Thursday, July 30, 2015

നീതിയുടെ ബലിപീഠം (ഒന്ന്)

ഓണര്‍ കില്ലിംഗ് (Honour Killing). കുടുംബത്തിന്റെ അഭിമാനം സംരക്ഷിക്കാന്‍ ജനക്കൂട്ടം നടത്തുന്ന പൈശാചിക കൊലയുടെ വിളിപ്പേര്. പ്രണയിച്ച് വിവാഹം കഴിക്കുന്നവര്‍ക്ക് വധശിക്ഷ വിധിക്കുന്ന ജാതിപ്പിശാചുക്കള്‍ സ്വൈരവിഹാരം നടത്തുന്നത് ഉള്‍വനങ്ങളിലെ പരമപ്രാകൃതമായ ഇരുള്‍നിലങ്ങളിലല്ല. ആധുനിക ഇന്ത്യയില്‍, അഭ്യസ്ഥവിദ്യരും സംസ്കൃത ചിത്തരുമായ ജാതിഹിന്ദുക്കള്‍ തിങ്ങിപ്പാര്‍ക്കുന്ന നഗരചത്വരങ്ങളിലും പട്ടണപ്രാന്തങ്ങളിലും.

നാലുപേരെ വെട്ടിക്കൊന്നും രണ്ടുപേരെ മൃതപ്രായരാക്കിയും ജാതിവെറി ആഘോഷിച്ച ദിലീപ് തിവാരിയുടെയും സംഘത്തിന്റെയും കഴുത്തില്‍ നിന്ന് കൊലക്കയര്‍ ഊരിക്കളയാന്‍ സുപ്രിം കോടതി ജഡ്ജിമാര്‍ നിരത്തിയ ന്യായങ്ങള്‍ അപഗ്രഥിക്കാന്‍ ഓണര്‍ കില്ലിംഗ് എന്ന നാട്ടുവഴക്കത്തെ അതിന്റെ എല്ലാ തനിമയോടും കൂടി പരിചയപ്പെടണം. അതുകൊണ്ട്, ഗുഡിയയുടെയും മഹേഷ് സിംഗിന്റെയും അനുഭവം അറിയുക.

ഉത്തര്‍ പ്രദേശിലെ ആഗ്രയ്ക്കടുത്ത് നഹാരയില്‍ ജാതിക്കോടതി വിധിച്ച വധശിക്ഷയ്ക്ക് ഇരയായപ്പോള്‍ ഗുഡിയയ്ക്ക് പ്രായം 18, മഹേഷിന് 20. അമ്മാവന്റെ സംരക്ഷണയില്‍ കഴിഞ്ഞ ഗുഡിയ എന്ന അനാഥപ്പെണ്‍കുട്ടി വികലാംഗനായ മഹേഷുമായി പ്രണയത്തിലാവുകയും 2007 ലെ ഒരു ഫെബ്രുവരി പ്രഭാതത്തില്‍ ഒളിച്ചോടി വിവാഹം കഴിക്കുകയും ചെയ്തു. ബന്ധുവിന്റെ വീട്ടില്‍ ഒളിച്ചുതാമസിച്ച നവദമ്പതിമാരെ നഹാരയിലെ ഠാക്കൂര്‍ പ്രഭുക്കന്മാര്‍ വേട്ടയാടിപ്പിടിച്ച് കെട്ടിവരി‍ഞ്ഞ് കാറിലിട്ട് ജാതിക്കോടതി സമക്ഷം ഹാജരാക്കി. ബന്ധത്തില്‍ നിന്ന് പിന്മാറാനുളള ജാതിക്കോടതിയുടെ ആജ്‍ഞയ്ക്ക് വഴങ്ങാന്‍ കൂട്ടാക്കാത്ത ഗുഡിയയെയും മഹേഷിനെയും തല്ലിച്ചതച്ച് മരക്കൊമ്പില്‍ തൂക്കിക്കൊന്നു. കൊലക്കയറില്‍ പിടഞ്ഞു തീര്‍ന്നിട്ടും കമിതാക്കളുടെ ധിക്കാരം ക്ഷമിക്കപ്പെട്ടില്ല. മൃതശരീരങ്ങളുടെ കഴുത്തറുത്ത് കബന്ധങ്ങള് കഷണങ്ങളായി വെട്ടിപ്പിളര്‍ന്ന് അടുത്തുളള അഴുക്കുചാലിന് സമീപം ചുട്ടെരിച്ച് താക്കൂര്‍പ്പട അവശേഷിച്ച അഭിമാനം കാത്തുസൂക്ഷിച്ചു.

