Thursday, April 22, 2010

പിതൃശൂന്യതയുടെ ഞരമ്പുരോഗങ്ങള്‍...


ഒരിടവേളയ്ക്കു ശേഷം പുതിയ കഥകളും പുതിയ വേഷങ്ങളും രംഗപ്രവേശം ചെയ്യുകയാണ് ലാവലിന്‍ കേസില്‍. മാധ്യമങ്ങള്‍ കുടം തുറന്നു വിട്ട ലാവലിന്‍ അപവാദത്തിന്റെ ആയുസ് സിബിഐയുടെ കുറ്റപത്രവും ഒടുവിലത്തെ സത്യവാങ്മൂലവും കണ്ടതോടെ എണ്ണപ്പെട്ടു കഴിഞ്ഞിരുന്നു. 500 കോടി, 400 കോടി, 374.5 കോടി എന്നിങ്ങനെ അവരോഹണത്തിന്റെ അനിവാര്യതകള്‍ പിന്നിട്ട അഴിമതിക്കഥ100 കോടി, 98.3 കോടി, 86 കോടി എന്നിങ്ങനെ ചുരുങ്ങിച്ചുരുണ്ട് ഒടുവില്‍ സ്വന്തം പ്രദേശത്ത് ഒരു കാന്‍സര്‍ ആശുപത്രി സ്ഥാപിക്കാന്‍ "അധികാരദുര്‍വിനിയോഗം" നടത്തിയെന്ന "മഹാ അപരാധ"ത്തിന്റെ പേരില്‍ ഇന്ത്യന്‍ പീനല്‍ കോഡിന്റെ 120 ബി, 420, അഴിമതി നിരോധന നിയമത്തിന്റെ 13(1) വകുപ്പുകള്‍ പ്രകാരമുളള കുറ്റവിചാരണയിലെത്തവെയാണ്, ഇടനിലക്കാരില്‍ നിന്ന് പിണറായി പണം കൈപ്പറ്റിയതിന് തെളിവില്ലെന്ന സിബിഐയുടെ സത്യവാങ്മൂലം സിജെഎം കോടതിമുറിയില്‍ അവതരിച്ചത്.

ഇരുളിലും വെയിലിലും ഉപജാപം നീങ്ങുന്ന വഴി പഴയതു തന്നെയാണ്. അപവാദം ആദ്യം അച്ചടിമഷി പുരളുന്നത് അശ്ലീലവാരികയില്‍. പിന്നെ പത്രങ്ങള്‍ വഴിയൊരു കോളിളക്കം. തൊട്ടുപിന്നാലെ രാഷ്ട്രീയ എതിരാളികളുടെ വക ഹാലിളക്കം. ചൂടാറുന്നതിന് മുമ്പ് കോടതിയില്‍ ഹര്‍ജി. ഹര്‍ജിയ്ക്ക് തെളിവ് പത്രവാര്‍ത്തകള്‍. തെളിവും വെളിവുമില്ലാതെ പത്രത്താളുകളില്‍ നട്ടുനനച്ച അപവാദങ്ങള്‍ക്ക് കോടതി വഴി സ്വീകാര്യതയൊരുക്കിയത് അങ്ങനെയാണ്. പുതിയ കഥയുടെ, പുതിയ വേഷങ്ങളുടെ പിറവിയ്ക്കും അതേ തനിയാവര്‍ത്തനം.

അടവും ചുവടും പിഴച്ചുപോയത് തിരിച്ചറിഞ്ഞ ഉപജാപകവീരന്മാര്‍ പുതിയ പൂഴിക്കടകനുമായി അഴിഞ്ഞാടാനിറങ്ങുമ്പോള്‍ അങ്കത്തട്ടൊരുക്കാനുളള ചുമതല മനോരമ, മാതൃഭൂമി എഡിറ്റോറിയല്‍ ഡെസ്കുകള്‍ സസന്തോഷം ഏറ്റെടുത്തിട്ടുണ്ട്. 60 പേജ് നീളുന്ന സ്വന്തം കൈപ്പടയിലെ മൊഴിയും 140 പേജുകളുളള രേഖകളുമായി ചെന്നൈയിലെ സിബിഐ ഓഫീസിലേയ്ക്ക് ദീപക് കുമാറെന്ന പുതിയ അവതാരം നടന്നു കയറിയതും ആദ്യം നമ്മെ അറിയിച്ചത് സാക്ഷാല്‍ ക്രൈം നന്ദകുമാര്‍. പതഞ്ഞൊഴുകുന്ന ഹര്‍ഷോന്മാദത്തോടെ ദീപക് കുമാറിനെ മനോരമയും മാതൃഭൂമിയും മംഗളവും സ്വന്തമാക്കിയത് കണ്ടില്ലേ. ദീപക്കിന്റെ മൊഴിയ്ക്കു മേല്‍ അന്വേഷണം ആവശ്യപ്പെട്ട് ചെന്നിത്തല മുതല്‍ വീരേന്ദ്രകുമാര്‍ വരെയുളളവരുടെ പത്രസമ്മേളനമാണ് പരിപാടിയിലെ അടുത്ത ഇനം. സാക്ഷിയുടെ വെളിപ്പെടുത്തലിനെക്കുറിച്ച് സിബിഐ തന്നെ അന്വേഷിക്കണമെന്ന് നന്ദകുമാര്‍ വക പൊതുതാല്‍പര്യഹര്‍ജി ഹൈക്കോടതിയിലെത്തുന്നതോടെ കൊട്ടിക്കലാശം ശുഭം.

സിബിഐയുടെ കുറ്റപത്രം കണ്ട് പല്ലുറുമ്മിയത് സിപിഎമ്മുകാരാണെന്ന് കരുതിയവരോട് നല്ല നമസ്കാരം പറയാം. ഒരു സംഘം ഉപജാപകരുടെ ഉറക്കമാണ് ആ കുറ്റപത്രം നഷ്ടപ്പെടുത്തിയത്. കെട്ടിപ്പൊക്കിയതും കൊട്ടിഗ്ഘോഷിച്ചതമൊന്നും കുറ്റപത്രത്തില്‍ കാണാഞ്ഞപ്പോള്‍ ഉപജാപക ഞരമ്പുകളില്‍ പടര്‍ന്നത് വൈക്ലബ്യത്തിന്റെ കൊടുംശൈത്യം. പുതിയ സത്യവാങ്മൂലത്തിന്റെ ഉളളറകള്‍ വെളിപ്പെടണമെങ്കില്‍, പൈശാചികമായ നിരാശയുടെ ആഴങ്ങളില്‍ നിന്ന് 2009 ആഗസ്റ്റ് 4ന് കോഴിക്കോട് പുതിയറ റോഡില്‍ നിന്നും ചെന്നൈയിലെ ശാസ്ത്രി ഭവനിലെ സിബിഐ ആസ്ഥാനത്തേയ്ക്ക് പറന്ന ഒരു കത്തിനെക്കുറിച്ചറിയണം. അന്വേഷണ റിപ്പോര്‍ട്ടില്‍ വരേണ്ടിയിരുന്ന അന്തിമഫലങ്ങള്‍ അക്കമിട്ട് നിരത്തുന്ന ആ കത്ത് അയച്ചത് സാക്ഷാല്‍ ക്രൈം നന്ദകുമാര്‍.

ലാവലിന്‍ കേസിന്റെ അന്വേഷണത്തിനൊടുവില്‍ 2009 ജൂണ്‍ 11നാണ് സിബിഐ കുറ്റപത്രം സമര്‍പ്പിച്ചത്. ഈ കേസില്‍ താല്‍പര്യമുളള സകലര്‍ക്കും ആ കുറ്റപത്രത്തിന്റെ ഉളളടക്കം കാണാപ്പാഠമാണ്. നന്ദകുമാറും അയാള്‍ക്ക് പിന്നിലുളള ഉപജാപകരും ആഗ്രഹിച്ച അന്വേഷണ ഫലമായിരുന്നില്ല സിബിഐയുടേത്. തല്‍ക്കാലത്തെ മാധ്യമകോലാഹലങ്ങള്‍ക്കപ്പുറത്ത് ഈ റിപ്പോര്‍ട്ടിന് പ്രസക്തിയില്ലെന്ന് തിരിച്ചറിഞ്ഞതോടെ, അന്വേഷണ റിപ്പോര്‍ട്ടിന്റെ ഉളളടക്കം നന്ദകുമാര്‍ തന്നെ നിശ്ചയിച്ച് സിബിഐയെ അറിയിക്കുന്നതാണ് കത്ത്. ഉപജാപകര്‍ ആഗ്രഹിച്ചതും പ്രചരിപ്പിച്ചതുമായ ഏതെല്ലാം ആരോപണങ്ങളാണ് അന്വേഷണ റിപ്പോര്‍ട്ടില്‍ ഉള്‍പ്പെടാതെ പോയത് എന്ന അന്വേഷണത്തിനാണ് ഇനി പ്രസക്തി പുതിയ സത്യവാങ്മൂലത്തിന്റെ ജാതകവും ഗ്രഹനിലയും ആ വിശകലനത്തില്‍ തെളിയും.

ടി പി നന്ദകുമാര്‍ നല്‍കിയ പരാതിയെ തുടര്‍ന്നാണ് ലാവലിന്‍ കേസില്‍ കേരള ഹൈക്കോടതി സിബിഐ അന്വേഷണത്തിന് ഉത്തരവിട്ടത്. അശ്ലീലവാരികയുടെ താളുകള്‍ വഴി ആദ്യം, മലയാളത്തില്‍ മഹാമാധ്യമങ്ങള്‍ വഴി പിന്നീട്, ഒരു പൊതുതാല്‍പര്യഹര്‍ജി വഴി ഹൈക്കോടതി സമക്ഷം നന്ദകുമാര്‍ പ്രചരിപ്പിച്ച അപവാദങ്ങളെന്തെന്ന് അക്കമിട്ട് നമുക്ക് പരിശോധിക്കാം.

ആദ്യം വേറൊരു ചരിത്രം

2005 ഫെബ്രുവരി 15 -28 ലക്കം ക്രൈമിന്റെ കവര്‍ പേജില്‍ മാസ്റ്റ് ഹെഡിനും മീതെ ഇങ്ങനെ ഒരു തലക്കെട്ട് പ്രത്യക്ഷപ്പെട്ടു. "പിണറായി വിജയനും റഷ്യന്‍ സുന്ദരിമാരും". കുടുംബത്തോടൊപ്പം ജീവിക്കുന്ന രണ്ട് മാന്യ വനിതകളുടെ ചിത്രങ്ങള്‍ക്ക് താഴെ തോമസ് ഐസക്കിന്റെയും പിണറായി വിജയന്റെയും ക്ലോസപ്പ് ദൃശ്യങ്ങള്‍ക്കൊപ്പം സംഭ്രമജനകമായ തലക്കെട്ടുകള്‍ കൂടി.. "തോമസ് ഐസക് പാര്‍ട്ടിയുടെ അന്തകനോ", "രണ്ട് സുന്ദരികള്‍ മാര്‍ക്സിസ്റ്റ് നേതാക്കളെ കയ്യിലിട്ട് അമ്മാനമാടുമ്പോള്‍" ‍, "പെണ്‍വിഷയത്തില്‍ മാര്‍ക്സിസ്റ്റ് പാര്‍ട്ടി തകരുമോ?"

