ടപ്പെട്ടു പോയ, പാവം ജനത്തെ..

അണികളുടെയും ജനങ്ങളുടെയും പിബിയുടെയും മുഖ്യമന്ത്രിയായി വിഎസ് രംഗത്തെത്തിയെന്നാണ് ലേഖകന്‍ സാക്ഷ്യപ്പെടുത്തുന്നത്. പ്രകടനം നടത്താനും പന്തം കൊളുത്താനും പിബിയ്ക്ക് എസ്എംഎസും കത്തുമയയ്ക്കാനും മൂന്നരക്കോടി മലയാളികളും തെരുവിലുണ്ടായിരുന്നു എന്ന മട്ടിലാണ് ലേഖനത്തിന്റെ പോക്ക്.

സാഹചര്യം അവ്വിധമായിരിക്കെ, നമുക്ക് വേറെ ചില കണക്കുകള്‍ കൂടി നോക്കാം. ജനപക്ഷ നിലപാടുകളിലൂടെ കേരളത്തിലെ ജനങ്ങളുടെ കണ്ണിലുണ്ണി സ്ഥാനത്തേയ്ക്ക് എതിരില്ലാതെ തിരഞ്ഞെടുക്കപ്പെട്ട വിഎസ് കഴിഞ്ഞ തിരഞ്ഞെടുപ്പില്‍ ഏതെങ്കിലും തരത്തില്‍ ഒന്നാമതെത്തിയിരുന്നോ എന്ന ചോദ്യത്തിന് അപ്പുക്കുട്ടന്‍, ചെറിയാന്‍ സംഘം മറുപടി പറയുമോ ആവോ? കിട്ടിയ വോട്ടിന്റെ കാര്യത്തില്‍, വോട്ട് ശതമാനത്തിന്റെ കാര്യത്തില്‍, ലഭിച്ച ഭൂരിപക്ഷത്തിന്റെ കാര്യത്തില്‍.. എവിടെയെങ്കിലും വിഎസിന് ഒന്നാം സ്ഥാനമുണ്ടോ? മൂന്നരക്കോടി ജനങ്ങളുടെ ആശയും ആവേശവുമാണെങ്കില്‍ ഏതെങ്കിലുമൊരു ഒന്നാം സ്ഥാനം വിഎസിന് ഉണ്ടാകേണ്ടതാണ്. .

മലമ്പുഴ മണ്ഡലത്തില്‍ ആകെ പോള്‍ ചെയ്ത 116847 വോട്ടില്‍ വിഎസ് നേടിയത് 64775 വോട്ട്. ഭൂരിപക്ഷം 20017.

മലമ്പുഴ മാര്‍ക്സിസ്റ്റ് കോട്ടയാണ്. ഒരുകാലത്തും പാര്‍ട്ടിയെ കൈവിടാത്ത മണ്ഡലം. അങ്ങനെ രാഷ്ട്രീയ പ്രബുദ്ധതയില്‍ മാതൃകാസ്ഥാനത്ത് നില്‍ക്കുന്ന മണ്ഡലത്തില്‍ വിഎസിനെപ്പോലൊരു ജനനായകന്‍ ലോകത്തിന്നുവരെ ഒരു പ്രതിപക്ഷ നേതാവിനും എത്തിപ്പിടിക്കാനാവാത്ത ഔന്നിത്യത്തില്‍ നിന്നുകൊണ്ട് മത്സരിക്കുമ്പോള്‍ കേരളത്തില്‍ ഏറ്റവും കൂടുതല്‍ വോട്ടുകള്‍ നേടിയാണ് അദ്ദേഹം വിജയിക്കേണ്ടത്. ജനകോടികളുടെ സകല പ്രതീക്ഷയും ഏറ്റു വാങ്ങിയാണ് അദ്ദേഹം പോര്‍മണ്ണില്‍ നില്‍ക്കുന്നതെന്നും ഓര്‍ക്കണം. മറ്റേതൊരു സ്ഥാനാര്‍ത്ഥിയെയും അതിശയിപ്പിക്കുന്ന ഭൂരിപക്ഷം വേണം. വോട്ടിന്റെ വിഹിതം ശതമാനക്കണക്കില്‍ പരിശോധിച്ചാല്‍ എല്ലാവരെയും കടത്തിവെട്ടുന്നതാവണം അദ്ദേഹത്തിന്റെ പ്രകടനം. എതിരാളിക്ക് സ്വന്തം വോട്ടു പോലും കിട്ടരുത്.