രക്ഷിതാക്കളുടെ ധിക്കരിച്ച് പ്രണയിക്കുന്നവരെ പൈശാചികമായി കൊലപ്പെടുത്തി കുലത്തിന്റെയും കുടുംബത്തിന്റെയും അഭിമാനം സംരക്ഷിക്കുന്ന പ്രവണത റിപ്പോര്‍ട്ട് ചെയ്യപ്പെട്ടു തുടങ്ങിയത് 1993ലാണ്. ഉത്തര്‍പ്രദേശിലെ മുസാഫിര്‍നഗറിലാണ് റിപ്പോര്ട്ട് ചെയ്യപ്പെട്ട ആദ്യസംഭവം നടന്നത്. ഇന്ത്യന്‍ പോപ്പുലേഷന്‍ സ്റ്റാറ്റിസ്റ്റിക്സ് സര്‍വെ 2007ല്‍ നടത്തിയ പഠനം അനുസരിച്ച് കുടുംബാഭിമാന സംരക്ഷണജ്വരത്തില്‍ രക്തസാക്ഷികളായവരുടെ എണ്ണം 655. ഒരോ വര്‍ഷവും കൊല്ലപ്പെടുന്നവരുടെ എണ്ണം ഏറ്റവും കുറഞ്ഞത് നൂറ്.

ജാട്ടുകളുടെ അഭിമാനം സംരക്ഷിക്കാനാണ് 2008 മെയ് 9ന് ജസ്ബീര്‍ സിംഗിനെയും ഭാര്യ സുനിതയെയും കഴുത്തു ഞെരിച്ച് കൊന്നത്. കൊല്ലപ്പെടുമ്പോള്‍ ആറു മാസം ഗര്‍ഭിണിയായിരുന്നു സുനിത. വീട്ടില്‍ നിന്ന് കെട്ടിവലിച്ച് എവിടെയോ കൊണ്ടുപോയി കഴുത്തു ഞെരിച്ച് ജീവനെടുത്ത ശേഷം ജഡങ്ങള്‍ സുനിതയുടെ പിതാവിന്റെ വീട്ടുമുറ്റത്ത് നിരത്തിയിട്ടു. സമൂഹത്തെ ധിക്കരിച്ച് പ്രണയിക്കുന്നവര്‍ക്കും ഒന്നിക്കുന്നവര്‍ക്കും ചോരമരവിപ്പിക്കുന്നൊരു മുന്നറിയിപ്പ്.

ദിലീപ് തിവാരി വധശിക്ഷയ്ക്ക് അര്‍ഹനല്ലെന്ന് വിധിച്ച സുപ്രിംകോടതി ജഡ്ജിമാരുടെ മനോവ്യാപാരം അപഗ്രഥിക്കുന്നതിന് മുമ്പ് വേറൊരു കേസും കോടതിവിധിയും പരിശോധിക്കാം. പരാതിക്കാരിയുടെ പേര് ലതാ ഗുപ്ത. സഹോദരനായ അജയ് പ്രതാപ് സിംഗിനെ ധിക്കരിച്ച് ദില്ലിയിലെ ബ്രഹ്മനാഥ് ഗുപ്തയെന്ന കച്ചവടക്കാരനെ വിവാഹം കഴിച്ചതാണ് ലത ചെയ്ത കുറ്റം.