ഗ്രൂപ്പുപോരിന്റെ പാരമ്യത്തില്‍ സിപിഎമ്മിന്റെ സംസ്ഥാന സമ്മേളനം മലപ്പുറത്ത് ചേര്‍ന്നത് 2005 ഫെബ്രുവരി 19 മുതല്‍ 22 വരെയാണ്. പാര്‍ട്ടിയൊന്നാകെ പിടിച്ചടക്കാനും ചിലരെ പിടിച്ചിറക്കാനും മറ്റുചിലരെ പടിയടച്ച് പിണ്ഡം വെയ്ക്കാനും തീരുമാനിച്ചുറപ്പിച്ച് മലപ്പുറത്തെത്തയവര്‍ക്കുളള വയാഗ്രയായിരുന്നു ഈ ക്രൈം വാരിക. സിപിഎമ്മിന്റെ സംസ്ഥാന സെക്രട്ടറിയ്ക്കെതിരെ വിഷച്ചൂരുളള ലൈംഗിക അപവാദങ്ങള്‍ അച്ചടിച്ച് വില്‍ക്കാന്‍ ഒരു ഞരമ്പുരോഗിയ്ക്ക് ധൈര്യം കുത്തിയൊലിച്ചത് പാര്‍ട്ടിക്കുളളില്‍ നിന്നുതന്നെയായിരുന്നുവെന്നത് ഒട്ടും രഹസ്യമല്ല. റഷ്യന്‍ സുന്ദരിമാര്‍ക്കൊപ്പം ഗള്‍ഫില്‍ ഉല്ലാസനൗകയില്‍ രാസകേളിയാടുകയാണ് പിണറായി വിജയനെന്ന് അച്ചടിച്ച ക്രൈം വാരിക എറണാകുളത്ത് ദേശാഭിമാനി ബുക്ക് ഡിപ്പോയില്‍ പോലും വില്‍പനയ്ക്ക് വെച്ചിരുന്നു. അത്ഭുതമെന്ന് പറയട്ടെ, ക്രൈമിന്റെ ഈ ലക്കമൊന്നാകെ പരതിയാലും ലാവലിന്‍ എന്ന പേര് ഒരിടത്തുപോലുമില്ല!

ക്രൈം വഴി പ്രചരിച്ച ആരോപണങ്ങള്‍

2006 ലെ തിരഞ്ഞെടുപ്പുകാലത്ത് പിണറായി വിജയന്റെ മുഖചിത്രത്തോടെ ക്രൈം വില്‍പനയ്ക്കെത്തി. കവര്‍ പേജില്‍ "എസ്എന്‍സി ലാവലിനും കമല ഇന്റര്‍നാഷണലും ഇലക്ഷന്‍ രംഗം പ്രക്ഷുബ്ധമാക്കുന്നു", "കേരളം കണ്ട ഏറ്റവും വലിയ അഴിമതി വീരന്‍", "എസ്എന്‍സി ലാവലിന്‍ ഇടപാടിലൂടെ 374.5 കോടി രൂപയുടെ അഴിമതി നടത്തിയ പിണറായി വിജയന് സിംഗപ്പൂരില്‍ ഭാര്യയുടെ പേരില്‍ കമല ഇന്റര്‍നാഷണല്‍ എക്സ്പോര്‍ട്ടിംഗ് കമ്പനി ഉണ്ടെന്ന വിവരം ക്രൈം പുറത്തുവിട്ടതോടെ വിഎസിന്റെ നേതൃത്വത്തില്‍ വന്‍മുന്നേറ്റം നടത്തിയ എല്‍ഡിഎഫ് പിന്നോട്ടടിച്ചു" എന്നിങ്ങനെയുളള അപവാദ സാഹിത്യം.

2005 സെപ്തംബര്‍ 22നാണ് ലാവലിന്‍ കേസില്‍ സിബിഐ അന്വേഷണം ആവശ്യപ്പെട്ട് നന്ദകുമാര്‍ ഹൈക്കോടതിയെ സമീപിച്ചത്. ആ ഹര്‍ജിയിലും വാരികയുടെ പല ലക്കങ്ങളിലും നന്ദകുമാര്‍ പിണറായി വിജയനെതിരെ നിരത്തിയ ആരോപണങ്ങള്‍ ഇവയാണ്.

  • അഴിമതിപ്പണം 500 കോടി മുതല്‍ 374.5 കോടി വരെ (തരാതരം പോലെ മാറിമറിയുന്നു).

  • പിണറായി വിജയന് ഭാര്യയുടെ പേരില്‍ സിംഗപ്പൂരില്‍ കമല എക്സ്പോര്‍ട്ട് ഇന്റര്‍നാഷണല്‍ എന്ന ബിനാമി വ്യവസായ സ്ഥാപനമുണ്ട്. കോഴപ്പണം അവിടെയാണ് നിക്ഷേപിച്ചിരിക്കുന്നത്.
  • അന്താരാഷ്ട്ര തലത്തില്‍ അധോലോക ബന്ധമുളള നേതാവാണ് പിണറായി വിജയന്‍. കമല ഇന്റര്‍നാഷണല്‍ അധോലോക ബന്ധമുളള വ്യവസായ സ്ഥാപനമാണ്.
  • കോഴപ്പണത്തിന്റെ നിക്ഷേപത്തെ തുടര്‍ന്ന് നൂറിലേറെ തവണ പിണറായി വിജയന്‍ സിംഗപ്പൂര്‍, ദുബായ് എന്നീ രാജ്യങ്ങള്‍ സന്ദര്‍ശിച്ചിട്ടുണ്ട്.

  • രാറിന്റെ ഭാഗമായി 270 കോടി രൂപ ബ്രോക്കര്‍ ഫീസായി കൈമാറി. ഈ തുകയാണ് കമല എക്സ്പോര്‍ട്ട്സ് ഇന്റര്‍നാഷണലില്‍ നിക്ഷേപിച്ചത്.
  • മലബാര്‍ കാന്‍സര്‍ സെന്റര്‍ നിര്‍മ്മിച്ച ടെക്നിവാലിയ (യഥാര്‍ത്ഥത്തില്‍ ടെക്നിക്കാലിയ) ഒരു ബിനാമി സ്ഥാപനമാണ്. കമല ഇന്റര്‍നാഷണലില്‍ മാത്രമല്ല, ടെക്നിവാലിയയിലും പിണറായി വിജയന് പങ്കാളിത്തമുണ്ട്.

  • പിണറായി വിജയന്‍ സ്വദേശത്ത് ഒരു കോടി രൂപ ചെലവില്‍ ആഡംബര മാളിക പണിയുന്നു.

  • ഒരുകോടി രൂപ ഫീസ് ചെലവുളള കോഴ്സുകള്‍ക്കാണ് പിണറായി വിജയന്റെ മകനും മകളും പഠിക്കുന്നത്.

  • രാറില്‍ ഇടനില നിന്നതിന് സിപിഎം അഖിലേന്ത്യാ സെക്രട്ടറി ഹര്‍കിഷന്‍ സിംഗ് സുര്‍ജിത്തിന്റെ മകന് 25 കോടി രൂപ ലാവലിന്‍ നല്‍കി.
  • കോഴപ്പണം ഉപയോഗിച്ച് എകെജി സെന്റര്‍ നവീകരിക്കുകയും പാര്‍ട്ടി നേതാക്കള്‍ക്ക് ആഡംബര ഫ്ലാറ്റുകള്‍ പണിയുകയും ചെയ്തു.


ഇതൊക്കെയാണ് തന്റെ വാരിക വഴി, ഹൈക്കോടതിയില്‍ നല്‍കിയ ഹര്‍ജികള്‍ വഴി നന്ദകുമാര്‍ പ്രചരിപ്പിച്ചത്. ഈ ആരോപണങ്ങള്‍ കണ്ട് കണ്ണുതളളിയാണ് കേസില്‍ വമ്പന്‍ സ്രാവുകള്‍ ഉണ്ടെന്ന് ഹൈക്കോടതി നിരീക്ഷിച്ചത്. ഇതില്‍ എത്ര ആരോപണങ്ങള്‍ സിബിഐ അന്വേഷണം ശരിവെച്ചു എന്ന് പരിശോധിക്കുമ്പോഴാണ് ഉപജാപകഞരമ്പുകളില്‍ ചോരയുറഞ്ഞുപോയതെന്തുകൊണ്ട് എന്ന് ബോധ്യപ്പെടുന്നത്.

മേല്‍വിവരിച്ച ആരോപണങ്ങളിലൊന്നിനു പോലും അന്വേഷണ റിപ്പോര്‍ട്ടില്‍ സാധൂകരണമില്ലെന്നത് തിരിച്ചറിഞ്ഞ നന്ദകുമാര്‍ 2009 ആഗസ്റ്റ് 4ന് ചെന്നൈയിലെ സിബിഐ ആസ്ഥാനത്തേയ്ക്ക് ഒരുകത്തയച്ചു. മറുപടി കാണാഞ്ഞപ്പോള്‍, സെപ്തംബര്‍ 5ന് ഒരോര്‍മ്മപ്പെടുത്തലും.. കത്തില്‍ അക്കമിട്ടു നിരത്തിയ ആരോപണങ്ങളില്‍ ആദ്യത്തെ മൂന്നെണ്ണം താഴെ കൊടുക്കുന്നു....

  • 1. Mr. Pinarayi Vijayan had made more than 100 visits to Singapore and Dubai secretly for the transaction of bribery money and for his other business deals (most of which is illicit). You can get a clear picture of the travel details if you go through the passport details of Pinarayi Vijayan between 1996 and 2009. I have information that Vijayan has two passports, a Kochi based one and the other based out of Chennai. I also have information about Vijayan surrendering one of his passports as soon as the CBI investigation against him started.

  • 2. Mr. Dileep Rahulan and Mr. Nazar worked as mediators in the SNC Lavalin deal. In accordance with the mutual understanding between Rahulan, Nazar and Pinarayi Vijayan, the then Electricity Minister of Kerala agreed to sign the unlawful agreement with SNC Lavlin company without inviting any global tenders. The deal took place without a proper consent from the then government or the KSEB. What more, a feasibility study was not even conducted and the agreement was signed flouting all existing rules and practices. According to the agreement entered in to between the said Parties, SNC Lavalin had paid the margin money and commission to Dileep Rahulan on behalf of Pinarayi Vijayan. Dileep in turn paid the amount to Pinarayi and some others in return for the commission that was promised to him by Pinarayi.

  • 3. Mr. Dileep Rahulan had paid 8 crores of Indian currency to Pinarayi Vijayan (for CPI(M)) through Mr. Nazar. I also have information that Nazar had paid this money back to Pinarayi Vijayan and Vijayan had stored this money in AKG Centre Trivandrum for several days. This money was also used for the renovation of AKG centre and for the construction of some new flats near AKG centre for the Secretariat members of the CPM. Some of the money was also channeled to the Party-run Kairali news channel.

ഈ ഓര്‍മ്മപ്പെടുത്തലും സിബിഐ അവഗണിച്ചപ്പോള്‍ 2010 ജനുവരി 28ന് ആരോപണങ്ങള്‍ വീണ്ടും ഹര്‍ജിയുടെ രൂപത്തില്‍ പ്രത്യേക സിബിഐ കോടതിയിലെത്തി. ഹര്‍ജിയ്ക്കുളള
പ്രതികരണത്തിലാണ് പിണറായി വിജയന്‍ ഇടനിലക്കാരില്‍ നിന്ന് പണം വാങ്ങിയതിന് തെളിവില്ലെന്ന് സിബിഐ ബോധിപ്പിച്ചത്. അക്കമിട്ടു നിരത്തിയ ആരോപണങ്ങള്‍ക്ക് നേര്‍ക്കുനേരെ മറുപടിയും കിട്ടി. പുകമറയും സാങ്കേതികജഡിലതയും തെല്ലുമേയില്ല ഇത്തവണ. പണം വാങ്ങിയെന്ന് നേരിട്ട് ആരോപിച്ചു, അതിന് തെളിവോ തെളിവിലേയ്ക്ക് നയിക്കുന്ന സൂചനകളോ ഇല്ലെന്ന് അന്വേഷണ സംഘം തെളിച്ചു പറഞ്ഞു. സത്യവാങ്മൂലത്തില്‍ നിന്ന്...

Regarding the illegal money transaction alleged to be made between the mediators and the A7 as that of SNC Lavlin are not supported with any valid clues so as to form the basis of collecting evidence against them in this regard.


100 തവണ സിംഗപ്പൂരിലേയ്ക്കും ദുബായിലേയ്ക്കും പറന്നുവെന്ന ആരോപണത്തെക്കുറിച്ച് സിബിഐ പറയുന്നതിങ്ങനെ....

Further regarding the alleged kickbacks and frequent visits of Pinarayi to Singapore and Dubai, that too more than 100 times, for which the petitioner claims to have represented before IA, divulging the details and the same was ignored by the agency is also far from truth. No valid details or clues in this aspect were furnished so as to form the basis of collecting evidence in this regard.