സംഭവിച്ചത് അങ്ങനെയാണോ...? 2006ല്‍ വിഎസിനെക്കാള്‍ ഭൂരിപക്ഷം നേടിയ 19 പേര്‍ വേറെയുണ്ട്. അതില്‍ 12 സിപിഎമ്മുകാര്‍. 3 സിപിഐക്കാര്‍, രണ്ട് ആര്‍എസ്‍പിക്കാര്‍, ജനതാദളും കോണ്‍ഗ്രസ് എസും മുസ്ലിംലീഗും ഓരോന്നു വീതവും.

വിഎസിനെക്കാള്‍ വോട്ടുകള്‍ നേടിയവരുടെ എണ്ണം 33 ആണ്. അതില്‍ കോണ്‍ഗ്രസുകാര്‍ നാല്. മുസ്ലിംലീഗുകാര്‍ മൂന്ന്, സിപിഐ മൂന്ന്, ഇടതു സ്വതന്ത്രര്‍ രണ്ട്, ആര്‍എസ് ‍പി രണ്ട്, കോണ്‍ഗ്രസ് എസ്, ജനതാദള്‍ എന്നിവര്‍ ഓരോന്ന്. ബാക്കിയത്രയും സിപിഎമ്മുകാര്‍.

ആരുടെ ഭരണത്തിനെതിരെയാണോ ജനരോഷമഴിച്ചു വിട്ട് വിഎസ് ജനകോടികളുടെ പ്രിയപുത്രനായത്, ആ ഉമ്മന്‍ചാണ്ടിക്കു കിട്ടി, വിഎസിനെക്കാള്‍ 135 വോട്ടുകള്‍ അധികം. മലമ്പുഴയില്‍ 55.45 ശതമാനം പേര്‍ വിഎസിനെ അനുകൂലിച്ചപ്പോള്‍ പുതുപ്പളളിയിലെ 56.30 ശതമാനമാണ് കുഞ്ഞൂഞ്ഞിനു പിന്നില്‍ അണി നിരന്നത്. ശതമാനക്കണക്കില്‍ 0.85നും വോട്ടിന്റെ എണ്ണത്തില്‍ 135നും കുഞ്ഞൂഞ്ഞിനു പുറകിലാണ് സാക്ഷാല്‍ അച്യുതാനന്ദന്‍. വോട്ടിന്റെ എണ്ണത്തിലും ശതമാനത്തിലും വില്ലനു പുറകിലാണ് നായകന്‍ എന്നര്‍ത്ഥം. ജനമനസുകള്‍ വിഎസിനു നേരെ ചാഞ്ഞുവീണെങ്കില്‍ വോട്ടിന്റെ എണ്ണത്തിലും ശതമാനത്തിലും ഉമ്മന്‍ചാണ്ടിയെങ്ങനെ അദ്ദേഹത്തെ കടത്തി വെട്ടി? പുതുപ്പളളിക്കാരെ "ജന"ങ്ങളുടെ കൂട്ടത്തില്‍ ചേര്‍ക്കുമോ, വി ബി ചെറിയാനും അപ്പുക്കുട്ടന്‍ വളളിക്കുന്നും.