ലതയോടും ബ്രഹ്മനാഥിനോടും അജയന്റെ പ്രതാപം പൊറുത്തില്ല. അയാളും സംഘവും ബ്രഹ്മനാഥിന്റെ വീട് കയ്യേറി അമ്മയെയും അമ്മാവനെയും ഭീകരമായി മര്‍ദ്ദിച്ചു. വീട്ടുപകരണങ്ങള്‍ തല്ലിത്തകര്‍ത്തു. അന്തേവാസികളെ വീട്ടിനകത്തിട്ട് പൂട്ടി. ആഹാരവും വെളളവും കൊടുക്കാതെ ബ്രഹ്മനാഥിന്റെ ഒരു സഹോദരനെ സ്വന്തം വീട്ടില്‍ അഞ്ചു ദിവസം തടങ്കലിലിട്ടു. വിളകളത്രയും വെട്ടി നശിപ്പിച്ചു. കൃഷിസ്ഥലത്തിന് പുറമേ ബ്രഹ്മനാഥിന്റെ കട കയ്യേറി കച്ചവടവും തുടങ്ങി.

തുടര്‍ന്ന്, തന്റെ സഹോദരിയെ തട്ടിക്കൊണ്ടു പോയി എന്ന് സരോജനി നഗര്‍ പോലീസ് സ്റ്റേഷനില്‍ അജയ് പ്രതാപ് സിംഗ് ഒരു പരാതിയും നല്‍കി. പരാതി കിട്ടിയ പാടെ പോലീസുകാര്‍ കര്‍ത്തവ്യനിരതരായി. ബ്രഹ്മനാഥിന്റെ സഹോദരിമാരെയും ഒരു സഹോദരിയുടെ ഭര്‍ത്താവിനെയും ബന്ധുവിനെയും അറസ്റ്റു ചെയ്ത് ജയിലിലിട്ടു. സഹോദരന്‍ പ്രണയിച്ച് വിവാഹം കഴിച്ചതിന് സഹോദരിമാരും അവരുടെ ഭര്‍ത്തക്കന്മാരും ജയിലില്‍ കിടക്കണമെന്നായിരുന്നു ഏമാന്മാരുടെ തീര്‍പ്പ്. മമതയെന്ന ബ്രഹ്മനാഥിന്റെ ഒരു സഹോദരി ഒരു വയസുളള കുഞ്ഞുമൊത്ത് ഒരു മാസമാണ് ജയിലില്‍ കിടന്നത്.

നീതി തേടി ലതയ്ക്ക് സുപ്രിം കോടതി വരെ പോകേണ്ടി വന്നു. ലഖ്നൗ ചീഫ് ജുഡീഷ്യല്‍ മജിസ്ട്രേറ്റ്, ലഖ്നൗ ഫാസ്റ്റ് ട്രാക്ക് കോടതി (അറസ്റ്റിലായവര്‍ക്കെതിരെ ജാമ്യമില്ലാ വാറണ്ട് പുറപ്പെടുവിച്ചാണ് ഈ കോടതി നീതിവ്യവസ്ഥയുടെ കാവലാളായത് എന്നറിയുക), അലഹബാദ് ഹൈക്കോടതിയുടെ ലഖ്നൗ ബഞ്ച് എന്നിവിടങ്ങളില്‍ നിന്നൊന്നും ലതയ്ക്ക് നീതി കിട്ടിയില്ല. ഇതിനിടയില്‍ കോടതി നിര്‍ദ്ദേശ പ്രകാരം ലതയ്ക്ക് മനോരോഗ വിദഗ്ധരുടെ പരിശോധനയ്ക്കും വിധേയയാകേണ്ടി വന്നു. സ്വേച്ഛയോടെയുളള വിവാഹത്തിന് ഇരുപത്തിയൊന്നാം നൂറ്റാണ്ടില്‍ ഇന്ത്യയിലെ ഒരു പെണ്‍കുട്ടി നല്‍കേണ്ടി വന്ന വിലയെത്രയെന്നാണ് ഈ വിവരിച്ചത്.