കമല ഇന്റര്‍നാഷണല്‍, ടെക്നിക്കാലിയ, ഒരു കോടിയുടെ വീട്, മകന്റെ വിദ്യാഭ്യാസ ചെലവ് തുടങ്ങിയ വിഷയങ്ങളിലുളള ആരോപണങ്ങള്‍ അടിസ്ഥാനരഹിതമാണെന്ന് കേന്ദ്ര ആദായ നികുതി വകുപ്പ് 2008ല്‍ തന്നെ കേരള ഹൈക്കോടതിയില്‍ സത്യവാങ്മൂലം സമര്‍പ്പിച്ചു. അതായത് സിബിഐയുടെ അന്തിമ റിപ്പോര്‍ട്ട് വരുന്നതിന് മുമ്പേ തന്നെ ആ കഥകള്‍ പൊളിഞ്ഞുവെന്ന് അര്‍ത്ഥം.

അങ്ങനെ ലാവലിന്‍ അഴിമതിക്കേസ് അഴിമതിയില്ലാത്ത കേസായി മാറി. സ്വന്തം നാട്ടില്‍ കാന്‍സര്‍ ആശുപത്രി സ്ഥാപിക്കാന്‍ ശ്രമിച്ചതും, കാര്‍ത്തികേയന്റെ കരാറുമായി മുന്നോട്ടു പോകാന്‍ മന്ത്രിയെന്ന അധികാരമുപയോഗിച്ച് ഉത്തമതാല്‍പര്യത്തോടെ കൈക്കൊണ്ട ഭരണപരമായ തീരുമാനവും "ഗൂഢാലോചന"യുടെയും "വഞ്ചന"യുടെയും പരിധിയില്‍ വരുമോയെന്ന കാര്യം സുപ്രിംകോടതി തീരുമാനിക്കും. സിബിഐയിലെ ഉണ്ടിരുന്ന പോലീസുകാര്‍ക്ക് കാര്‍ത്തികേയന്‍ "ഫൗണ്ടര്‍ ഓഫ് ദി കോണ്‍സ്പിറസി" ആയതു മുതല്‍ ഗൂഢാലോചനയുടെ ഗുണഫലം പറ്റാത്തതുകൊണ്ട് തൊട്ടടുത്ത നിമിഷം പ്രതിപ്പട്ടികയില്‍ നിന്നൊഴിവായതു വരെയുളള സംഭവങ്ങളുടെ നാനാര്‍ത്ഥങ്ങള്‍ അടക്കം കേസിന്റെ രാഷ്ട്രീയ വിവക്ഷകളെക്കുറിച്ചുളള ചര്‍ച്ച പൊതുസമൂഹത്തിലും നിര്‍ബാധം അരങ്ങേറും.

രാഷ്ട്രീയ എതിരാളികളും ഉപജാപകരും മെനഞ്ഞ അപവാദകഥകളെ അടിസ്ഥാനമാക്കി ഒരു രാഷ്ട്രീയനേതാവിനെ ഭരണകൂടത്തിന്റെ അധികാരം ഉപയോഗിച്ച് കോടതി നടപടികളുടെ നൂലാമാലകളില്‍ കുരുക്കുന്നതിനെതിരെ സിപിഎം നടത്തിയ സന്ധിയില്ലാ സമരം അനന്യമായ ഒരു ചരിത്രാനുഭവമായി തിരിച്ചറിയുമ്പോഴാണ് പുതിയ വേഷങ്ങള്‍ രംഗപ്രവേശം ചെയ്യുന്നത്.

ഒരു രൂപയെങ്കിലും പിണറായി വിജയന്‍ കോഴ കൈപ്പറ്റിയെന്നൊരു വാചകം സിബിഐയില്‍ നിന്ന് കേള്‍ക്കാന്‍ മോഹിച്ചവരെ നിരാശരാക്കുന്ന അന്വേഷണ റിപ്പോര്‍ട്ടും കുറ്റപത്രവും ഒടുവിലത്തെ സത്യവാങ്മൂലവും അനിവാര്യമാക്കുന്നത് ഒരു ദൃക്സാക്ഷിയെയാണ്. വര്‍ഷങ്ങള്‍ നീണ്ട അന്വേഷണത്തിന്റെ ഒരുഘട്ടത്തില്‍ പോലും രംഗപ്രവേശം ചെയ്യാതിരുന്ന ദൃക്‍സാക്ഷി ചെന്നൈയിലെ പൊരിവെയിലില്‍ പെട്ടെന്നൊരു നിമിഷം പൊട്ടിമുളച്ചത് വെറുതേയല്ല. ക്രൈം നന്ദകുമാര്‍ മുതല്‍ പി സി ജോര്‍ജുവരെയുളളവരുടെ അശ്രാന്തപരിശ്രമമുണ്ട് ഈ സ്വയംഭൂവിന്റെ പിറവിയ്ക്ക് പിന്നില്‍. മൊഴി, നന്ദകുമാറിന്റെ വാര്‍ത്ത, ജോര്‍ജിന്റെ പത്രസമ്മേളനം, അതുവഴി മുഖ്യധാരാ മാധ്യമങ്ങളിലേയ്ക്ക് മാന്യമായ എന്‍ട്രി. ഒരു സത്യന്‍ അന്തിക്കാട് ചിത്രത്തിലെ നായകപ്രവേശത്തിന് തുല്യമായ ലാളിത്യം. ദീപക് കുമാറിന്റെ മൊഴി വേണ്ടിവന്നാല്‍ പരിശോധിക്കുമെന്ന് സിബിഐയും വ്യക്തമാക്കിയതോടെ അവതാരവേഷം ദീര്‍ഘനിശ്വാസം വിട്ടു.


"അഭിഭാഷകന്റെ കേസ് ഡയറി" എന്ന എസ് എന്‍ സ്വാമി - കെ മധു ചിത്രത്തില്‍ കൊലപാതകം നേരിട്ടു കാണുന്ന ഐ വിറ്റ്നസിനെ നിര്‍മ്മിക്കുന്ന അഭിഭാഷക കൗശലം ചിത്രീകരിക്കുന്നുണ്ട്. ലാവലിന്‍ കേസില്‍ പിണറായി വിജയന്‍ പണം കൈപ്പറ്റിയെന്നതിന് ഒരു തെളിവുമില്ലെന്നും തെളിവുകളിലേയ്ക്ക് നയിക്കുന്ന ഉപയോഗപ്രദമായ സൂചനകള്‍ പോലുമില്ലെന്നും സിബിഐയ്ക്കു തന്നെ വിളിച്ചു പറയേണ്ടി വന്നപ്പോള്‍, പണം കൈമാറുന്നത് നേരില്‍ കണ്ട ഒരു ദൃക്സാക്ഷി തയ്യാറായി. ഇരുളില്‍ നിന്ന് പൊടുന്നനെ ഒരു ഐ വിറ്റ്നസ്. അയാളാണ് ദീപക് കുമാര്‍.

ദിലീപ് കുമാറിന് നിലമൊരുക്കിയതും നന്ദകുമാര്‍ തന്നെ. കണ്ണൂരിന്റെ വിവിധ ഭാഗങ്ങളില്‍ വെച്ച് പിണറായിയ്ക്ക് ദിലീപ് രാഹുലന്‍ പണം കൈമാറിയിട്ടുണ്ടെന്ന് നന്ദകുമാര്‍ ആരോപിക്കുന്നു, അത് നേരിട്ട് താന്‍ കണ്ടിട്ടുണ്ടെന്ന അവകാശവാദവുമായി പിന്നാലെ ദീപക് കുമാര്‍ എന്നൊരാള്‍ സിബിഐ ഓഫീസിലേയ്ക്ക് സ്വമേധയാ നടന്നു ചെല്ലുന്നു. പുരഞ്ജയത്തില്‍ തുടങ്ങി സൗഭദ്രമായി മാറുന്ന പുതിയൊരു പൂത്തൂരം അടവ്. അയാള്‍ തിരുവനന്തപുരം സ്വദേശിയെന്ന് മനോരമ, ചെന്നൈ സ്വദേശിയെന്ന് മംഗളം. ടെക്നിക്കാലിയ നടത്തുന്ന കാലത്ത് ദിലീപ് രാഹുലനൊപ്പം ജോലി ചെയ്തിരുന്നയാളെന്ന് മനോരമയും മാതൃഭൂമിയും പറയുമ്പോള്‍, ദിലീപ് രാഹുലന്റെ അടുത്ത സുഹൃത്താണ് വ്യവസായിയെന്ന് മംഗളം. എന്തു വ്യവസായമാണ് ചെയ്തതെന്നോ ചെയ്യുന്നതെന്നോ ഒരു പത്രത്തിലുമില്ല. ബിസിനസില്‍ വഞ്ചന കാട്ടിയതു കാരണം ദിലീപ് രാഹുലനുമായി തെറ്റിപ്പിരിഞ്ഞെന്ന് മനോരമ . എന്തു വ‍ഞ്ചനയെന്നില്ല, വഞ്ചനയ്ക്കെതിരെ കേസോ വഴക്കോ ഉണ്ടോയെന്നില്ല, ആളിനിപ്പോള്‍ എന്താണ് ജോലിയെന്നില്ല, ഊരും വിലാസവും ഇല്ലേയില്ല. എങ്കിലും, നിനച്ചിരിക്കാതെ കൈവന്ന ബമ്പര്‍ സൗഭാഗ്യത്തിന്റെ ആഘോഷം ഏഴുകോളത്തിലാണ് മനോരമ ആടിത്തിമിര്‍ത്തത്.

സാക്ഷിയുടെ രംഗപ്രവേശം ഉദ്ദേശിച്ച ഫലം ചെയ്തുവെന്ന് വേണം കരുതാന്‍. തെളിവുകള്‍ സിബിഐ മറച്ചുവെച്ചുവെന്ന ആരോപണത്തോടെയാണ് മംഗളം വാര്‍ത്ത പ്രസിദ്ധീകരിച്ചത്. ആരോപണങ്ങള്‍ വാസ്തവമാണെന്ന് ബോധ്യപ്പെട്ടാല്‍ ലാവലിന്‍ കേസിന്റെ ഗതി മാറുമെന്ന് മനോരമ പ്രവചിക്കുന്നു. (കേസിന്റെ ഗതി മനോരമ ഉദ്ദേശിച്ച രീതിയിലല്ല മുന്നേറുന്നതെന്ന് വ്യംഗ്യം). ഗതി മാറ്റണമെങ്കില്‍ ദൃക്‍സാക്ഷീനിര്‍മ്മാണം അനിവാര്യം. പൊരിവെയിലില്‍ പ്രത്യക്ഷപ്പെട്ട പെരുങ്കളളന്‍ ആരുടെയൊക്കെ അനിവാര്യതയായിരുന്നുവെന്ന് അറിയുക.