ഇവിടെയും തീരുന്നില്ല, വോട്ടുകണക്കിന്റെ മറിമായം‍. 1996ല്‍ മാരാരിക്കുളത്ത് വിഎസ് തോല്‍ക്കുമ്പോള്‍ അദ്ദേഹത്തിന് ആകെ കിട്ടിയ വോട്ട് 66337. 1991ല്‍ മത്സരിച്ചപ്പോള്‍ കിട്ടിയത് 71470 വോട്ടുകള്‍. എതിരാളികളില്ലാത്ത ജനനായകനായി കൊണ്ടാടപ്പെട്ട വിഎസിന് മലമ്പുഴയില്‍ ഒരിക്കലും ഈ വോട്ടുകള്‍ നിലനിര്‍ത്താനായിട്ടില്ല. പരുക്കനും മുരടനും മുഠാളനുമായ വിഎസിന് 1991ല്‍ 71470 പേര്‍ മാരാരിക്കുളത്ത് വോട്ടു ചെയ്തെങ്കില്‍, ജനനായകനും കണ്ണിലുണ്ണിയുമായ വിഎസിന് 2006ല്‍ മലമ്പുഴ കിട്ടിയ വോട്ട് 64775. പളനിയും സംഘവും കാലുവാരിയപ്പോള്‍ പോലും 66337 പേര്‍ വിഎസിനൊപ്പം നിന്നു. ആ വോട്ടുപോലും ജനപ്രിയ നായകന് മലമ്പുഴയില്‍ കിട്ടിയില്ലെന്ന് ജനങ്ങളുടെ മൊത്തക്കച്ചവടമേറ്റ് തെരുവു ഭരിക്കുന്നവര്‍ അറിയുന്നത് നല്ലതാണ്.

മുന്‍സര്‍ക്കാരിന്റെ ദുര്‍ഭരണത്തിന് എതിരെയുളള വിധിയെഴുത്ത് എന്നാണ് നിയമസഭാതിരഞ്ഞെടുപ്പില്‍ വിജയം നേടുന്ന മുന്നണിയുടെ നേതാക്കള്‍ ആദ്യം നടത്തുന്നതുന്ന പ്രതികരണം. പ്രതിപക്ഷം ഭരണമേറിയാല്‍ സോഷ്യലിസ്റ്റ് സ്വര്‍ഗരാജ്യം കെട്ടിപ്പെടുക്കുമെന്ന പ്രതീക്ഷയിലല്ല, മറിച്ച് അധികാരത്തിന്റെ മദം പൊട്ടിയൊഴുകുമ്പോള്‍ രാഷ്ട്രീയക്കൊമ്പനാനകള്‍ കാട്ടിക്കൂട്ടുന്ന പേക്കൂത്തുകള്‍ക്കുളള ശിക്ഷയാണ് കേരളത്തിലെ ഓരോ നിയമസഭാ തിരഞ്ഞെടുപ്പു ഫലവും. അപവാദങ്ങള്‍ അധികമില്ല. 2006ലും സംഭവിച്ചത് മറിച്ചല്ല. അഴുകിനാറിയ ഒരു സര്‍ക്കാരിനെ കാലില്‍ത്തൂക്കി പാറക്കല്ലിലടിച്ച് സംഹരിക്കാന്‍ മുന്നണികളുടെ സ്വാധീനവലയത്തിനപ്പുറത്ത് വോട്ടെടുപ്പുഫലത്തെ നിര്‍ണയിക്കുന്നവരില്‍ ഭൂരിപക്ഷം തീരുമാനിച്ചതു കൊണ്ടാണ് മഹാവിജയം ഇടതുമുന്നണി നേടിയത്. ആന്റണിയുടെയും ഉമ്മന്‍ചാണ്ടിയുടെയും ഭരണത്തിനെതിരെ പ്രതികരിക്കാന്‍ ആ വിഭാഗത്തിലെ ഭൂരിപക്ഷം രംഗത്തിറങ്ങിയതാണ് ഇടതുമുന്നണി ചരിത്ര വിജയത്തിന് കാരണം. 2001ല്‍ ഇടതുമുന്നണിയുടെ ശവപ്പെട്ടിയില്‍ ആണിയടിച്ചതും ഇതേ ജനമാണ്.