സുപ്രിം കോടതിയില്‍ ലതയുടെ കേസ് (Writ Petition 208/2004 dated 07/07/2008) പരിഗണിച്ചത് ജസ്റ്റിസുമാരായ അശോക് ഭാനും മാര്‍ക്കണ്ഡേയ കഠ്ജുവും അടങ്ങിയ ബഞ്ചാണ്. സംഭവപരമ്പര അപഗ്രഥിച്ച് അവര്‍ ഇങ്ങനെ പറഞ്ഞു:

This case reveals a shocking state of affairs. There is no dispute that the petitioner is a major and was at all relevant times a major. Hence she is free to marry anyone she likes or live with anyone she likes. There is no bar to an inter-caste marriage under the Hindu Marriage Act or any other law. Hence, we cannot see what offence was committed by the petitioner, her husband or her husband’s relatives.

We are of the opinion that no offence was committed by any of the accused and the whole criminal case in question is an abuse of the process of the Court as well as of the administrative machinery at the instance of the petitioner’s brothers who were only furious because the petitioner married outside her caste. We are distressed to note that instead of taking action
against the petitioner’s brothers for their unlawful and high-handed acts (details of which have been set out above) the police has instead proceeded against the petitioner’s husband and his relatives.

പ്രായപൂര്‍ത്തിയെത്തിയവര്‍ക്ക് സ്വേച്ഛയോടെ ജീവിക്കാനുളള അവകാശം സുപ്രിം കോടതി അടിവരിയിട്ടുറപ്പിച്ചു. പൗരാവകാശം ഹനിച്ച് കുലാഭിമാനത്തിന് വെഞ്ചാമരം വീശുന്നതല്ല നീതിബോധമെന്ന് തുറന്നടിക്കുന്ന ന്യായാധിപന്മാരും ഇന്ത്യയിലുണ്ട്. ലതാ സിംഗ് അനുഭവിച്ച അനീതിയ്ക്കെതിരെ മാത്രമല്ല, ഹോണര്‍ കില്ലിംഗ് എന്ന പൈശാചികതയ്ക്കു നേരെയും സുപ്രിംകോടതി ഡിവിഷന്‍ ബഞ്ച് ആഞ്ഞടിച്ചു.

The caste system is a curse on the nation and the sooner it is destroyed the better. In fact, it is dividing the nation at a time when we have to be united to face the challenges before the nation unitedly. Hence, inter-caste marriages are in fact in the national interest as they will result in destroying the caste system. However, disturbing news are coming from several parts of the country that young men and women who undergo inter-caste marriage, are threatened with violence, or violence is actually committed on them. In our opinion, such acts of violence or threats or harassment are wholly illegal and those who commit them must be severely punished.

ജസ്റ്റിസുമാരായ അശോക് ഭാനും മാര്‍ക്കണ്ഠേയ കഠ്ജുവും ന്യായാധിപപദവി വഹിക്കുന്ന അതേ സുപ്രിം കോടതിയില്‍ തന്നെയാണ് ജസ്റ്റിസുമാരായ ദീപക് വര്‍മ്മയും വി എസ് സിര്‍പുര്‍ക്കറും വിഹരിക്കുന്നത്. പക്ഷേ, ലതക്കേസ് പരിശോധിച്ച ഡിവിഷന് ബഞ്ച് നടത്തിയ നിരീക്ഷണങ്ങളുടെ അന്തസത്തയും ദിലീപ് തിവാരിയുടെ അപ്പീല്‍ പരിഗണിച്ച ബഞ്ച് എഴുതിവെച്ച അഴകൊഴമ്പന് ന്യായങ്ങളും തമ്മില് തികഞ്ഞ വൈരുദ്ധ്യമുണ്ട്. ഹീനമായ ഒരു കൂട്ടക്കൊലപാതകത്തെ സുപ്രിംകോടതി ന്യായാധിപര്‍ വീക്ഷിച്ചതെങ്ങനെയെന്ന് നോക്കുക.