പിണറായി വിജയന്‍ ഇടനിലക്കാരില്‍ നിന്ന് പണം കൈപ്പറ്റിയതായോ സാമ്പത്തിക ലാഭം ഉണ്ടാക്കിയെന്നതിനോ തെളിവില്ലെന്ന സിബിഐയുടെ സത്യവാങ്മൂലം അനിവാര്യമാക്കുന്നത് മറ്റൊരു സംശയമാണ്. എന്തുകൊണ്ടാണ് ഈ വിവരം അന്വേഷണറിപ്പോര്‍ട്ടിന്റെ ഭാഗമായി സിബിഐ ഉള്‍പ്പെടുത്താത്തത്? കാര്‍ത്തികേയന്‍ സാമ്പത്തികലാഭമുണ്ടാക്കിയില്ലെന്നും ഗൂഢാലോചനയുടെ ഗുണഫലം കൈപ്പറ്റിയില്ലെന്നും എടുത്തു പറഞ്ഞ സിബിഐയ്ക്ക്, പിണറായി വിജയന്‍ സാമ്പത്തിക ലാഭമുണ്ടാക്കിയെന്നതിന് തെളിവോ തെളിവിലേയ്ക്ക് നയിക്കുന്ന സൂചനകളോ ഇല്ലെന്ന് വെളിപ്പെടുത്താന്‍ അന്വേഷണ റിപ്പോര്‍ട്ട് സമര്‍പ്പിച്ചതിന് ശേഷം 11 മാസം വേണ്ടി വന്നു. ഇതിനിടയില്‍ പിണറായി വിജയനെക്കുറിച്ച് പുതിയ ഒരന്വേഷണവും ഈ ഏജന്‍സി നടത്തിയിട്ടില്ല. ഈ സത്യവാങ്മൂലത്തിന്റെയും അടിസ്ഥാനം പഴയ അന്വേഷണ റിപ്പോര്‍ട്ട് തന്നെയാണ്. അന്വേഷണത്തില്‍ വെളിപ്പെട്ട പ്രതിയെ സംബന്ധിക്കുന്ന ഏറ്റവും സുപ്രധാനമായ കണ്ടെത്തല്‍ എന്തുകൊണ്ട് റിപ്പോര്‍ട്ടില്‍ എന്തുകൊണ്ട് ഉള്‍പ്പെടുത്തപ്പെട്ടില്ല എന്നറിയാന്‍ മറ്റൊരു സിബിഐ അന്വേഷണം തന്നെ വേണ്ടി വരും!

സിപിഎം എന്ന രാഷ്ട്രീയകക്ഷിയുടെ സംസ്ഥാന സെക്രട്ടറിയായി പ്രവര്‍ത്തിക്കുന്നുവെന്ന ഒറ്റക്കാരണം കൊണ്ട് ഇന്ത്യയിലെ ഒരു രാഷ്ട്രീയ നേതാവും അനുഭവിക്കേണ്ടി വന്നിട്ടില്ലാത്ത വിധം മാരകവും അശ്ലീലവുമായ ആരോപണങ്ങള്‍ക്കാണ് പിണറായി വിജയന്‍ വിധേയനാവുന്നത്. അദ്ദേഹത്തിന്റെ ഭാര്യയെയും മകനെയും വരെ പ്രതികളാക്കി നന്ദകുമാര്‍ ഹൈക്കോടതിയില്‍ പരാതി നല്‍കിയിട്ടുണ്ട്. പിണറായി വിജയന്‍ എന്ന സിപിഎം നേതാവിന്റെ ഭാര്യയോ മക്കളോ ആയിപ്പോയി എന്ന കാരണത്താലാണ് കമലടീച്ചറും വിവേകും വീണയുമൊക്കെ കോടതി കയറിയിറങ്ങേണ്ടി വന്നത്.

തികച്ചും ദരിദ്രമായ കുടുംബത്തില്‍ പിറന്ന് ബാല്യത്തിലും കൗമാരത്തിലും പിന്നാക്കാവസ്ഥയുടെ മുഴുവന്‍ കയ്പും അനുഭവിച്ച്, ത്യാഗസമ്പൂര്‍ണമായ പൊതുപ്രവര്‍ത്തനത്തിലൂടെ കേരളത്തിലെ ഏറ്റവും വലിയ രാഷ്ട്രീയ പ്രസ്ഥാനത്തിന്റെ അമരത്തെത്തിയ പിണറായി വിജയനെയും കുടുംബത്തെയും സവര്‍ണത കൊത്തിപ്പറിക്കുകയാണ്. അപവാദങ്ങളുടെയും കെട്ടുകഥകളുടെയും നിലയ്ക്കാത്ത പ്രവാഹം ഈ മനുഷ്യനെതിരെ ആര്‍ത്തിരമ്പുകയും അതിന് മദിച്ചു പുളച്ചൊഴുകാന്‍ അധികാരസവര്‍ണത അത്യാഹ്ലാദത്തോടെ ചാലുകീറുകയും ചെയ്യുമ്പോള്‍ ലാവലിന്‍ കേസ് പ്രത്യാക്രമണത്തിന്റെ ഇതിഹാസമാവുക തന്നെ വേണം.

ഇത്രമാത്രം കെട്ടുകഥകള്‍ പത്രങ്ങള്‍ സംഘടിതമായി മെനഞ്ഞ് പ്രചരിപ്പിച്ച മറ്റൊരനുഭവം മലയാളിയ്ക്ക് അപരിചിതമാണ്. കേവലം കമ്മ്യൂണിസ്റ്റ് പാര്‍ട്ടിയുടെ സെക്രട്ടറി പദം വഹിക്കുന്നു എന്നതു മാത്രമല്ല അപവാദപ്പിറവിയ്ക്ക് കാരണം. അപവാദത്തിന്റെ അക്ഷകീലം ചെത്തുതൊഴിലാളിയുടെ മകന്‍ അങ്ങനെ വളരേണ്ടെന്ന സവര്‍ണ നിശ്ചയം തന്നെയാണ്. ആരോപണങ്ങള്‍ നിര്‍മ്മിക്കുന്നവരുടെ, തൊണ്ടതൊടാതെ വിഴുങ്ങുകയും പ്രചരിപ്പിക്കുകയും ചെയ്യുന്നവരുടെ, ഒന്ന് തകരുമ്പോള്‍ മറ്റൊന്നിനുവേണ്ടി തലപുകയ്ക്കുന്നവരുടെ, കേസിന്റെ ഗതിവിഗതികള്‍ക്കു വേണ്ടി ജീവിതം ഉഴിഞ്ഞുവെച്ചവരുടെ സാമൂഹ്യപശ്ചാത്തലം നിശിതമായ വിചാരണയര്‍ഹിക്കുന്നു. സിപിഎമ്മിനുളളില്‍ രൂപപ്പെട്ട കേവലമായ ഗ്രൂപ്പുതാല്‍പര്യങ്ങളെ അതിസമര്‍ത്ഥമായി പൊതുസമൂഹത്തിലെ സവര്‍ണത ഹൈജാക്ക് ചെയ്തു കഴിഞ്ഞു. ഒരിക്കലും പിണറായി വിജയന് കേരളത്തിന്റെ മുഖ്യമന്ത്രിയാകാന്‍ കഴിയില്ലെന്ന് ആശ്വാസത്തോടെ ആത്മഗതം ചെയ്യുന്നവരുടെ ഉളളിലിരിപ്പിന് ഫ്യൂഡല്‍ വേരുകളുണ്ട്.

ചാനലുകളില്‍, പത്രങ്ങളില്‍, കോടതികളില്‍, ജനസമ്മതിയുടെ ഓരോ നിര്‍മ്മിതികേന്ദ്രത്തിലും ചുറ്റിപ്പടര്‍ന്ന സവര്‍ണ നീരാളികള്‍ തന്നെയാണ് പിണറായി വിജയനെ വേട്ടയാടുന്നത്.

31 comments:

മാരീചന്‍‍ said...

തികച്ചും ദരിദ്രമായ കുടുംബത്തില്‍ പിറന്ന് ബാല്യത്തിലും കൗമാരത്തിലും പിന്നാക്കാവസ്ഥയുടെ മുഴുവന്‍ കയ്പും അനുഭവിച്ച്, ത്യാഗസമ്പൂര്‍ണമായ പൊതുപ്രവര്‍ത്തനത്തിലൂടെ കേരളത്തിലെ ഏറ്റവും വലിയ രാഷ്ട്രീയ പ്രസ്ഥാനത്തിന്റെ അമരത്തെത്തിയ പിണറായി വിജയനെയും കുടുംബത്തെയും സവര്‍ണത കൊത്തിപ്പറിക്കുകയാണ്.

Radheyan said...

Peculiar eye witness-സാധാരണഗതിയില്‍ കോടതിയില്‍ വില്‍ക്കുന്ന ചരക്കല്ല,(കോടതിയില്‍ വില്‍ക്കുകയല്ല, ആളെ നാറ്റിക്കുകയാണ് ഉദ്ദേശമെന്നറിയാം).ക്രോസിലൊന്നും പിടിച്ച് നില്‍ക്കില്ല,എന്തിന് ഒരു പത്രസമ്മേളനത്തില്‍ പോലും.

സത്യത്തില്‍ ഈ കേസ് ഏതാണ്ട് തീര്‍ന്നു കഴിഞ്ഞു.അത് കോടതിയാണ് പ്രഖ്യാപിക്കേണ്ടത് എന്ന സാങ്കേതികത മാത്രമാണ് അവശേഷിക്കുന്നത്. അതു വരെ പിണറായി പണം വാങ്ങിയതിന് തെളിവില്ല എന്ന് റിപ്പോര്‍ട്ട് ചെയ്യാം (ധ്വനി:പണം വാങ്ങി, തെളിവില്ല എന്നേ ഉള്ളൂ,പക്ഷെ പണം വാങ്ങി എന്ന് ഞങ്ങള്‍ക്കുറപ്പാണ്).

ആര് വാങ്ങി എങ്ങനെ വന്നു,ആര്‍ കൊണ്ടു വന്നു,എവിടെ വെച്ചു കൊടുത്തു,എങ്ങോട്ട് കൊണ്ടു പോയി എന്ന് തെളിയിക്കാനായില്ലെങ്കില്‍ സാമ്പത്തിക നേട്ടമുണ്ടാക്കിയതായി കുറ്റം ചാര്‍ത്താനാകില്ല.സാമ്പത്തിക നേട്ടമുണ്ടാക്കിയതായി തോന്നാത്തത് കൊണ്ടാണ് സി ബി ഐ ആദ്യം ജി കാര്‍ത്തികേയനെ ഒഴിവാക്കിയത്. പക്ഷെ ഒരു തോന്നലില്‍ കാര്‍ത്തികേയന് കിട്ടിയ ക്ലീന്‍ ചിറ്റ് അന്വേഷണം കഴിഞ്ഞിട്ടും പിണറായിക്ക് നല്‍കാന്‍ അവര്‍ തയ്യാറല്ല.

ഇവിടെയാണ് തെങ്ങിന്‍ മുകളിലെ കള്ളന്‍ കൊലപാതകം കണ്ടു എന്ന പെക്യൂലിയര്‍ സാക്ഷി മൊഴി. അതിലൂടെ കേസ് അറ്റ്ലീസ്റ്റ് ജനസമക്ഷമെങ്കിലും പിടിച്ച് നിര്‍ത്താമോ എന്ന കച്ചിതുരുമ്പാണീ സാക്ഷി. എസ് എന്‍ സ്വാമിയുടെ സിനിമകള്‍ സ്ഥിരമായി കാണുന്നുണ്ട് പിസിയും നന്ദകുമാറും പിന്നെ അയാളെ പോറ്റുന്ന “വീരന്‍‌”മാരും എന്ന് തോന്നുന്നു.കളിക്കളം,അഭിഭാഷകന്റെ കേസ ഡയറി എന്ന 2 സിനിമയില്‍ വരുന്നുണ്ട് ഇ കഥാപാത്രം.( ഇനി പള്ളിവാസല്‍ ഡാമില്‍ നിന്ന് പിണറായിയുടെ ഡമ്മി ഇടണം എന്ന് നന്ദകുമാരന്‍ പറയുമോ എന്നറില്ല).

suraj::സൂരജ് said...