ആ വിജയം പ്രതിപക്ഷ നേതാവായിരുന്ന വിഎസിന്റെ അക്കൗണ്ടിലെഴുതി സിപിഎമ്മിനെ കൊച്ചാക്കിക്കാണിക്കാന്‍ മുതിര്‍ന്നവര്‍ക്ക് ലക്ഷ്യം വേറെയായിരുന്നു. അത് തിരിച്ചറിയാന്‍ വിഎസിന് കഴിഞ്ഞില്ല. കണക്കുകളും ചരിത്രവും വിസ്മരിച്ച് രാഷ്ട്രീയ നിരക്ഷരരുടെ വാഴ്ത്തിപ്പാടലുകള്‍ക്ക് പിറകെ പോയ വിഎസ് ഒറ്റിയത്, സ്വന്തം രാഷ്ട്രീയപാരമ്പര്യത്തെയാണ്. തീക്കനലുകളിലൂടെ പതറാതെ നടന്നു വളര്‍ന്ന വിഎസ് തന്റെ വിപ്ലവജ്വാലയാളുന്ന വ്യക്തിത്വം, പലകാലങ്ങളില്‍, പലവിധത്തില്‍ സിപിഎമ്മില്‍ നിന്ന് പുറത്താക്കപ്പെട്ടവര്‍ക്ക് പകിട കളിക്കാനെറിഞ്ഞു കൊടുത്തു.

വിഎസ് അച്യുതാനന്ദന്‍ എന്ന കമ്മ്യൂണിസ്റ്റുകാരന്റെ ത്യാഗസുരഭിലമായ ഭൂതകാലത്തിന്റെ തണലിലും തണുപ്പിലും സ്വന്തം രാഷ്ട്രീയമോഹങ്ങളുടെ വിത്ത് സൂക്ഷിക്കുന്നവരാണ്, ജനപിന്തുണയുടെ വലിപ്പം കാണിച്ച് ഒടിയന്റെ വേഷം കെട്ടുന്നത്. പിബിയില്‍ നിന്ന് പുറത്തായ വിഎസ്, പാര്‍ട്ടിയില്‍ നിന്നിറങ്ങി വന്നതിനു ശേഷം പൂവണിയേണ്ട ചില സ്വപ്നങ്ങളുമായി ജീവിക്കുന്നവരാണ് അവര്‍. ഏത് അളവുകോലില്‍ അളന്നെടുത്താലും ജനസാമാന്യത്തിന്റെ ശ്രദ്ധ പിടിച്ചു പറ്റുന്ന ഒരു വ്യക്തിവൈശിഷ്ട്യവുമില്ലാത്ത കുറേപ്പേര്‍ വിഎസിന്റെ ചെലവില്‍ കേരളത്തില്‍ ജീവിച്ചു പോകുന്നുണ്ട്. സന്ധ്യ മയങ്ങിയാല്‍ ചാനലുകളുടെ വണ്ടികളും പ്രതീക്ഷിച്ചിരിക്കുന്നവര്‍. പത്രങ്ങളിലും വാരികകളിലും ആദര്‍ശഭീകരതയുടെ വാചാടോപങ്ങള്‍ ആയിരങ്ങള്‍ക്ക് വില്‍ക്കുന്നവര്‍. ഏതു പ്രവചനങ്ങള്‍ക്കും പ്രഖ്യാപനങ്ങള്‍ക്കും വഴങ്ങുന്ന തൊലിക്കട്ടിയുളളവര്‍. വിഎസിനെക്കൊണ്ട് കഞ്ഞികുടിച്ചു പോകുന്നവര്‍ അങ്ങനെയെത്രയെത്ര.....!

തൊട്ടുകാണിക്കാനോ, എഴുതി സമര്‍ത്ഥിക്കാനോ ആവാത്ത ജനമെന്ന വലിയൊരു മിത്തിന്റെ പേരില്‍ സ്വപ്നങ്ങള്‍ വില്‍ക്കുന്നവരോട് ഒരിറ്റു സഹതാപം നമുക്കും ചൊരിയാം. സ്വപ്നങ്ങള്‍ക്കര്‍ത്ഥങ്ങളുണ്ടായിരുന്നെങ്കില്‍ സ്വര്‍ഗങ്ങള്‍ അവര്‍ക്കെന്നേ സ്വന്തമായേനെ...