The caste system is a curse on the nation and the sooner it is destroyed the better. In fact, it is dividing the nation at a time when we have to be united to face the challenges before the nation unitedly. Hence, inter-caste marriages are in fact in the national interest as they will result in destroying the caste system. However, disturbing news are coming from several parts of the country that young men and women who undergo inter-caste marriage, are threatened with violence, or violence is actually committed on them. In our opinion, such acts of violence or threats or harassment are wholly illegal and those who commit them must be severely punished.

ഈ നിരീക്ഷണങ്ങളുടെ അന്തസത്തയും ദിലീപ് തിവാരിയുടെ അപ്പീല് പരിഗണിച്ച ബഞ്ച് എഴുതിവെച്ച അഴകൊഴമ്പന്‍ ന്യായങ്ങളും തമ്മില്‍ അമ്പരപ്പിക്കുന്ന വൈരുദ്ധ്യമുണ്ട്. പ്രായപൂര്‍ത്തിയായ പൗരന്റെ വ്യക്തിസ്വാതന്ത്ര്യമാണ് വിവാഹം എന്നേ പൗരാവകാശത്തെ മാനിക്കുന്ന ഏത് ന്യായാധിപനും പറയൂ. കോടതി പറയുന്നത് കേള്‍ക്കുക.

In our opinion, such acts of violence or threats or harassment are wholly illegal and those who commit them must be severely punished. This is a free and democratic country, and once a person becomes a major he or she can marry whosoever he/she likes. If the parents of the boy or girl do not approve of such inter-caste or inter-religious marriage the maximum they can do is that they can cut off social relations with the son or the daughter, but they cannot give threats or commit or instigate acts of violence and cannot harass the person who undergoes such inter-caste or interreligious marriage.

രക്ഷിതാക്കളുടെ ഇച്ഛയ്ക്കു വിപരീതമായി അന്യമതത്തിലോ ജാതിയിലോ നിന്ന് മകനോ മകളോ വിവാഹം കഴിച്ചാല് കുടുംബാംഗങ്ങള്ക്ക് പരമാവധി ചെയ്യാവുന്നത് മക്കളുമായുളള സാമൂഹ്യബന്ധം വിച്ഛേദിക്കുക മാത്രമാണ് പോംവഴി. അല്ലാതെ വീടുകയറി കുടുംബത്തെയൊന്നാകെ ഉന്മൂലനം ചെയ്യുകയല്ല.

കുലാഭിമാനം തലയ്ക്കു പിടിച്ച ജാതിപ്പിശാചുക്കളുടെ കൊലവെറിയ്ക്കെതിരെ അതിരൂക്ഷമായ മുന്നറിയിപ്പാണ് ലതക്കേസ് പരിഗണിക്കവെ സുപ്രിം കോടതി നടത്തിയത്.

We sometimes hear of ‘honour’ killings of such persons who undergo inter-caste or inter-religious marriage of their own free will. There is nothing honourable in such killings, and in fact they are nothing but barbaric and shameful acts of murder committed by brutal, feudal minded persons who deserve harsh punishment. Only in this way can we stamp out such acts of barbarism.

മനുഷ്യസമൂഹം ഇന്നോളം ആര്‍ജിച്ച മാനവികതയുടെ ഉള്‍ത്തുടിപ്പത്രയും സുപ്രിം കോടതി ഉയര്‍ത്തിപ്പിടിച്ച ഈ നീതിബോധത്തിലുണ്ട്. പൗരാവകാശത്തിന്റെ പവിത്രത അംഗീകരിക്കുന്ന പരിപക്വമായ നിലപാട്. എന്നാല്‍ കയ്യറപ്പും മനശ്ചാഞ്ചല്യവുമില്ലാതെ ആറു പേരെ മൃഗീയമായി വെട്ടിപ്പിളര്‍ന്ന ദിലീപ് തിവാരിയ്ക്കും സംഘത്തിനും നല്‍കിയ വധശിക്ഷ ഇളവു ചെയ്തു കൊണ്ട് ഇതേ സുപ്രിംകോടതിയില്‍ നിന്ന് പുറത്തു വന്ന വിധിന്യായത്തിലെ താഴെ പറയുന്ന വാചകങ്ങളില്‍ ജാതിമദം പൊട്ടിയ കൊലയാനകളുടെ ചിന്നം വിളികേള്‍ക്കാം.