നന്ദകുമാറിനെപ്പോലൊരു പരനാറി പുതിയുഗനവാബുരാജേന്ദ്രനായി അവതരിക്കുമ്പോള്‍ എന്തു തന്നെ സംഭവിച്ചുകൂടാ !! ദീപക് കുമാറെന്ന പുതു അവതാരത്തിന്റെ കഥമെനഞ്ഞപ്പോള്‍ സിന്‍ഡിക്കേറ്റിനു വലിയ പിഴവുകള്‍ പറ്റി : ഇയാള്‍ ടെക്നിക്കാലിയയിലെ സ്റ്റാഫായിരുന്നോ, ലാവലിനിലെ സ്റ്റാഫായിരുന്നോ, ചെന്നൈക്കാരനാണോ തിരുവനന്തപുരക്കാരനാണോ എന്ന കണ്‍ഫ്യൂഷനുകള്‍ തരാതരം പോലെ വന്നത് അതുകൊണ്ടാവണം. മാത്രമോ ? അണ്ണന്റെ ‘മൊഴി’ പത്രപൂന്നാരകള്‍ റിപ്പോട്ട് ചെയ്തതിലും തമാശ ലാവിഷാണ് - ഒരിടത്ത് കേള്‍ക്കുന്നു പണം കൈമാറിയത് കൈത്തറി ആപ്പീസിലെന്ന്, പിന്നെ സഹകരണ ആശുപത്രിയിലെന്ന്, പിന്നെ കേള്‍ക്കുന്നു ഗസ്റ്റ് ഹൌസിലെന്ന്..... ഇത്തവണ കോ-ഓഡിനേഷന്‍ പോയി അണ്ണന്മാരേ.... സാരമില്ല.... ഇതിന്റെ ട്രൌസറും ഉടനെ കീറും.... അടുത്ത ഒറ്റക്കണ്ണന്‍ “സാച്ചി”യെ റെഡിയാക്കി വച്ചേക്കണം.... “ലാവലിനഴിമതിയില്‍ സി.ബി.ഐക്കും പങ്ക് ” എന്നൊരു പഞ്ചായത്തിലക്ഷന്‍ സ്പെഷ്യല്‍ ലക്കത്തിനായി മൊണ്ണവായനക്കാര്‍ കാത്തിരിക്കുന്നു.... എന്തര് പറയാന്‍ വീരേന്ദ്രന് ചെക്കെഴുതാനേ ഇപ്പം നേരമുള്ളൂ..പാവം !

ജനശക്തി said...

ആര്‍ക്കും ക്ലീന്‍ ചിറ്റ് നല്‍കിയില്ല എന്നതിനു അമിതപ്രാധാന്യം നല്‍കിയും, തെളിവില്ലെന്ന് ആവര്‍ത്തിച്ചതും, നന്ദകുമാറിനെ വിമര്‍ശിച്ചതും ഒഴിവാക്കി വാര്‍ത്ത നല്‍കി പത്രങ്ങള്‍ ‘മാനം കാത്തിട്ടുണ്ട്‘. ദൃക്‌സാക്ഷി രംഗത്ത് വരുമ്പോള്‍ അതിനനുസരിച്ച് രംഗപടം ഒരുക്കിക്കൊടുക്കേണ്ടതുണ്ടല്ലോ..:)

ക്ലീന്‍ ചിറ്റ് നല്‍കി എന്ന് ഏതെങ്കിലും കോടതിക്ക് മുന്‍പാകെ ഏതെങ്കിലും അന്വേഷണ ഏജന്‍സിക്ക് പറയാന്‍ കഴിയുമെന്ന് / അവര്‍ പറയുമെന്ന് വിശ്വസിക്കണമെങ്കില്‍ അതൊരു ഒന്നര വിശ്വാസം ആയിരിക്കണം. ‘തങ്ങള്‍ ആര്‍ക്കും 'ക്ളീന്‍ ചിറ്റ്' നല്‍കിയിട്ടില്ല. അക്കാര്യത്തില്‍ കോടതിയാണ് തീരുമാനമെടുക്കേണ്ടത്‘ എന്നതിലെ ‘അക്കാര്യത്തില്‍ കോടതിയാണ് തീരുമാനിക്കേണ്ടത് എന്നത് നൈസായി പത്രങ്ങളില്‍ നിന്ന് ഒഴിവായി. ഇന്നലെ സി.ബി.ഐ പറഞ്ഞത് ഇന്ന് വീണ്ടുവിചാരത്തിന്റെ പുറത്ത് മാറ്റിപ്പറഞ്ഞു (അതായത് ഇന്ന് സത്യം പറയുന്നെന്ന്..) എന്ന് പ്രചരിപ്പിച്ച് കാര്യങ്ങള്‍ ലൈവാക്കി നിര്‍ത്താനാണ് ശ്രമം. ഒന്നരാടന്‍ ദിനങ്ങളില്‍ വീണ്ടുവിചാരം നടത്തി മാറ്റി മാറ്റി കാര്യങ്ങള്‍ പറയണമെങ്കില്‍ അതൊരു ഒന്നര സി.ബി.ഐ ആയിരിക്കണം. സി.ബി. ഐയുടെ വിശ്വാസ്യതയെ സംബന്ധിച്ച സംശയങ്ങളെ ഇങ്ങനെ സ്ഥിരീകരിക്കുന്നവര്‍ സി.ബി.ഐയെ പിണറായി വിജയനെതിരെ ഉപയോഗിക്കുന്നവര്‍ തന്നെ എന്നത് രസകരം തന്നെ.

സാമ്പത്തികമായി നേട്ടമുണ്ടാക്കിയതിനു തെളിവില്ല എന്ന് മറ്റാരെക്കുറിച്ചെങ്കിലുമായിരുന്നു സി.ബി.ഐ കോടതിയില്‍ പറഞ്ഞിരുന്നതെങ്കില്‍ കോടതിക്ക് പുറത്ത് അതിന്റെ അര്‍ത്ഥം ക്ലീന്‍ ചിറ്റ് നല്‍കി എന്നു തന്നെയാണെന്ന് ഇവരൊക്കെ വ്യാഖ്യാനിക്കുമായിരുന്നു. ഇതിപ്പോള്‍ പിണറായി ആയിപ്പോയി..തെളിവില്ലെങ്കിലും തൂക്കിക്കൊല്ലപ്പെടേണ്ടവന്‍.(ചെത്തുതൊഴിലാളിയുടെ മകന്‍ ചെത്തിയാല്‍ മതി പൊതുരംഗത്ത് കാര്യങ്ങളൊക്കെ ഭംഗിയായി നിര്‍വഹിച്ച് ‘ചെത്തിനടക്കേണ്ട‘ എന്നത് പിന്നാമ്പുറത്തുണ്ടെന്നതും ആലോചിക്കേണ്ട വിഷയം.)

നന്ദകുമാര്‍ ഇനി പത്രങ്ങളുടെ ഉള്‍പ്പേജിലോ മറ്റോ ഒതുങ്ങും. അയാള്‍ പറഞ്ഞതിനു തെളിവില്ലാതായ സ്ഥിതിക്ക് തെളിവു കൈയിലുള്ള പുതിയ അവതാരങ്ങള്‍ ഒന്നാം പേജുകള്‍ കൈയടക്കും.

പഞ്ചായത്ത് തെരഞ്ഞെടുപ്പാണ് വരുന്നത്..മറക്കരുത്..

ജനശക്തി said...
This comment has been removed by the author.
കിരണ്‍ തോമസ് തോമ്പില്‍ said...

ലാവ്‌ലിന്‍ കേസിന്റെ ഒരു ഭാഗം മാത്രമെ സി.ബി.ഐ അന്വേഷിച്ചിട്ടുള്ളൂ എന്നാണ്‌ സി.ബി.ഐ പറഞ്ഞത് എന്നാണ്‌ മനോരമ വായിച്ചാല്‍ തോന്നുക ഈ വരികള്‍ നോക്കൂ

സംസ്ഥാന സര്‍ക്കാരിനു നഷ്ടം വരുത്തി ലാവ്ലിന്‍ കമ്പനിക്ക് 86 കോടി രൂപയുടെ അനര്‍ഹമായ ലാഭമുണ്ടാക്കാന്‍ പിണറായി വിജയനടക്കമുള്ളവര്‍ ഗൂഢാലോചന നടത്തിയതായുള്ള കേസിലാണു സിബിഐ അന്വേഷണം നടത്തിയത്.


ലാവ്ലിന്‍ ഇടപാടില്‍ ആരെല്ലാം, ആരോടെല്ലാം കോഴവാങ്ങിയെന്നത് ഇപ്പോള്‍ സിബിഐയുടെ അന്വേഷണ പരിധിയിലില്ല. കോടതി നിര്‍ദേശിച്ചാല്‍ ഇക്കാര്യം അന്വേഷിക്കുമെന്നും സ്പെഷല്‍ പ്രോസിക്യൂട്ടര്‍ വി.എന്‍. അനില്‍കുമാര്‍ ബോധിപ്പിച്ചു. ലാവ്ലിന്‍ കേസില്‍ ആരെങ്കിലും കോഴ വാങ്ങിയതിനു വ്യക്തമായ തെളിവുകള്‍ ലഭിച്ചാല്‍ ഇക്കാര്യം സിബിഐ നേരിട്ടു കോടതിയെ അറിയിക്കും.


ഇത് വായിച്ചാല്‍ എന്താണ്‌ തോന്നുക. ഇതുവരെ അന്വേഷിച്ചില്ല. ഇനി തെളുവകള്‍ കുറേ വരുന്നുണ്ട് വേണമെങ്കില്‍ അന്വേഷിക്കും. അതിനൊരു വേറെരു അന്വേഷണം കൂടി തരപ്പെടണം. ഇപ്പോള്‍ ലാവ്‌ലിന്‌ 86 കോടി ലാഭമുണ്ടായത് മാത്രമാണ്‌ വിഷയം. അതില്‍ കാര്‍ത്തികേയന്‌ നേട്ടമുണ്ടായില്ല പിണറായിക്ക് തലശ്ശേരിയില്‍ 1/4 പൂര്‍ത്തിയായ ക്യാന്‍സര്‍ സെന്റര്‍ അവിഹിത നേട്ടമായി കിട്ടി.അതുകൊണ്ട് പിണറായി 7ആം പ്രതിയായി

Swasthika said...

മനോരമ പത്രം ലിങ്ക് ഒന്ന് വായിക്കൂ, ഇങ്ങനെ കാണാം....
"ആരോപണം നേരിടുന്ന ടെക്നിക്കാലിയ കമ്പനിയുടെ നടത്തിപ്പുകാരായ ദിലീപ് രാഹുലന്‍, നാസര്‍, ബീന അബ്രാഹം എന്നിവരുടെ കൂടെ ജോലി ചെയ്ത കാലത്താണ് കോഴ ഇടപാടിനു സാക്ഷി ആയതെന്നു ദീപക് കുമാര്‍ പറയുന്നു...."

ഏറ്റവും വലിയ തമാശ ഈ ചെറ്റ മാധ്യമങ്ങള്‍ എത്ര അലസതയോടെ ആണ് തറ നിലവാരത്തില്‍ വാര്‍ത്ത കൈകാര്യം ചെയ്യുന്നത് എന്നതാണ്. ലാവലിന്‍ കരാര്‍ കാലത്ത് ദിലീപ് രാഹുലന്‍ ലാവലിന്റെ ഏഷ്യാ പസഫിക് മാനജര്‍ ആയിരുന്നു. പിന്നെ എങ്ങനെ ആണ് "ടെക്നിക്കാലിയ കമ്പനിയുടെ നടത്തിപ്പുകാരായ ദിലീപ് രാഹുലന്‍ " ഉദയം ചെയ്യുന്നത് എന്നത് ചിന്തനീയം . ഇങ്ങനെ മൊത്തം വൈരുധ്യം ആ വാര്‍ത്തയില്‍ കാണാം. കൊച്ചിയിലെ "അയ്യപ്പന്‍ കാവിലെ ഒരു ബാങ്ക്" വഴി പിന്നെ "കൊല്ലത്തെ ബാങ്ക്" വഴി ഒക്കെ പണമെത്തി !!! ഇതെന്താ അപസര്‍പ്പക കഥയോ ? അയ്യപ്പന്‍ കാവിലെ ഏതു ബാങ്ക്? തുറന്നു പറയെടോ, ജനമറിയട്ടെ . കൃത്യമായി ജനം ഒന്നും അറിയരുത്, എന്നാല്‍ പുകമറ വേണം താനും. ഈ തരം പൊഹ ആണ് ലാവലിന്‍ കേസ്. ഇനിയും പൊഹ വരും.ജാഗ്രതൈ.

ജിവി/JiVi said...

ദൃക്‌സാക്ഷി ടെക്ക്നിക്കാലിയയില്‍ ഉദ്യോഗസ്ഥനായിരുന്നെന്ന് മറ്റൊരു പത്രം. അതായത് ദിലീപ് രാഹുലനും ദൃക്‌സാക്ഷിയും റ്റെക്നിക്കാലിയയില്‍ ഒരുമിച്ച് ജോലിചെയ്തിരുന്നവരാണെന്ന്! സംഗതി ക്ലിയറല്ലേ.

ഗസ്റ്റ് ഹൌസിലും പറശ്ശിനി മഠപ്പുരയിലും വെച്ച് കോഴ കൈമാറിയ കാര്യം ഇതുവരെയും ദൃക്‌സാക്ഷി രംഗപ്രവേശം ചെയ്യാതിരുന്നതുകൊണ്ട് സി ബി ഐക്ക് വിവരം കിട്ടിയിരുന്നില്ല. ശരി. പക്ഷെ അയ്യപ്പന്‍ കാവിലെയും കൊച്ചിയിലെയും ബാങ്ക് വഴി പണം ട്രാന്‍സ്ഫര്‍ ചെയ്തത് സി ബി ഐയെ അറിയിക്കാനും ദൃക്‌സാക്ഷിതന്നെ വേണമാ...

ജനശക്തി said...

ഇനി അയ്യപ്പന്‍ കാവിലെയും കൊച്ചിയിലെയും ബാങ്ക് ബ്രാഞ്ചുകളും പിണറായിയുടെ ബിനാമിയാണെന്നു വരുമോ?

സുനിൽ കൃഷ്ണൻ(Sunil Krishnan) said...

ജനശക്തീ,

ഇനി ഈ പിണറായി, സി.ബി ഐക്കും പണം കൊടുത്തു എന്നായിരിക്കും അടുത്ത കണ്ടെത്തല്‍ !

Radheyan said...

2 ചോദ്യങ്ങള്‍ക്കാണ് ഉത്തരം അന്വേഷകര്‍ കണ്ടെത്തേണ്ടത്.
1. അഴിമതി നടന്നോ എന്ന്? നടന്നെങ്കില്‍ എപ്രകാരം?.- അത് തെളിയിക്കാന്‍ കഴിഞ്ഞില്ല.കാരണം ഇല്ലാത്ത പെണ്ണിന്റെ വല്ലാത്ത ഗര്‍ഭം തെളിയിക്കാന്‍ കഴിയില്ല എന്നത് തന്നെ.(ഗര്‍ഭമില്ലെന്നത് ബന്ധപ്പെട്ടില്ല എന്നതിന് തെളിവല്ലെന്ന് വീരഫൂമി, ഞാനാണ് ഉറയിട്ട് കൊടുത്തതെന്ന് വേറൊരുത്തന്‍)

2. പ്രൊപ്രൈറ്റി- മന്ത്രി എന്ന നിലയില്‍ ഉത്തമവിശ്വാസത്തിലാണോ തീരുമാനം എടുത്തത്. ആ തീരുമാനം ഖജനാവിന് നഷ്ടമുണ്ടാക്കിയോ?- അതിന് ഉത്തരം കരാര്‍ ഒപ്പിട്ടില്ലായിരുന്നുവെങ്കില്‍ എന്ത് പ്രത്യാഘാതം ഉണ്ടാകുമായിരുന്നു എന്ന് തീരുമാനമാക്കുകയാണ്.ഫലം അന്താരാഷ്ട്ര കോടതിയില്‍ നഷ്ടപരിഹാര കേസ് നടത്തേണ്ടി വരും.

ഇനി അപ്രകാരം ഒരു കേസിന് പിണറായി ഇടയാക്കിയിരുന്നുവെങ്കിലും പിണറായുയെ വെറുതേ വിടില്ലായിരുന്നു.യുഡി‌എഫിന്റെ കരാറില്‍ നിന്നു പിണറായി പിന്‍‌വാങ്ങിയതിനാല്‍ ഖജനാവിന് 500 കോടി നഷ്ടപരിഹാരം നല്‍കേണ്ടി വന്നു, അത്തരം ഒരു സാഹചര്യം കാശ് വാങ്ങി അദ്ദേഹം മനപൂര്‍വ്വം സൃഷ്ടിച്ചു എന്നാകുമായിരുന്നു ആരോപണം.

പെരുന്നാളായാലും മന്ത്രവാദമായാലും കോഴിക്ക് കിടക്കപൊറുതിയില്ലെന്ന മട്ടിലാണ് പിണറായിയുടെ കാര്യം.

സുനിൽ കൃഷ്ണൻ(Sunil Krishnan) said...

ഈ കേസ് തുടങ്ങിയിട്ട് എത്രകാലമായി..ഇത്രനാളും ഇരുട്ടില്‍ മറഞ്ഞിരിക്കുകയായിരുന്നോ ഈ ദൃക്‌‌സാക്ഷി?സി.ബി.ഐ ഈ കേസന്വേഷണവുമായി മുന്നോട്ടു പോയപ്പോളൊക്കെ ഈ “സാക്ഷി” എവിടെയായിരുന്നു?ഒരു കുറ്റകൃത്യം നടന്നത് കണ്ടയാള്‍ ഇത്ര കാലം അതു മറച്ച് വയ്ക്കുന്നത് നിയമപരമായി ശരിയാണോ?

ഐ.പി.സിയിലെ ഈ വകുപ്പ് ഇവിടെ എങ്ങനെ ബാധകമാകും?

IPC 202
Intentional omission to give information of offence by person bound to inform

"Whoever, knowing or having reason to believe that an offence has been committed, intentionally omits to give any information respecting that offence which he is legally bound to give, shall be punished with imprisonment of either description for a term which may extend to six months, or with fine, or with both."

നിയമം നിയമത്തിന്റെ വഴിക്കു പോയാല്‍ ദീപക്കണ്ണന്റെ കാര്യം കുഴയുമോ?

മനനം മനോമനന്‍ said...
This comment has been removed by the author.
മനനം മനോമനന്‍ said...

സ. പിണറായിയെ ക്രൂശിച്ചവർക്ക് ഇപ്പോൾ എന്തുണ്ട് പറയാൻ? അറിയാം, അവറ്റകൾക്ക് ഒരു കോപ്പും പറയാനുണ്ടാകില്ല; എങ്കിലും....... എവിടേ, ആ ചെറ്റകളൊക്കെ? അങ്ങനെ വിളിച്ചതിൽ തെല്ലും കുറ്റബോധമില്ല. എപ്പോഴെങ്കിലും അതു മോശമായിപ്പോയെന്നു തോന്നുന്നെങ്കിൽ അപ്പോൾ എഡിറ്റു ചെയ്ത് നീക്കിക്കൊള്ളാം. എന്നിട്ട് അതിനേക്കാൾ നികൃഷ്ടമാ‍യ മറ്റൊരു പദം ചേർത്തുകൊള്ളാം.

എവിടേ, സ. പിണറായി വിജയനെ ലാവ് ലിന്റെ പേരിൽ കൊന്നു കൊലവിളിച്ച പറട്ടപ്പരിഷകൾ?

അറിവുകളിലൂടെയും അനുഭവങ്ങളിലൂടെ ആർജ്ജവം നേടിയ, ചങ്കൂറ്റത്തിന്റെ പ്രതീകമായ, ഇരുത്തം വന്ന, കരുത്തനായ ഒരു ജനനേതാവിനെ യാതൊരു തെളിവുകളുടെയും പിൻബലമില്ലാതെ അഴിമതി ആരോപണങ്ങളും വ്യക്തിഹത്യയും നടത്തിയ മാധ്യമ പുംഗവന്മാർ ഇപ്പോൾ പൊട്ടൻ കളിക്കുകയാണോ? എങ്കിൽ ആ ചെവികൾ കുത്തിപ്പറിക്കണം.! എവിടെ മാർക്സിസ്റ്റ് വിരുദ്ധകടിബാധിച്ച് സ്വയം ചൊറിഞ്ഞു നാറിയവർ? മൂക്കറ്റം കുടിച്ച് അപരന്റെ മോന്തയിൽ ശർദ്ദിച്ചിട്ട് അവരെ വൃത്തിഹീനർ എന്നു പരിഹസിക്കുന്ന നാറികൾ എല്ലാക്കാലത്തും ഉണ്ടായിട്ടുണ്ട്. . ഇത്തരം നികൃഷ്ട ഭാഷകളിൽ അല്ലാതെ ഇക്കൂട്ടരെക്കുറിച്ച് സംസാരിക്കാൻ കഴിയില്ല. മൃദുവായ ഭാഷാ പദങ്ങളൊന്നും അവർ അർഹിക്കുന്നില്ല. കാരണം സ. പിണറായിക്കും സി.പി.എമ്മിനും എതിരെ അവർ സംസാരിച്ച ഭാഷ അത്രയ്ക്ക് ജുഗുത്സാവഹമായിരുന്നു.

തങ്ങൾ ഇത്രയും കാലം പറഞ്ഞുപരത്തിയ കല്ലുവച്ച നുണകളിൽ ഒന്നു പശ്ചാത്തപിക്കാൻ പോലും തയ്യാറാകാത്ത നീചവർഗ്ഗം. ഇനിയും രാഷ്ട്രീയ ഭാവിയുള്ള ഒരു നേതാവിന്റെ ദേഹത്ത് കണ്ണിൽകണ്ട ചെളിയെല്ലാം വാരിയെറിഞ്ഞ് കളങ്കപ്പെടുത്തിയ നികൃഷ്ട ജീവികൾ. ഒരു മനുഷ്യൻ സി.പി.എമ്മുകാരൻ ആയിപ്പോയതിന് ഇത്രയധികം ക്രൂരത കാണിയ്ക്കണമായിരുന്നോ? ഇപ്പോൾ ഇടതുപക്ഷ പിന്തുണയുള്ള ഒരു ഗവർണ്മെന്റെങ്ങാനുമാണ് കേന്ദ്രത്തിൽ ഉണ്ടായിരുന്നതെങ്കിൽ സി.ബി.ഐയെ സ്വാധീനിച്ചെന്നു പ്രചരിപ്പിച്ചേനെ! ഇതുവരെ സ.പിണറായിയെ അപകീർത്തിപെടുത്തിയതു മൂലം അദ്ദേഹത്തിന് വ്യക്തിപരമായും രാഷ്ട്രീയവുമായും ഉണ്ടായ കഷ്ട നഷ്ടങ്ങൾക്ക് ആരു സമാധാനം പറയും?

ലാവ്ലിന്റെ പേരു പറഞ്ഞ് പെരുമ്പറപ്പത്രങ്ങളുടെ പത്രനാമത്തെക്കാ‍ൾ വലിയ തലക്കെട്ടുകളിൽ മുൻപേജിൽതന്നെ ഫുൾപേജ് വാർത്തകൾ ചമച്ചവർ, പിണറായി കുറ്റക്കാരനല്ലെന്ന സി.ബി.ഐ വെളിപ്പെടുത്തലുകൾ ഗൌരവമുള്ള ഒരു വർത്തയായേ കണ്ടില്ല. അതുകൊണ്ട് അവ ഉൾപേജുകളിൽ ചെറു കോളങ്ങളിൽ ഒളിപ്പിച്ചു വയ്ക്കുകയായിരുന്നു. ചിലർക്കങ്ങനെയാണ്. അപരന്റെ മുണ്ടുരിയുന്നതിലാണുത്സാഹം.അവർ മുണ്ടുടുത്തു നിൽക്കുന്നത് അവർക്ക് കൌതുകമുള്ള കാഴ്ചയാകില്ലല്ലോ.അതവർക്ക് കണ്ടുനിൽക്കാനുമാകില്ല.

പിണറയിയെ പിന്തുണച്ച് ആരെങ്കിലും വല്ലതും പറഞ്ഞു പോയാൽ കൊളുകൊളുത്ത വായിൽ പൂളിച്ച തെറികളുമായി ചാടിവീണ കോളാംബികൾക്കെന്തേ ഇപ്പോൾ നാവിറങ്ങിപ്പോയോ? ഇടതു പക്ഷത്തിനനുകൂലമായി പാവങ്ങളാരെങ്കിലും ബ്ലോഗെഴുതിപ്പോയാൽ ബ്ലോഗെഴുത്തിന്റെ “ശാസ്ത്രീയ വശങ്ങൾ“ പഠിപ്പിക്കാനിറങ്ങുന്ന ബൂലോക കാരണവന്മാർക്കും എന്തു സംഭവിച്ചുവെന്നറിയില്ല.ചിലർക്ക് പിണറായിയെയോ സി.പി.എമ്മിനെയോ അനുകൂലിച്ച് ബ്ലോഗെഴുതുന്നതു തന്നെ എന്തോ വലിയ അപരാധമാണെന്ന മട്ടാണ്. സി.പി.എമ്മിനെയോ അതിന്റെ നേതാക്കളെയോ അനുകൂലിച്ച് പോസ്റ്റെഴുതുന്നത് കുറ്റകരമാണെന്ന് ബ്ലോഗിന്റെ സേവന ദാതാക്കളായ ഗൂഗിൾ കമ്പനി അവരുടെ ബ്ലോഗു നിയമാവലിയിലൊന്നും പറഞ്ഞിട്ടുള്ളതായി കാണുന്നില്ല.