Dilip must have felt morally justified in attacking the family members due to the fact that his younger sister had revolted against the family and got married to Prabhu, a Keralite. Therefore, to preserve the family honour, Dilip had taken the revenge of the so-called insult of his family. It was also pointed out that since Manoj was the resident of the same house, he also may have been persuaded to join the crime as also Sunil who was all through described as the friend of Dilip.

വേറിട്ടു നില്ക്കുന്ന ആ വാചകം ആവര്‍ത്തിച്ചു വായിക്കുക. .. Therefore, to preserve the family honour, Dilip had taken the revenge of the so-called insult of his family. സുപ്രിം കോടതി നിന്ദ്യമായ വികാരമായി നിര്‍വചിച്ച ഫാമിലി ഓണര്‍ എന്ന അതേ പ്രയോഗം കൂട്ടക്കൊലയെ ന്യായീകരിച്ച് മുരളുമ്പോള്‍ ഒരു ജാതിക്കോടതിയുടെ നിലവാരത്തിലേയ്ക്ക് അധപതിക്കുകയാണ് പരമോന്നത നീതിപീഠം. കുലാഭിമാനവും കൊലവെറിയും തലയ്ക്കു പിടിച്ച ജാതിപ്രമുഖന്മാരും തങ്ങളും തമ്മില്‍ ഒരു വ്യത്യാസവുമില്ലെന്ന് ഭയലേശമെന്യേ പ്രഖ്യാപിക്കുകയാണ് ജസ്റ്റിസുമാരായ ദീപക് വര്‍മ്മയും വി എസ് സിര്‍പുര്‍ക്കറും.

(തുടരും)

14 comments:

മാരീചന്‍‍ said...

ഓണര്‍ കില്ലിംഗ് (Honour Killing). കുടുംബത്തിന്റെ അഭിമാനം സംരക്ഷിക്കാന്‍ ജനക്കൂട്ടം നടത്തുന്ന പൈശാചിക കൊലയുടെ വിളിപ്പേര്. പ്രണയിച്ച് വിവാഹം കഴിക്കുന്നവര്‍ക്ക് വധശിക്ഷ വിധിക്കുന്ന ജാതിപ്പിശാചുക്കള്‍ സ്വൈരവിഹാരം നടത്തുന്നത് ഉള്‍വനങ്ങളിലെ പരമപ്രാകൃതമായ ഇരുള്‍നിലങ്ങളിലല്ല. ആധുനിക ഇന്ത്യയില്‍, അഭ്യസ്ഥവിദ്യരും സംസ്കൃത ചിത്തരുമായ ജാതിഹിന്ദുക്കള്‍ തിങ്ങിപ്പാര്‍ക്കുന്ന നഗരചത്വരങ്ങളിലും പട്ടണപ്രാന്തങ്ങളിലും.

സത്യാന്വേഷി said...

ഇടയ്ക്ക് ഒന്നു പറഞ്ഞോട്ടെ.: ഈ മാര്ക്കണ്ഡേയ കട്ജു തന്നെയല്ലേ മുന്പ് അലഹബാദ് ഹൈക്കോടതി ജഡ്ജിയായിരിക്കുമ്പോള് തന്റെ മുന്ഗാമി ഒരു ദലിതനായിരുന്നതിനാല് ഇരിപ്പിടം ഗംഗാജലം കൊണ്ടു കഴുകിയത്? ഇതേ ജഡ്ജി തന്നെയല്ലേ പ്രസിദ്ധമായ 50: 50 കേസില് എന് എസ് എസ്സിന്റെ വാദങ്ങള് വിധിന്യായത്തില് അപ്പടി പകര്ത്തിവച്ചത് ?എന്നിരുന്നാലും ഇവുടത്തെ വിധി ന്യായം ആശ്വാസം തന്നെ.

ജനശക്തി said...

പ്രസക്തമായ പോസ്റ്റ്.