സ. പിണറായിയെ കുറ്റക്കാരനായി ചിത്രീകരിച്ച് ബ്ലോഗിലൂടെയും മറ്റ് മാധ്യമങ്ങളിലൂടെയും പ്രചരണം നടത്തിയവർ ആരെങ്കിലും ഖേദം പ്രകടിപ്പിക്കുമോ, മാപ്പ് പറയുമോ എന്നൊക്കെ അറിയാൻ ഈയുള്ളവന് അതിയായ കൌതുകമുണ്ട്. മാപ്പല്ല, കോപ്പാണ് പറയുകയെന്ന് അറിയാഞ്ഞിട്ടുമല്ല! അല്ലെങ്കിൽ അമ്മാതിരി പോക്കിരി എഴുത്തുകൾ ബ്ലോഗിലായാലും മറ്റു മാധ്യമങ്ങളിലായാലും മേലിൽ എഴുതാതെയെങ്കിലും ഇരിക്കണം.

Unny Chandrasenan said...

I have been supporting Pinarayi in all these alleged corruption cases.I know how power hungry and divisive VS is, who has never oppossed his son's ascendance to COIR FED while he has never ever be part of the CPM struggles.
But I still cant understand Mareechan's comment about the Upper caste political connection in this case. Its done by and supported by the so called downtroden(the toddy tapper section has vanished and they are all neo-rich: time for another land reforms and social distribution of wealth again in Kerala)section. Media headed by all are part of this conspiracy and biggest support comes from none other than VS( by his silence).

വിജി പിണറായി said...

'ആരോപണം നേരിടുന്ന ടെക്നിക്കാലിയ കമ്പനിയുടെ നടത്തിപ്പുകാരായ ദിലീപ് രാഹുലന്‍, നാസര്‍, ബീന അബ്രാഹം എന്നിവരുടെ കൂടെ ജോലി ചെയ്ത കാലത്താണ് കോഴ ഇടപാടിനു സാക്ഷി ആയതെന്നു' മഹാത്മാ ‘സാക്ഷി’! ഈ പറഞ്ഞ ദിലീപ് രാഹുലന്‍ ലാവലിന്റെ പ്രതിനിധിയായിരുന്നു എന്ന് സി ബി ഐ. ലാവലിന്റെ പ്രതിനിധി എന്ന നിലയില്‍ ചര്‍ച്ചകളില്‍ പങ്കെടുത്ത വിദ്വാന്‍ ടെക്‍നിക്കാലിയയുടെ നടത്തിപ്പുകാരനും ആയിരുന്നോ? ആണെങ്കില്‍ അത് സി ബി ഐ അറിഞ്ഞില്ലേ? (ടെക്‍നിക്കാലിയ കമ്പനിയോ അവരുടെ പ്രതിനിധികളോ കേസില്‍ പ്രതികളല്ല.) കാന്‍സര്‍ സെന്ററിനുള്ള പണം കേസിലെ സുപ്രധാന ഘടകമാണെന്നിരിക്കെ സെന്ററിന്റെ പണി നടത്തിയ സ്ഥാപനത്തിന്റെ നടത്തിപ്പുകാര്‍ ആരൊക്കെ എന്നു പോലും അന്വേഷിക്കാതെയാണോ ആവോ സി ബി ഐ റിപ്പോര്‍ട്ടിയത്? അതോ ‘മഹാത്മാ സാക്ഷി’യുടെ മൊഴി ഒഴികെ മറ്റു യാതൊരു തെളിവും അവശേഷിപ്പിക്കാതെയാണോ രാഹുലനണ്ണന്‍ ‘ടെക്നിക്’ നടത്തിക്കൊണ്ടു പോയിരുന്നത്? ഇനി അതുമല്ല, സി ബി ഐക്ക് ടെക്‍നിക്കാലിയയില്‍ (വിജയനെപോലെ) ‘ബിനാമി ഓഹരി’ ഉണ്ടോ ആവോ?

ആ... അതൊക്കെ പോട്ടെ. കോഴപ്പണത്തിന്റെ പങ്ക് ഉപയോഗിച്ച് രാഹുലനും കൂട്ടുകാരും ദുബായില്‍ ‘പസഫിക് കണ്‍‌ട്രോള്‍സ്’ എന്ന പേരില്‍ ഒരു സ്ഥാപനം കെട്ടിപ്പൊക്കിയെന്നും ‘സാക്ഷി മഹാശയ്’ പറഞ്ഞിട്ടുണ്ടത്രേ! അല്ലപ്പാ... കോഴ കിട്ടിയത് വിജയനാണോ അതോ രാഹുലനും കൂട്ടുകാര്‍ക്കുമോ? സ്വന്തം സ്റ്റാഫിന് ‘കോഴ’ കൊടുക്കാന്‍ തക്ക ‘ഗതികേടില്‍’ ആയിരുന്നോ ലാവലിന്‍? ഇക്കണക്കിനു ലാവലിന്റെ തലപ്പത്തിരിക്കുന്ന ക്ലോഡ് ട്രെന്‍‌ഡിലിന്റെ കാനഡയിലെ വസതിയും കോഴയുടെ പങ്കുപയോഗിച്ച് പണിതതാണെന്നു കൂടി പറയാഞ്ഞത് ഭാഗ്യം!

വിജയ്ന് മന്ത്രിയായിരുന്ന കാലത്താണ് കോഴ കൈമാറ്റം നടന്നതത്രേ! ആ കാലം കഴിഞ്ഞിട്ട് ഇപ്പോള്‍ പതിനാലു കൊല്ലത്തോളമായി. ഇക്കാലമത്രയും സാക്ഷി മഹാശയ് ‘വനവാസ’ത്തിലായിരുന്നോ ആവോ? ‘മകനേ (ദീപക്) കുമാര നീ കാട്ടില്‍ വസിക്കണം എണ്ണിപ്പതിനാലു വര്‍ഷം’ എന്ന് വല്ല ‘അഭിനവ കൈകേയി’മാരും പറഞ്ഞിരുന്നോ? ആര്‍ക്കറിയാം! ഇത്രയും ഗുരുതരമായ ഒരു കുറ്റകൃത്യം നടന്നതിന് ദൃക്‌‌സാക്ഷിയായിരിക്കുകയും 200 പേജോളം തെളിവുകള്‍ കൈവശം ഉണ്ടായിരിക്കുകയും ചെയ്തിട്ടും 2003 മാര്‍ച്ചില്‍ തുടങ്ങിയ കേസ് 2010 ഏപ്രിലില്‍ ‘സാമ്പത്തിക ഇടപാടിന് തെളിവില്ല’ എന്ന സി ബി ഐ സത്യവാങ്‌മൂലത്തില്‍ എത്തി നില്‍ക്കുവോളം കൊല്ലം ഈ തെളിവുകള്‍ ‘പൂഴ്ത്തി വെച്ച’യാളെ ‘സാക്ഷി’ എന്നല്ല, ‘പ്രതി’ എന്നല്ലേ വിളിക്കേണ്ടത്?

Rajeeve Chelanat said...

തത്ക്കാലം ഒരു ക്ലീന്‍ ചിട്ട് നല്‍കിയെന്നു വിചാരിച്ച് സമാധാനിക്കാന്‍ വരട്ടെ മാരീചന്‍..ഈ സി.ബി.ഐ.തന്നെ നാളെ ഇത് മാറ്റിപ്പറഞ്ഞുവെന്നും വരാം.. അതിന്റെ ഒരു സൂചന ഇന്നത്തെ ചില പത്രങ്ങളില്‍ കാണാനും കഴിഞ്ഞു. ഇത്തരം രഹസ്യാന്വേഷണസംഘങ്ങളെത്തന്നെ സംശയത്തോടെയല്ലാതെ കാണാന്‍ പറ്റില്ല എന്നായിരിക്കുന്നു. എന്തായാലും തത്ക്കാലത്തേക്കെങ്കിലും ഈ പിതൃശൂന്യര്‍ക്കുള്ള മറുപടി കിട്ടിയല്ലോ എന്ന് സമാധാനിക്കാം. കമ്മ്യൂണിസ്റ്റുകാര്‍ക്കെതിരെ ഇതിലും വലിയ ഉപജാപങ്ങള്‍ അണിയറയില്‍ നടക്കുന്നുണ്ടായിരിക്കും എന്ന് എപ്പോഴും ഓര്‍മ്മയും വേണം. അതിനെതിരെയായിരിക്കണം നമ്മുടെ ജാഗ്രത. അഭിവാദ്യങ്ങളോടെ

പ്രാവ് said...

വീര-നന്ദ-പിസി കൂട്ടുകെട്ടിലെ ഒരു കപ്പലില്‍ക്കള്ളനായ അച്ചുമ്മാന്‍ ഇതുവരെ വാ തുറന്നിട്ടില്ല. “ഉപ്പു തിന്നവന്‍ വെള്ളം കുടിക്കുമെന്ന“ അത്ഭുതം പുറത്തുവിട്ട മുതിര്‍ന്ന കമ്യൂണിസ്റ്റല്ലെ!!!

ASok said...

congrats mareechan.

cloth merchant said...

അതിഭീകരമായിരുന്നു ഈ ഗൂധാലോചന.ഈ ആരോപണത്തില്‍ പെട്ട് പോയ പാര്‍ട്ടി പ്രവര്‍ത്തകരും അല്ലാത്തവരുമായ എത്രയോ പേര്‍.
ആണ് തൊട്ടിന്നു വരെ ഈ കാര്യം പറഞ്ഞു എത്രയോ പേരുമായി തര്ക്കിച്ചിരിക്കുന്നു.
ഒരു കാരണവശാലും സി പി ഐ എമ്മിന് അതിന്ടെ നേതാക്കള്‍ക്ക് അഴിമാതിക്ക്കാരാവാന്‍ പറ്റില്ല എന്ന വിശ്വാസം മാത്രമല്ല ഇതൊരു നാടകമാണെന്നും അന്നേ ഉറപ്പായിരുന്നു.
നല്ല എഴുത്ത് മാരീചന്‍.ഇങ്ങനെ ഒക്കെ ഉള്ള ഒരു മിന്നാ മിന്നി വെളിച്ചം എങ്കിലും ഇല്ലെങ്കില്‍ ഈ ഇരുട്ട് എത്ര ഭീകരമാവുമായിരുന്നു

ramachandran said...

പിണറായി വിജയനാണ് കേരള കംമുനിസതിന്റെ അന്തകന്‍ എന്ന രൂപത്തില്‍ വ്യപകമായ കള്ള പ്രചാരവെലെകള്‍ നടത്തി അഴിമതിക്കാരനെന്നും,കള്ളപനക്കരെനെന്നും ,സുഘലോലുപനെന്നും, ഗുണ്ടയെന്നും ,നിരന്തരം വര്ത്തകൊടുത്തുകൊണ്ട് .കേരളിയ പൊതുബോധത്തിന്റെ വ്യജ നിര്‍മിതിയില്‍ ജുഗുപ്സപരമായ പങ്കു നിര്‍വഹിച്ച മുഘ്യിയധാര മാധ്യമങ്ങളുടെ,വലതുപക്ഷ ഭിക്ഷംദേഹികളുടെ ,ബ്ലോഗുലോകത്തെകൂലിദാസസംഘങ്ങളുടെ ,ഒറ്റുകാരുടെ, അഞ്ചാം പത്തികളുടെ , കുട്ടയ്മയെ ജനകിയ വിചാരനകുല്ല
സമയം അതിക്രമിച്ചിരിക്കുന്നു. കൂട്ട ബഹിഷ്കരനമട്ങ്ങുന്ന പ്രതിഷധ രൂപങ്ങള്‍ക്കും ജനകിയ കാമ്പയിനുകള്‍ക്കും രൂപം കൊടുത്തുകൊണ്ടും ,വ്യക്തിയെ നശിപ്പിച്ചാല്‍ പ്രസ്ഥാനത്തെ നശിപ്പിക്കാം എന്നുള്ള ഒളിയജണ്ടകേലെ ,ചെറുത്തു തോല്‍പ്പിക്കാനുള്ള അതിശകത്മായ തുറന്നു കട്ടലുകള്‍ക്കുംവിധ്യ്മക്കേണ്ടത് നാടിന്‍റെ നന്മക്കും പുരോഗതിക്കും ഒഴിച്ചുകൂടതതാണ് ,ജനം നെല്ലുംപതിരും തിരച്ചറിയുന്ന അവസ്ഥ സംജതമാക്കുക...

Jijo said...

ലാവ്‌ലിൻ:‘എല്ലാ വശങ്ങളും സിബിഐ അന്വേഷിക്കണം’. നന്ദകുമാറിന്റെ ഹർജി തള്ളി വാർത്തക്ക് മനോരമയുടെ തലക്കെട്ട്. “സം‌സ്ഥാന സർക്കാറിന് 86 കോടി രൂപയുടെ നഷ്ടമുണ്ടാക്കിയ ലാവ്‌ലിൻ അഴിമതി കേസിന്റെ എല്ലാ വശങ്ങളും ഭീതിയോ പ്രീതിയോ കൂടാതെ സിബിഐ അന്വേഷിക്കണമെന്ന് പ്രത്യേക കോടതി." രണ്ടാമത്തെ പാരഗ്രാഫിന്റെ ഇടയിൽ ഹർജി തള്ളിയ കാര്യം വെറുതെ ഒന്ന് പരാമർശിച്ച് പോകുന്നു.

ഭാഷയെ എങ്ങിനെയൊക്കെ ഉപയോഗപ്പെടുത്താം എന്ന് അച്ചായനെ കണ്ട് പഠിക്കണം. ഇത് ഒരു നടയ്ക്ക് പോകുന്ന ലക്ഷണമില്ല.

Jijo said...
This comment has been removed by the author.
ജനശക്തി said...

ഭാഷ കൊണ്ടുള്ള കളി തുടരും എന്നതില്‍ തര്‍ക്കമില്ല. എന്നാലും .....

‘ലാവലിന്‍ കേസില്‍ ഇപ്പോള്‍ ഉണ്ടായിരിക്കുന്ന ആശയക്കുഴപ്പം’ എന്ന് മനോരമീയന്‍ പ്രയോഗം കഴിഞ്ഞ ദിവസം ഉണ്ടായിരുന്നു. കേസ് ‘അരച്ചു കലക്കിക്കുടിച്ചിട്ടുള്ള’, ‘ഭാവനാസമ്പന്നരായ‘ റിപ്പോര്‍ട്ടര്‍മാരുടെയും വിശകലനവിദഗ്ദരുടെയും മനസ്സില്‍ ആശയക്കുഴപ്പം എങ്കില്‍, അത് മനോരമ സമ്മതിക്കണം എങ്കില്‍, സംഭവം അത് തന്നെ.

ലാവലിന്‍ കേസിന്റെ കാറ്റു പോയി!

തെളിവ്:

കഥകള്‍ക്കും വിശകലനങ്ങള്‍ക്കും മ പത്രങ്ങളില്‍ വന്‍ ക്ഷാമം. വാര്‍ത്തക്കൊപ്പം ഒരു കഥ കൂടി ഫ്രീ ആയി കിട്ടിയിരുന്ന ആ നല്ല കാലമൊക്കെ കഴിഞ്ഞ കുറച്ച് ദിവസമായി ഒരു ഓര്‍മ്മ മാത്രമായിരിക്കുന്നു.

വിജി പിണറായി said...

'കേസിന്റെ എല്ലാ വശങ്ങളും ഭീതിയോ പ്രീതിയോ കൂടാതെ സിബിഐ അന്വേഷിക്കണമെന്ന് പ്രത്യേക കോടതി...' പറഞ്ഞു എന്ന് ‘മനോരമ’. എന്നു വെച്ചാല്‍ ഇതു വരെയുള്ള അന്വേഷണം സി ബി ഐ നടത്തിയത് തങ്ങളുടെ ‘തലയ്ക്കു മുകളിലുള്ള’ ‘ആരെക്കുറിച്ചൊക്കെയോ’ ‘ഭീതിയോ പ്രീതിയോ’ സഹിതമായിരുന്നു എന്ന് ഒരു ‘ധനി’ ഇല്ലേ അച്ചായോ...? ഉദ്ദേശിച്ചത് മറ്റൊന്നാണെങ്കിലും അറിയാതെ സത്യം പറഞ്ഞുപോയി...! സാരമില്ലച്ചായോ... നാളെ നമുക്ക് മാറ്റിയെഴുതാം!

suraj::സൂരജ് said...

പുതിയ സാക്ഷി അവതാരത്തിലും നന്ദകുമാരപ്രഭൃതികളുടെ ഉരുണ്ടുകളിയിലും പെട്ട് ജനങ്ങളിലുണ്ടായിരിക്കുന്ന പ്രധാന തെറ്റിദ്ധാരണ ഇതാണ് : “അഴിമതി” നേരിട്ടുകണ്ട പുതിയ ഒരു സാക്ഷി ഉണ്ടായിരിക്കുന്നു, എന്നിട്ടും സി.ബി.ഐ അതേപ്പറ്റി അന്വേഷിച്ചിട്ടില്ല, ഇപ്പോള്‍ കോടതി അതുകൂടി അന്വേഷിക്കാന്‍ ഉത്തരവിട്ടിരിക്കുന്നു !

ഇത് പച്ചക്കള്ളം വീണ്ടും പ്രചരിപ്പിക്കുന്നതിന്റെ ഭാഗമാണ്. ഉടനേ വരും ശക്തിധരന്റെ ജനശക്തിയിലും പൈങ്കിളിക്കമ്യൂണിസ്റ്റ് പത്രികകളിലുമൊക്കെ വിശകലനം.

ഇങ്ങനെയൊരു സാക്ഷിയുണ്ടെന്നും അയാള്‍ക്ക് അഴിമതി നടന്നതിന്റെ കൂടുതല്‍ തെളിവുതരാനാവുമെന്നും കാണിച്ച് ക്രൈംനന്ദകുമാരന്‍ തന്നെ സി.ബി.ഐക്ക് രണ്ടുവട്ടമയച്ച കത്തിന്റെ മറുപടി കൂടിയാണ് “കാശിടപാടിനു തെളിവില്ല” എന്ന സി.ബി.ഐ സത്യവാങ്മൂലം. അതായത് ഈ സാക്ഷി ദീപക് കുമാരന്‍ കണ്ട അഴിമതിക്കഥ സി.ബി.ഐ മൂടോടെ തള്ളിയതാണ് എന്ന് ! നന്ദകുമാരന്‍ സി.ബി.ഐയുടെ സൂപ്പര്‍വൈസര്‍ ചമയേണ്ടതില്ലെന്നും അയാള്‍ ഓരോന്ന് പറയുന്നതു കേട്ടുകേള്‍വിയുടെ അടിസ്ഥാനത്തിലാണ്, അല്ലാതെ തെളിവുണ്ടായിട്ടല്ല എന്നും പച്ചയ്ക്ക് പറഞ്ഞിരുന്നു സി.ബി.ഐ സത്യവാങ്മൂലത്തില്‍. എന്നിട്ടും ഇല്ലാത്ത “സാക്ഷിയുടെ” വല്ലാത്ത മൂട്ടില്‍ തൂങ്ങിക്കിടന്ന് സര്‍ക്കസ് കാണിക്കാന്‍ മനോരമ-മാതൃഭൂമി-മാധ്യമങ്ങള്‍ക്ക് പരവേശം...സ്വന്തം തന്ത പോലും വോട്ടുകൊടുക്കാനറയ്ക്കുന്ന പത്രസമ്മേളനജീവി പി.സി ജോര്‍ജ്ജിന് ഒരു പുണ്ണാക്കും അറിയില്ല, പക്ഷേ വലിയ തൊള്ളയായതുകൊണ്ടും പത്രങ്ങള്‍ക്ക് സമയാസമയം ‘കൊടുക്കാ’നറിയാവുന്നത് കൊണ്ടും ഒരു ലാസ്റ്റ് ട്രൈ നടത്തിനോക്കുകയാണ്, ക്ലച്ച് പിടിക്കുന്നെങ്കില്‍ പിടിക്കട്ടെ എന്ന്.

vaLLuvanaadan said...

Ningalellavarum enthu thanne paranjaalum nanda- veera-manoramaadikal Pinaraayiye udaneyonnum vidunna lakshanamilla.....

ramachandran said...

പോരട്ടങ്ങുളുടെ തീച്ചുളയില്‍ ഗോപുരം പോലെ തലയുയര്‍ത്തി നില്‍ക്കുന്ന , രകതസ്ക്ഷികള്‍ ജീവന്‍ കൊടുത്തു ചുവപ്പിച്ച കണ്നുരിന്റെ പൊന്നോമന പുത്രന്‍ സഗാവ് പിണറായിയെ തകര്‍ക്കാന്‍ ഒരു ശക്തിക്കും കഴിയില്ലെന്ന് കാലം തെന്നെ തെളിയിക്കും.കേരളത്തിലെ തന്തയില്ലാത്ത വീരനും നന്ദകുമാരനും Pc ജോര്‍ജും ജന്ശക്തിധര്നും മാധ്യമ കച്ചവടക്കാരും അവരുടെ നുണക്കഥ കൂട്ടികൊടുക്കലുകള്‍ നടത്തി നെഗളിക്കുമ്പോള്‍ , കേരളമന്നില്‍ നിന്ന് ജന്മി നാടുവാഴി ബ്രട്ടിഷ് കൂടുകെട്ടിനെ തൂതെരിഞ്ഞ പാരമ്പര്യം ഇടനെഞ്ഞില്‍ കനലായി കൊണ്ട് നടക്കുന്ന വിപ്ലവജനത ഒരു നാള്‍ കേരളത്തിന്റെ മണ്ണില്‍ നിന്ന് ഇ വൃത്തികെട്ട ജന്മങ്ങളെ കെട്ടുകെട്ടിക്കും എന്നത് തന്നയാണ് ചുവെരുഴുതുകള്‍ ..... കാതോര്‍ക്കുക.... ഇടിമിന്നലുകളും തീമഴയും ഉപജാപക കൂട്ടങ്ങളുടെ കൊട്ടര്ങ്ങളെ ചാരമാക്കി നാടിനെ വീണ്ടെടുക്കുന്ന സുദിനതിന്നായി........

myvision said...

എന്താ ചെയ്യ.......
മനോരമ നോക്കീട്ട് പിണറായി കുടുങ്ങുന്നില്ല.
മാരീചന്‍ നോക്കീട്ട്‌ രക്ഷപ്പെടുന്നും ഇല്ല.

Anonian said...

വെള്ളത്തില്‍ വളിയിട്ടു ഇപ്പൊ പൊട്ടും, കുടുങ്ങി എന്നൊക്കെ കരുതി കുന്നുകയറിയവര്‍ക്കു ചിന്താ ഭാരം. പിന്നെ ആത്മഗതം. ഏയ്‌, "രക്ഷപ്പെടുന്നും ഇല്ല"

ASOKAN said...

പ്രിയ മാരീചന്‍,

പുല്ലാണേ,പുല്ലാണേ,
വില്ലും ഷാളും പുല്ലാണേ,
എന്ന താങ്കളുടെ ആ പഴയ പോസ്റ്റ്‌ ഒന്നുകൂടി പ്രസിദ്ധീകരിക്കുമോ?