ഓഫ്:

അത് മാര്‍ക്കണ്ടേയ കാജു അല്ലല്ലോ സത്യാന്വേഷീ.

ഈ ലിങ്കില്‍ നോക്കുക. അതില്‍ നിന്നൊരു ഭാഗം.

.....The incident took place in Allahabad when Bharthari Prasad, then additional sessions judge, was transferred to another court and replaced by A K Srivastava in June 1998.

Newspaper reports then said Srivastava had got the entire chamber and its furniture washed with `Ganga jal' because it was previously occupied by a judicial officer belonging to a Scheduled Caste.

സ്വാശ്രയക്കോളേജ് വിവാദത്തില്‍ ജസ്റ്റീസ് ബാലിയല്ലേ നായകന്‍?

chithrakaran:ചിത്രകാരന്‍ said...

കേവലം കള്ള ചരിത്രങ്ങളും,മിഥ്യാഭിമാനവും കൊണ്ട് നിര്‍മ്മിക്കപ്പെട്ടിരിക്കുന്ന ജാതി മാഹാത്മ്യത്തെ ചരിത്ര സത്യങ്ങള്‍ കൊണ്ടും ജാതി ദുരഭിമാനങ്ങള്‍ക്കു പിന്നിലെ
ദുര്‍നടപ്പിന്റെ ശരിയായ ചരിത്രം കൊണ്ടും തകര്‍ക്കുക
എന്നതുതന്നെയാകട്ടെ നീതിയുടെ സമഭാവനക്കായി ആദ്യം ചെയ്യേണ്ട കര്‍ത്തവ്യം.

Bilal said...

സാമൂഹ്യ രാഷ്ട്രീയ വിഷയങളെ സൂക്ഷ്മമായും ഗൗരവത്തോടെയും സമീപിക്കാറുള്ള മാരീചന്‍റെ ലേഖനങള്‍ കേവല വായനാസുഖത്തിനപ്പുറം വായനക്കാരനെ കുറച്ചെങ്കിലും രാഷ്ട്രീയ വല്‍ക്കരിക്കാന്‍ ഉപയുക്തമാകാറുണ്ട്. ഇന്ത്യന്‍ പൊതുബോധത്തെ ജാതി എന്തുമാത്രം മാരകമായി നിയന്ത്രിയ്ക്കുന്നു എന്നും സാമൂഹ്യ ആധുനികത ഇന്ത്യന്‍ പരിസരങളില്‍ എനിയും എന്തുമാത്രം അന്യമാണു എന്നു, ഗ്രാമങള്‍ മുതല്‍ സുപ്രീം കോടതി വരെയുള്ളവരുടെ ബോധ മണ്ഡലങളില്‍ നുരയ്ക്കുന്ന ജാതി വൈറസുകളുടെ ആധിക്യം നമുക്കു വെളിവാക്കി തരുന്നുണ്ട്. എന്നാല്‍ "ഹോണര്‍ കില്ലിംഗ്" എന്ന പേരില്‍ അരങേറുന്ന ഈ കൊടും ക്രൂരത ഇന്ത്യയില്‍ മാത്രമല്ല, ഇതിനേക്കാള്‍ ഭീകരമായി പാക്കിസ്ഥാനിലും അരങേറാറുണ്ടെന്നത് മറ്റൊരു യാഥാര്‍ഥ്യം. സഹോദരന്‍ അന്യ ഗോത്രക്കാരിയെ പ്രണയിച്ചതിനു അവന്‍റെ സഹോദരിയെ പരസ്യമായി കൂട്ട ബലാല്‍സംഗം ചെയ്യാന്‍ ഉത്തരവിട്ട ഗോത്ര പഞ്ചായത്ത് തീരുമാനവും, കുടുംബാഭിമാനം കാക്കാന്‍ പ്രണയത്തിലകപ്പെട്ട സഹോദരിയെ നിഷ്കരുണം വെട്ടിക്കൊലപ്പെടുത്തുന്ന സഹോദരന്മാരെക്കുറിച്ചുള്ള വാര്‍ത്തകളും പാക്കിസ്ഥാനില്‍ നിന്നും നിരന്തരം ഉണ്ടാകാറുണ്ട്. ജാതി മത ഗോത്ര ആഭിമുഖ്യങളുടെ ഇടുക്കില്‍ നിന്നും പുറത്തു കടക്കാന്‍ കഴിയാതെ ഇന്നും കാലത്തിന്‍റെ കടലെടുത്ത പ്രാകൃത രീതി ശാസ്ത്രങളെ മുറുകെ പിടിച്ചു കഴിയുന്ന ഈ ജനതയെ ആധുനികവും കാലികവുമാക്കാനുള്ള ഉത്തരവാദിത്തം കാലത്തിനു തന്നെ വിട്ടുകൊടുക്കുകയേ നിവൃത്തിയുള്ളൂ.

ജയചന്ദ്രന്‍ നെരുവമ്പ്രം.

യാരിദ്‌|~|Yarid said...

track..

ജയരാജന്‍ said...

“മനുഷ്യസമൂഹം ഇന്നോളം ആര്‍ജിച്ച മാനവികതയുടെ ഉള്‍ത്തുടിപ്പത്രയും സുപ്രിം കോടതി ഉയര്‍ത്തിപ്പിടിച്ച ഈ നീതിബോധത്തിലുണ്ട്.”!
ഓഫ്: "സുപ്രിം കോടതിയില്‍ ലതയുടെ കേസ് (Writ Petition 208/2004 dated 07/07/2008)‍" എന്ന് തുടങ്ങുന്ന ഭാഗമത്രയും രണ്ട് പ്രാവശ്യം വന്നിട്ടുണ്ട്. തിരുത്തുമല്ലോ?

മാരീചന്‍‍ said...

നന്ദി ജയരാജന്‍... തിരുത്തിയിട്ടുണ്ട്...

raveesh said...

tracking

മാരീചന്‍‍ said...

രണ്ടാം ഭാഗം ഇവിടെ....

MOHAN PUTHENCHIRA മോഹന്‍ പുത്തന്‍‌ചിറ / THOONEERAM said...

അഭിമാനക്കൊലപാതകങ്ങൾ ഇന്ത്യയിൽ അരങ്ങേറാൻ തുടങ്ങിയിട്ട് കാലം കുറച്ചായിട്ടുണ്ട്. ഇപ്പോൾ ഇത്തരം വാർത്തകൾ കേട്ടാൽ ആരും പ്റതികരിക്കുന്നുപോലുമില്ലെന്ന അവസ്ഥയിലാണിന്നു നാം

MOHAN PUTHENCHIRA മോഹന്‍ പുത്തന്‍‌ചിറ / THOONEERAM said...

അഭിമാനക്കൊലപാതകങ്ങൾ ഇന്ത്യയിൽ അരങ്ങേറാൻ തുടങ്ങിയിട്ട് കാലം കുറച്ചായിട്ടുണ്ട്. ഇപ്പോൾ ഇത്തരം വാർത്തകൾ കേട്ടാൽ ആരും പ്റതികരിക്കുന്നുപോലുമില്ലെന്ന അവസ്ഥയിലാണിന്നു നാം

MOHAN PUTHENCHIRA മോഹന്‍ പുത്തന്‍‌ചിറ / THOONEERAM said...

അഭിമാനക്കൊലപാതകങ്ങൾ ഇന്ത്യയിൽ അരങ്ങേറാൻ തുടങ്ങിയിട്ട് കാലം കുറച്ചായിട്ടുണ്ട്. ഇപ്പോൾ ഇത്തരം വാർത്തകൾ കേട്ടാൽ ആരും പ്റതികരിക്കുന്നുപോലുമില്ലെന്ന അവസ്ഥയിലാണിന്നു നാം

Manikandan O V said...

ആരുഷി മർഡർ കേസും ഇതേ ഗണത്തിൽ പെടുന്നതാണ്. ആ കേസിൽ കടുത്ത നടപടികൾ ആണ് സുപ്രീം കോടതിയിൽ നിന്നും ഉണ്ടായത്.